——古早漳泉在地歌

記得我母疼囝時，今日無tè去chhē伊。Kì-tit góa bú thiàⁿ kiáⁿ sî, kiaⁿ-ji̍t bô-tè khì chhē i.
毋知我母tó-lo̍h去，放我安安苦傷悲。M̄-tsai góa bú tó-lo̍h khì, pàng góa An-an khó·-siong-pi.
雞仔離母會啼吼，安安chhē母目屎流。Koe-á lī bú ē thî-háu, An-an chhē bú ba̍k-sái lâu.
看見雞仔吱吱吼，chhē無我母掛心頭。Khoàⁿ-kìⁿ koe-á ki-ki-háu, chhē bô góa bú kòa-sim-thâu.
雞母啄米放跤兜，為囝毋甘吞落喉。Koe-bú tok bí pàng kha-tau, ūi kiáⁿ m̄-kam thun-lo̍h âu.
鶆鶚野貓若來到，雞母展翼共囝包。Lāi-hio̍h iá-bâ nā lâi-kàu, koe-bú thián si̍t kā kiáⁿ pau.

記得我母惜囝時，囝吼捧糜緊來飼。Kì-tit góa bú sioh kiáⁿ sî, kiáⁿ háu phâng bê kín-lâi chhī.
我母飼囝無容易，天寒共囝穿寒衣。Góa bú chhī kiáⁿ bô iông-ī, thiⁿ koâⁿ kā kiáⁿ chheng hân-i.
囝兒一時若破病，母汝趕緊請先生。Kiáⁿ-jî chi̍t-sî nā phoàⁿ-pīⁿ, bú lí koáⁿ-kín chhiáⁿ sian-siⁿ.
頭殼規日摸無離，囝笑綴笑啼綴啼。Thâu-khak kui-ji̍t bōng bô lī, kiáⁿ chhiò tè chhiò, thî tè thî.
今日我母來分離，安安四界chhē無伊。Kiaⁿ-ji̍t góa bú lâi hūn-lî, An-an sì-kòe chhē bô i.
毋知我母tó-lo̍h去，安安chhē母苦傷悲。M̄-tsai góa bú tó-lo̍h khì, An-an chhē bú khó·-siong-pi.

Tagged: 古早歌仔