這是一條舊聞——晏到（oàⁿ-kàu）的報道。Bîn-chìn-tóng tih-beh落台進前，台灣教育部門，緊緊公佈「臺灣閩南語推薦用字（第二批）」。

頭一批「推薦用字（300字）」從（chêng）2007年5月29號公佈到taⁿ，beh倚一年的中間，攏無啥物新動作，害我想講bîn-chìn-tóng 敢是咧變猴sńg、扮公伙仔，凊彩講講咧無准算。不而過，也莫怪（bo̍h-koài）儂會安呢想啦。汝kā看，一年啊neh！足足一年啊neh！即款代誌敢需要用kah一年的時間來咧chhiâu？到底是按怎毋？是有影國民黨歹剃頭，抑是民進黨自底著傷過無路幹？是beh誣賴社會傷過無情，抑是beh牽拖民眾傷過現實？毋知影。我kan-ta知影“一年”的時間，對民進黨來講，實在有夠長啊，真liōng-siōng啊，嘛真討債啊。一年啊neh，“遮呢長”的時間，借問汝是創啥，是按怎攏bōe曉通寶惜，是食飽閒閒咧掠虱母相咬抑毋是？敢講汝毋知影這“一年”若過，khiàm-chhái永遠bōe koh有“一年”。儂講“一鳥在手，較贏十鳥在樹”，tēⁿ咧手中心的鳥仔，無beh斟酌來寶惜，聽候（thèng-hāu）kah 予伊飛去chiah beh來去四界kho̍k-kho̍k jiok，未赴啊啦，傷慢啊啦，若beh koh望伊飛倒轉來，除非天落紅雨、馬發角。古早儂講“好好鱟，刣kah屎ná流”，著是咧phì-siùⁿ像即款儂。贏贏kiáu，poa̍h kah輸了了。若beh kā我講民進黨有出啥物歷史學的gâu儂，拍死我嘛毋願信。Chhio-tiô無落魄的久啦，李自成，敢無瞭解？哦！我soah bōe記咧，“liù中國皮、iah中國骨”，逐工安呢無閒chhih-chhah，結尾“liù” kah頭毛也黜（lut）了了；“iah” kah頭殼嘛soah半腦去……有影khám kah過頭去。總是，beh講某儂對民進黨有看法也好，有誤解也好，橫直我的印象是：即个黨，講的較濟做的，一暝全頭路，天光無半步；謗風水雞仔割無偌濟肉。

即擺又koh來sak出這第二批「推薦用字」，是第二批，khiàm-chhái嘛是最後的一批。

ps. 看早前的報道《「臺灣閩南語推薦用字」（第一批）》

Tagged: 正字, 正音, 規範字