作者：阿越（網路作家）

原文：“震”動人心（華文）

編譯：Limkianhui

即陣，離5月12號hit場大災禍（tsai-ē），算算咧過去規圇（kui-nn̂g）禮拜囉，ah我規頭殼soah猶原佇咧戇戇踅。12號地動的時陣，我kán-ná嘛是略略仔聽儂咧講niâ，也毋知影到底動kah偌厲害，全全無想講是遐爾大的災禍。到kah隔轉日13號，我猶koh kiu 佇厝ê咧寫畢業論文，一日kan-ta睡咧兩點鍾久，房間內規四界攏全冊，直透péng資料，檢koh檢、改koh改，規心滿腹全浸咧寫論文，伸（chhun）的代誌攏總放一邊去囉。連新聞嘛攏bōe顧得看（幾落年來我逐日攏有咧看新聞）……即tsām上網嘛kan-ta看“知網”niâ，手機仔短信啦、QQ、MSN啦，嘛kan-ta聯繫一寡較捷咧來往的同學、先生佮朋友niâ，伸的著攏全擋tiâu，hiù咧邊仔，無咧póe會。聽儂講12號 hit日四川大地動過身，尾仔長沙有koh振動（tín-tāng）差不多40秒鍾久，koh講感覺不止明顯，不而過，hit陣我拄好去小寐（bî）一 tia̍p久，睏ka-tsōe去，全全毋知儂。

到kah 13號chiah kā論文摕去交答辯秘書，了後著趕緊去補眠。睏kah爽歪歪（sóng-oaiⁿ-oaiⁿ）peh起來，電腦開開，去咧踅（se̍h）聯合早報的網站， chiah知講出代誌ah。Hit日規圇日，阮兜電視攏撰佇CCTV的新聞台。我幾落擺強beh哭出來……進前我直直想講家己是較會曉保持冷靜的儂，我是讀歷史的，看過足濟大災難的記錄，嘛看過足濟關係儂心理的記錄，定著看較透。Ah毋佫，面對著目睭前即款大災厄，我chiah知影講家己是遮爾仔軟 chiáⁿ。

我佇電視跤kiu beh規日久，soah感覺hiah-ê鏡頭bōe輸離咱真遠，看著真生份；ná像是假的，ah毋koh，又佫親像是佇咧身軀邊仔的款……我看溫某儂佇咧現場beh吼beh吼，會使講這是我chêng-kah-taⁿ頭一擺予政客感動著——歉採日後bōe koh有第二擺。臨當時（liâm-tong-sî），我chiah想著講，四川kán-ná koh有濟濟同學佮朋友。我毋敢撽電話，kan-ta數个（siàu-ê）發短信去，聯繫bōe著的，著tòa QQ佮MSN留話……佳哉真緊著攏收著回信，好佳哉逐个攏chiâu平安，獨獨一个khiā綿陽的朋友，過兩工了後chiah回過來，講in規家伙仔大細漢囡仔平安順序無代誌……當時的心情我毋愛koh餾，我甘願即世儂mài有hit款體驗。我kan-ta會當講，我真正好狗運，毋免為著失去某物仔物件佇咧艱苦鬱卒，上好永遠像安呢著好。

不而過，這是永遠無可能。

啥物儂會當目睭金金看著遮爾大的災禍soah攏 bōe 艱苦？

別儂怎樣想我毋知，上無，我知影我bōe。

歉採（khiàm-chhài）我無夠資格講家己是一个批評者，ah毋koh，我敢講我有資格通去giâu疑。自來，hiah-ê權力機器，我對 in攏是一半疑心一半防。斷（toàn）bōe當烏白聽hiah-ê佔懸位的，嘛bōe當濫糝（lām-sám）相信眾儂，這是我做儂的一條原則。

Ah毋koh，在佇即場災難面頭前，我雄雄發見講，有的普通時做kah慣勢慣勢的代誌，佇即號坎站若koh照進前的去做，著kán-ná真無行情，真無天良的款，安呢，我會感覺連我家己嘛無法度原諒！

佇即款流擺，儂的本能kan-ta會去想著艱苦niâ，會愛beh予較濟儂會通得著救，會beh想辦法去幫助in。

獻白講，我自來對中國兩大“民間”慈善組織gê-gê，這道理真簡單，毋免我加講。較早我若捐款攏捐獻佇咧扶助散赤囡仔讀書（tha̍k- tsu），數額（siàu-gia̍h）攏普通niâ，多數是捐予hiah-ê佇街仔路募捐的民間組織抑是學生組織。從（chêng）舊年，我著tiām -tiām-á佇邊仔咧觀察李連傑的壹基金，張馳一寡hām壹基金有牽連的報道——ah毋koh，經過即擺災禍，我chiah覺悟，這根本毋是咱該當厚多疑的時陣！毋以善小而不為——做儂愚tû，正正著是為著一句簡單的話bōe曉通解，chiah會輸kah chiah悽慘！

好佳哉我即陣想有啊，想通啊。Hoān拄勢，taⁿ嘛猶koh bōe傷慢……

進前佮朋友開講，定咧講的一句話，講人類的大劫難便若（piān-nā）經驗一擺，儂的道德心，固定tòe咧倒退一擺。

不而過，我感覺即擺毋是安呢。即款大災禍，真正予咱加捌真濟道理。咱逐个攏看有著的，今年兩擺天災，確確會予咱對即个國家佮民族，加足有信心——這著是我年頭講hit句話的含義。

嘛有朋友共我講，叫我毋通直直kek tiām-tiām，叫我該當徛出來替四川的災民出聲。是講，這敢有必要？佇即號流擺，佇中國，koh有啥物儂伊的心肝無hām四川縛做一下咧？！

好話毋免加講，厚言語有當時仔無事駛。

汶川大地動，振動著的，是全國人民的心。咱心肝頭咧艱苦、咧眏望（ǹg-bāng）、咧感動，這用筆任寫嘛寫bōe出來，任記嘛記bōe tiâu。

我寫寫chiah-ê，無別項，kan-ta為著紀念即擺災難予我的啟示。

PS：我有看著儂咧問講阿越替四川災民做啥物代誌，講來真見笑，我無才調做半項。我即陣的身命無才調去四川做志願者，iah若講著獻血，真歹運，十年前頭一擺去獻的時陣儂著講我血無合格。所以，除了捐錢，我無法通為in做任何代誌。講到網路頂頭hiah-ê“道德縛票”的所行，我是有夠厭恨，這證明我合意的傳統文化內底猶原濫摻著一寡“下路貨（kē-lō·-hòe）”佇咧。不而過，我無想beh佇即款流擺佮儂冤家諍喙起衝突——我宁可加留寡氣力來做寡較實際的代誌——所以，我bōe公開我捐款的數額。我自然會去做我想beh做的、應該愛做的代誌。Koh來即三日，全國的儂攏beh來哀悼（ai- tō）受難者，我kan-ta望in會當安歇（an-hioh）。

Tagged: 天災人禍