闽南民间风俗—出世、剃頭、满月、四月日、度晬、十六岁、做生日

俗語 講「一鄉 一俗」,閩南 所在 的 生活 風俗 實在 足有 地方 特色,風俗 習慣 有夠 濟,一年 三百六十五工,差不多 逐工 攏無 共款,毋是 過年,著是 過節;供(kèng)神 拜佛、做生日、好歹事……濟kah予儂算bē離、唸bē完。民間 風俗 是 鄉土 文化 當中 真 重要的 一个 部分,往往 hām 鄉土 語言、鄉土 藝術、民間 曲藝、宗教 信仰 相粘蒂帶。Chiah-ê 傳統 的 民間 文化、風俗 習慣 是咱 老祖先 佇咧 古早 農業 的 時代,所來 産生 的 社會 文明,是 咱 寶貴 的 祖公業。時代 發展 真緊,往過以農立國,農業的社會,即陣 變成 工業立國 的 科技社會。現此時,咱 有噹時仔 定定 會 數念 往過,數念 囡仔時代,怨歎 現代 社會 變化傷緊。一寡仔 佇咧 往早 農業 時代 常在 咧 搬車 的 古早話、古早例,現在 會使講 所留落來的、所chhun落來的,真正 無 濟啊,強beh 無無去 啊……這 實在 真 可惜,予 儂 想著 心肝芛仔 真正 會 痛疼(thàng-thiàⁿ)。

此去,咱 beh 長短仔 來 介紹 一寡仔 閩南 地方 的 民俗。講 是 講 beh來 做「介紹」啦,iah 事實 我 家己 所捌 oân-á 真有限。我limkianhui 算講 猶佫 是 一个 年歲 無講 kài濟 的 少年輩的,況兼 我 進前 嘛 無 專途 咧 研究「民間風俗」,所以 我 即款「介紹」定著bē 啥物 會 chiâu-chn̂g,有 làu-kau、有 tāⁿ 誤 嘛一定 在所難免。敬請 各位 批評 指教。

今仔日,來講 一寡仔 佮 囡仔 出世、大漢 有 相干 的 風俗 古例。

§出世 §剃頭 §滿月 §四月日 §度晬§十六嵗§做生日


出世︰

嬰仔 出世 了後,第三 日、第九 日、第十七 日,厝內底 示大儂 愛 知影 通(thang) 拜 床母,即款 拜拜 的儀式,號做「做朝」(chò-tiau),有「三日朝」(saⁿ-ji̍t tiau)、「九日朝」、「十七日朝」……閩南人 看重 供「床母」,民間認為講,囡仔 自 出世 到kah 十六歲足 進前,攏 是 床母 咧 庇佑,保庇 囡仔嬰 會得 平安 順利。三日朝,是 紅嬰仔 落土 了後,算講第一擺 有孝(iú-hàu) 床母(頭一擺 做朝),所以 重倍(têng-pōe) 愛 斟酌。三日朝 做煞,猶有 九日朝、十七日朝,共款 愛來拜 床母,求 床母 保庇 紅嬰仔 平安 順利、乖乖 gâu大漢。此去,每逢 初一、十五,或者 是無拄好 囡仔 破病,示大儂 攏愛 款 一寡 供品 來 求 床母 保庇、消災解厄。

三日朝 即工,上要緊的,當然 著是 拜 床母 囉,這 透底 安排 佇 早起時。燒金,oân-á 有 講究。一般 來講,紅嬰仔 佮 老母 睏 共床的 較濟,所以,供 床母 嘛是 佇 月內房(goe̍h-lāi-pâng)咧 供。拜拜 結尾 著愛 燒金,燒金 著愛 燒 蹛咧 房間 的 門後——壽金 毋好 展開,規沓(tha̍h)直接 用火 點著(to̍h)就 會使 囉。拜 床母 的 意義,是 beh 求 神明 保庇 紅嬰仔 會當 有 好睏眠,睏 會 長眠、睏 會 在眠。床母 拜了,請 抾姐(khioh-chiá /産婆)kā 紅嬰仔 洗身軀。

頂面 講的 是 做 三日朝 即工,代先 愛 知影 通 供奉(kèng-hōng)床母。阮 漳州 龍海,攏 講號做「供姐」(kèng-chiá),稱呼 床母 是「姐」。除了 愛 供 床母,佫愛 攢(chhoân)油飯、雞、肉 來 祭拜 厝裡 的 神佛 佮 祖公。了後,厝主儂 會 派儂 摜 一寡 油飯 去 hēng 媒儂婆、親堂、厝邊頭尾 佮 月內儂 in 外家 hit爿。意思 是 beh 報 予 chiah-ê 親情五雜 通 瞭解 主儂 抾囝(khioh-kiáⁿ)啊。


剃頭︰

紅嬰仔 出世 二十四日,示大儂 愛 央(iang)儂 來 kā 嬰仔 剃頭。二十四 日 剃頭,這 代表 講,囡仔 大漢 了後 會當 來 有孝 示大儂(中國 民間 傳說,講 有 二十四 个 孝子)。閩南 有的 所在,嘛有 剃 二十日的。

剃頭,著是 將 嬰仔 的 胎毛 剃掉,一般 來講,剃 和尚頭的 較濟。未剃 進前,代先 愛 攢 一奇(chi̍t-kha) 骹桶、淡薄 石卵仔(華語:卵石)、淡薄 蔥仔、銀角仔 十二塊、雞卵、鴨卵(用 紅花米 挲 紅紅)。先 坫 骹桶 內底 倒 寡仔 燒水,chiah佫 kā hiah-ê 石卵仔、銀角仔、蔥仔、雞卵 鴨卵 下蹛 骹桶 裡,了後,戽水 起來 kā 嬰仔 洗頭。Chiah-ê 物件 攏 代表 著 無共的 意義——

石頭: 表示 身體 勇健(ióng-kiāⁿ)、性格 儼硬(giám-ngī);
蔥:表示 聰明(chhang-miâ);
銀角仔:表示 富貴、好額、行財運。
雞蛋、鴨蛋:表示 囡仔 生媠(siⁿ-súi)、古錐、好 枝骨。俗語 講「鴨卵身、雞卵面」。


滿月︰

滿月,一般 是 愛 辦桌 請 儂客。親情五雜、朋友間,招招 相請,辦 kah 誠 豐厚(hong-hō·)、誠 chhe-chhau。

做滿月,舅–仔(kū–á,月內儂 外家 的 兄弟)著會 來 親家兜(chhin-ke tau) 「送頭尾」。送頭尾,著是 款 一套 囡仔 衫褲、鞋襪、帽仔、手環、骹環……等等 的 物件。


四月日︰

四月日,愛 kā 嬰仔「收瀾」(siu-nōa,華語:收涎)。Oân-á 愛 款 hit-lō 牲禮 佮 紅桃 供 神,供 祖公。做 siu-nōa 儀式 的 時陣,示大儂 愛著 攢 十二塊 馬蹄酥,用 紅絲仔線 kā 穿穿(chhng-chhng)、縛縛(pa̍k-pa̍k) 做 一串(chi̍t-chhǹg),順sòa 佫 kā 挂咧 嬰仔 的 頷kún仔,唸 好話——

收瀾 收 凋凋,(Siu-nōa siu ta-ta,)
明年 生 膦脬。(Mê-nî siⁿ lān-pha.)
收瀾 收離離,(Siu-nōa siu lī-lī,)
明年 生 小弟。(Mê-nî siⁿ sió-tī.)


度晬︰

紅嬰仔 滿 一歲足,厝裡 所做的 儀式,號做「做度晬」(chòe tō·-chòe)。北方 中原 所在,自古 著有「周晬」的 講法(見《東京夢華錄》),所講的,著是「周歲」的 意思。閩南 漳泉的 風俗,紅嬰仔 度晬 即日,厝裡儂 著愛 先 拜 佛祖 神明,燒金、放炮。

做度晬,上 趣味的 著是「試周」(chhì-chiu,華語:「抓周」)。試周 的 儀式 是 安呢:坫咧 厝內底 大廳 佛架仔桌 的 面頭前(大廳中央),佇 土塗兜 chhu 一tè 竹做的 大ka-lia̍h,內底排足濟物件。大儂chiah佫kā嬰仔抱蹛ka-lia̍h內,予伊家己去捎(sa)物件,看 代先 捎著 啥貨。一項 物件,代表 一項 社會職業。根據 嬰仔 上代先 捎著 的 物件,著 會當 來 a-kah(華語:預測)囡仔 的 性素、運途,判斷 囡仔 大漢 了後 做 佗一 途。比論講ka-lia̍h內面 有hē 十二項 物件,比論講:秤、墨、硯(hīⁿ)、毛筆、冊、算盤、蔥仔、雞卵、柴、白銀、布尺、雞bong。

蔥:表示 囡仔 真 聰明(chhang-miâ),有出脫。
冊:說明 嬰仔 別日 誠gâu讀冊,是 狀元才。
筆、墨:表示講 誠gâu寫字、gâu畫圖,有 才情,通(tang) 做 畫家。
算盤、秤:表示gâu做生意,有財利。
雞卵、雞bong(雞腿):表示 富貴,有通 食,bē枵腹肚。(有噹時仔,用 箸 攕(chhiám) 雞卵 代替 雞bong。號做「雞櫸」(ke-kia̍h))。
布尺:說明 囡仔 日後 會 入 裁縫 即途。
白銀:表示講 日後 會 好額、會 富貴……


十六歲︰

囡仔 大 到 十六歲,號做「成丁」(chiâⁿ-teng),示大儂 愛kā 辦「成年禮」。

民間 透底 相信講,囡仔 會得 平安 順利、gâu大漢,一切 攏是 神明 佛祖 佇咧 鬥保庇。所以,到kah 囡仔 十六歲足 的 時陣,示大儂攏會chhōa in 去 佛祖廟的 拜拜、答謝;或者 佇咧 厝內底 祭拜 七娘嬤、燒 七娘嬤亭,用 安呢 來 報答 神明,對 神明 表示 感謝。


做生日︰

Cha-po· 囡仔 大漢 了後,做 示大儂的,逐年 攏會 kā 慶祝 生日。

ps.閩南儂 認為講,數字「九」往往 毋是 啥物 好吉兆。Cha-po·-lâng 的 歲聲 piān-nā 拄著 「九」,比論講 十九、四十九……hit-ê 年kō(華語:年份)整個(chéng-kô)的 運途 會 加較 bái, 做 任何 的 代誌 一定 著愛 細膩 佮 斟酌。為著 安呢,逢 九 做生日,佫較 著 慶祝,往往 會比 往常時(éng-siâng-sî)加較 豐厚、加較 鬧熱。閩南語,「九」佮「久」讀 共音,「久」本然 著是「長久」、「永久」的 意思。不而過,三十 過後,做生日 oân-á 著 講究,不可 濫糝(lām-sám)來。一般 來講,三十九 著愛 當做 四十 歲 生日 做,四十九 歲 嘛愛 當 五十 歲 生日 來做(俗語講,「五十九做生日,雙骹 lòng直直」)。五十歲 生日 叫做「暖壽」,六十 歲 叫做「下壽」,七十 歲 叫做「中壽」,八十 歲 叫做「上壽」,九十 歲 叫做「耄耋之壽」,一百 歲 叫做「期頤之壽」。有錢儂 做生日,不但 辦桌 請 儂客,佫愛 倩(chhiàⁿ) 戲班 來 搬戲,真正 是「老伙仔 食 麻油——鬧熱滾滾」啦!

Tagged:

發表迴響

你的電子郵件位址並不會被公開。 必要欄位標記為 *

*