關係白話字連字符的一寡看法

白話字自發明,到今有百外年的歷史。白話字的「正字法」雖然較早罕得有正式提出來,不而過,ùi白話字的文獻佮濟濟往早時出版的通俗刊物內底,攏會當chhōe出伊的規律。即條規律著是「正字法」。白話字既然是作為一種文字存在,必定有伊的正字法則,咱咧寫白話字的時,oân仔愛遵守伊的「正字法」,毋好chhìn-chhái寫、烏白寫。

白話字的正字法,包括幾若項的因素,比論「聲母」、「韻母」、「聲調」、「連字符」佮一寡其它的規則。咱即陣就卜專門針對「連字符」的運用,來做一寡議論。

白話字的「連字符」安怎用,實際是牽連著閩南語的語法。佫因為閩南語屬於漢語,所以閩南語的語法基本上是遵守漢語語法。先講一聲「歹勢」,我的中文語法智識真害,紲落來,若是佗位講了無妥當、無對同的,敬請批評指正。

白話字的連字符,有兩種款式。單短橫(「-」)表示語詞中間的連接;雙短橫(「–」)表示連接輕聲(本文無按算討論)。

遮有通參考:http://www.pkucn.com/viewthread.php?tid=125982&extra=page%3D1

咱發現講,即个中國大陸的學者彭澤潤先生所寫的華文文章,格式佮閩南語白話字基本相siâng。來看彭先生伊文章的句法風格:

(1)刘 阳 同学:来信 收到。……
(2)我 昨天 参加 南开 大学 文学院 「第16 期 语言学 博士 论坛」,大家 似乎 把 论文 说 得 一无是处,老师 之间 也 出现 针锋相对 的 时候,但是 一点 也 不 影响 学术 友谊。……

彭澤潤先生將即種書寫方式號做「詞式書寫」(或者「分詞連寫」),請看伊的論文:《汉语 需要 从 “字式 书写”到“词式 书写”改进》(彭泽润/周纯梅)。咱發現,白話字的書寫方式,佮彭先生講的「詞式書寫」(或者「分詞連寫」)真接近。咱來看:

第一,凡若會當組成語詞的,一定愛粘做伙,bōe使拆分離。比論講: 同學、來信、昨天、參加、大學、但是、一點、文學院、語言學、一無是處、針鋒相對……這hām白話字連字符的運用是完全共款的組合原理:tông-o̍h (同學)、lâi-phoe (來批)、cha-hng (昨昏)、chham-ka (參加)、tāi-ha̍k (大學)、tān-sī (但是)、一點、bûn-ha̍k-īⁿ (文學院)、gú-giân-ha̍k (語言學)、bô-chi̍t-tè-sī (無一塊是)、chiam-hong-siong-tùi (針鋒相對)……

第二,凡若拄著漢人的「儂名」,「姓」佮「名」中央愛有踉縫(làng-phāng/空格),「名字」部分照原愛粘做一下。比論: 彭 澤潤、劉 陽……白話字拄好嘛是照安呢處理:Phê Te̍k-lūn, Lâu Iông……

第三,「專用名詞」的情形。具體可比: 南开 大学 文学院、语言学 博士 论坛……咱講,「南開大學文學院」是一个專用名詞,即「七个字」鬥做伙,表達出一个完整的事物。不而過,照組詞的方法來講,會當拆做三對互相並列、互相無影響的詞:「南開」、「大學」、「文學院」。所以,彭先生寫做「南开 大学 文学院」,共款的道理,「语言学博士论坛」愛寫做「语言学 博士 论坛」。事實上,咱白話字著是照即个撇步來處理:Lâm-khai Tāi-ha̍k Bûn-ha̍k-īⁿ, Gú-giân-ha̍k Phok-sū Lūn-tôaⁿ……

頂面我只是簡單來說明白話字連字符如何運用、愛遵守啥物款的規則。事實上,這關係著「漢語語法學」的智識。朋友若是佇學校有學中文,相信加少攏有瞭解一寡。不而過,因為我個人的中文語法智識真在有較欠,所以,無才調坫遮講kah真透白。這著是因何我beh去參考「彭式華文」的原因。這是彭先的個人網站:http://www.yywzw.com/jt/zerun/。有閒,我chiah佫認真來學習。

[有牽連的文章]:

*白話字的正詞法
*关系闽南话白话字「大写规则」的一寡意见
*關係白話字連字符的一寡看法
*关系 闽南话 白话字 撇音 的 一寡 看法
*有「漳州腔」、「泉州腔」的鄉親,如何來寫白話字(POJ)
*POJ音節

Tagged:

發表迴響

你的電子郵件位址並不會被公開。 必要欄位標記為 *

*