豬婆郎兩三齣

福建泉州晉江市
一个鄉里近海墘
有叫阿郎本姓紀
生做四壯頭圓圓

歲頭食到五十二
愛穿西裝紲開裾
開喙講話指佮比
𠢕唸四句會吟詩

一日來到泉州市
行到西街車站邊
腹肚枵到都卜死
路邊一擔牛肉羹

看見好料喙瀾滴
可惜袋仔紲無錢
想來想去無主意
姑將無奈頭敧敧

雄雄踢著一桗(tè)錢
趕緊伸手來抾伊
看真敢有二百二
我piāng這錢遮大圓

一時暢到大心氣
笑到喙角強卜裂
喙瀾連吞幾落喙
贏過員外抴細姨

買來塗豆三簸箕
油食粿配燒豆奶
佫買豆花三碗滇
糖水撓去九湯匙

一喙共伊喢落去
ABCDEFG
碗墘捀咧直直舐
過路看到笑嘻嘻

食飽喝爽做伊去
頭家越頭來攔伊
攏總三箍兩角二
擋咧卜走先納錢

一張白紙寫烏字
伸手去撏對腹邊
講彼著是「人民幣」(即三字唸普通話)
汝著收去莫起疑

頭家看了大受氣
胸坎挽咧卜搧伊
白食白啉騙街市
一張粗紙諍是錢

事誌看款勿會煞得
佳哉有儂來救伊
彼是一个小兄弟
敢是義氣的男兒

即儂生做真標致
一副目鏡掛鬢邊
目睭大蕊鸚哥鼻
看款斯文的先生

問伊厝佇佗一里
應講蹛佇西埔墟
本是東山的縣治
姓何名煒號東豬

今日來到泉州市
地頭生疏心驚疑
聽說城內有粉味
趕緊相報莫延遲

賢弟替我來解圍
恩情實在較大天
卜愛粉味我報汝
東街直去西街墟

頭前看見開元寺
一條巷仔叫摸奶(ni)
直直行故直直去
看見紅燈免頓蹬

門籬卜掀是做汝
看汝是卜愛啥物
也有老娼交幼齒
包汝食了笑咪咪

東豬聽了大歡喜
笑到喙仔得卜裂
春桃秋梅抴入去
三日無伐出岑墘

東豬講煞換五姊
五姊本底是姓徐(Chhî)
今年看有四十二
面肉紅霓好身枝

講話輕聲又細語
會曉畵圖佮寫詩
也會唱曲會搬戲
厝蹛鯉城浮橋邊

一个孤囝讀高二
彼日出門雲街邊
行到東門的M記
看見一儂掛金絲

歇佇路邊的柴椅
近前出聲就問伊
就問何方的人氏
倒佇即位創啥物

應講東山西埔里
當今凄慘身無錢
想來想去無路去
姑不而將睏路邊

本來泉州做生理
聽講東街有好機
一心好奇想卜試
無疑拄著佬騙欺

錢銀予伊諞諞去
無錢共我摔一邊
當今無鐳倒鄉里
看破路頂睏柴枝

講到目屎嘈嘈滴
較慘江青害少奇
五姊看伊儂古意
有心想卜幫贈伊

就問往過啥經紀
當今佇咧創啥物
應講各項會反變
會曉播畻會掠魚
有時織布兼拍鐵
也有寫字也寫詩
百般功夫捌不止
斷無臭彈佮哺舌

彼時泉視閩南語
有欠嘉賓佮主持
五姊舉薦伊就去
節目做去一兩期

盡展才情無比止
謗風講空兼哺舌
死龜講到變活鱉
烏糖秫米濫糝喋

尾手就轉漳南去
當今東山賣薰支
也有開店賣茶米
有時街路賣番薯

今日講古到遮止
另日有閒㱏講添
朋友聽了有趣味
予汝平安趁大錢

Tagged:

1 comment

  1. 痟婆仔 2017-09-05 at 22:21:33 Reply

    茫到毋知身啊汝!

發表迴響

你的電子郵件位址並不會被公開。 必要欄位標記為 *

*