虎咬死儂

虎咬死的彼个是湖北儂,過年後41歲。正月初二彼日,伊抴著牽手的佮兩个囡仔,摻一對翁仔姥做伙來到寧波雅戈爾動物園行遊。無毋著,伊真正是偷走票赸入去的。園內離𢙠第一近的正正是放虎佚陶的所在。彼个同伴的,拍算較小膽抑是按怎樣,毋敢入去,總是,即个事主,也著是路尾予虎咬死的張姓諸夫儂,入去囉。伊大概是看著一个全身包密密的飼養員拄好咧飼虎,虎看起來誠溫馴,乖乖咧食物。伊是盤過牆入去的,彼逝牆敢有四公尺懸,拍算虎卜盤過牆,若無啥物通堁骹,照講是無法度則著。著是對彼陣起,即个事主予遊客看著伊坫佇「放虎地」,有的較小膽的諸姥遊客看著即个儂雄雄出現佇遐,攏驚到用神魂四散去,開喙用吱的。總是,較濟遊客是卜想看即个儂到底入去遐乜事。放虎地,是一个塗洲,四箍圍仔有環一條水溝,大概佮農村鄉社的水溝略略仔卜平闊,毋知虎跳會過抑𣍐,橫直看起來闊闊,照講是不止安全著。講是塗洲,其實尾溜的所在有一小逝路仔佮對面的大片地相粘著,儂通倚牆路骹行過去。頂頭有講啊,即个事主,伊有看著薪勞咧飼虎,拍算嘛想卜倚去弄虎佚陶的款,著做伊行過去虎蹛的所在。彼个時陣,飼虎的儂則看著事主,著猛猛大聲噷喝,叫伊趕緊著走。因為關係性命安全,則姑不將對頭共伊嚷。

四面的遊客愈來愈濟,逐个計咧講嘐潲,放虎地哪會雄雄加一个無相干的儂佇咧,明明都是遊客無毋著。四箍圍的儂議論紛紛,儂聲插雜,有的驚到吱吱吼,飼虎的儂也直直大聲吼喝……眾儂相爭揭手機仔出來翕,一時幾若百支手機chha̍uh-chha̍uh-nih nih無離。敢是按呢,紲來擾吵著虎,致到虎生驚,略略仔卜起狂。起頭是有兩隻,一隻本然覆咧食物,紲雄雄吼一聲,彼个事主驚一趒,想卜走。虎嘛小可想卜徛起來,飼虎的看勢面,趕緊將一桗肉摕懸,蹛咧虎頭殼頂弄一下弄一下,那弄那勼退後,共虎siâⁿ過去。虎連鞭又佫覆落去食肉。

飼虎的看按呢,猛猛比手叫彼个事主趕緊著出去,四周圍的儂攏有較安心,想講好佳哉平安無事誌啊,因為看彼个事主已經行倒轉去對面岸啊,即个時陣,準做講虎卜咬伊,嘛著先跳過水溝則有法度。總是,事誌雄雄起變,致到儂攏看𣍐曉。無疑悟,彼个事主行到半中剸(poàⁿ-tiong-tn̂g),紲釘楬(tèng-khi̍t)釘佇遐,雙手佇身軀頂直直摸,直直抄,直直撏,又佫越頭看,敢若是咧揣啥物貨。後來知影是咧揣手機,為著一支紅米,伊失落性命。

伊看見手機交落(ka-la̍uh)佇內面,直透翻頭,卜衝入去抾。儂看伊衝過去,攏驚到吱吱吼,虎聽聲紲生射(chhiⁿ-cho̍h)!兩隻虎向伊行過去,伊停骹毋敢佫行進前,虎嘛停步佮伊相對相,對頭攏無振動。伊看虎無佫倚來,敢拍算動物園的虎無遐野,有略略仔較好膽淡薄,紲敢敢衝過去,手機抾起來,越頭做伊無khòa走。死啊,虎看伊走,紲胚性命jiok伊,眾儂驚到哀哀叫,嘩嘩滾,吱無離。彼个事主走無兩骹伐,毋知是軟骹抑是按怎,有絆一下,著跋倒佇塗骹。

虎直透chhîⁿ倚來咬伊的頭殼,即个時陣,濟濟儂開始用手機仔錄像,有的那錄那講解,梟行啊!了後的過程逐个佇網頂攏有看著啊。予虎pa-lōe,百面凄慘罪過,彼个儂有滾liòng幾若下,用手出力舂塗骹,後來𢙠姥囝來啊,工作人員直直安慰𢙠,總是攏無路用,哭到真凄慘,予儂看著艱苦心。特勤佮警察嘛來啊,有放炮、噴水、吼喝……攏無較𧾢。

咱目睭金金看著彼个儂予虎咬到血流血滴血獅獅,無偌久,便(mī)蟯蟯(ngiau)鋤頭柄,柴柴𣍐振動啊。有老大儂看到直直吼,直直流目屎。佫過無偌久,警察著開始疏散隔離,儂群攏拆四散去。此後的事誌,逐个攏知影啊,願死者安歇!儂已經死了,逐个毋通佫相責備,出即號事誌嶄然驚動儂的心。虎嘛真可憐,啞口精牲𣍐曉得儂的事,予儂開十外仔外銃來冤枉死。唉,梟行,凄慘!

Tagged:

發表迴響

你的電子郵件位址並不會被公開。 必要欄位標記為 *

*