外洋漁工的故事(7~8)

第七章 有影是賊船都著!

「分葡萄啊,分葡萄啊……有儂有份……卜食,骹手著愛猛掠(mé-lia̍h);慢鈍,食無份啊……」二火佇船頭大聲嚷,勿會輸ná咧拍拳賣糊藥。Chiah-ê葡萄是taⁿ-á按路易港買轉來的。

餐廳ni̍h,儂圍烏烏,teh等船長佮二火分葡萄。講是講卜分,船長也無照儂頭,數个仔(siàu-ê-á)算口份(kháu-hūn),見面(kìⁿ-bīn)著用hìⁿ的、用iā的,四散tàn,四散ka̍k,也毋管待汝承(sîn)有抑承無,當做ná咧iā豬仔飼料。葡萄iā kah散(soàⁿ)la̍k-la̍k,落(lak)kah規塗跤,滿四界kauh-kauh-lìn。足濟船員相爭搶、相爭khioh。林達無去 khioh,趙恆通本然想卜去khioh,予陳二兵擋牢(tòng- -tiâu)。

「咱散(sàn)是散,ah毋過,勿會使無志氣!汝看彼敢有kā儂當(tòng)儂teh看待,飼頭牲(thâu-seⁿ)毋chiah按呢!」陳二兵真受氣。
越南儂陳文揚嘛無趁儂去khioh,伊gīn神chhoh一句,「幹!台灣儂正經是鬼,毋是儂!」
大陸船員逐个攏真鬱chut,圍圍佇陳二兵佮向增壽in房間ni̍h議論。

陳二兵略仔gīn-gīn,伊講,「阮囝細漢的時陣,真枵鬼,看儂厝邊囡仔teh食啥,伊也teh起giàn,著綴去卜kâng討。我kā拖倒去教示,愛食soah勿會曉轉來厝ni̍h講是毋?儂散(sàn)勿會要緊,斷斷(toàn-toàn)勿會使無志氣。」
趙恆通隨綴喙(toè-chhùi)講,「是啊,斷(toàn)勿會使卸敗(sià-pāi)咱大陸儂的面底皮,予儂看衰siâu……看hiah-ê番仔,chhê蹛塗骹ni̍h下命搶,有影卸世卸眾(sià-sì sià-chèng)。」
林達講,「kán-ná捌聽hiah-ê外國儂講in的薪水佫比咱較少。in講,印尼的一月日chiah百五箍美金niā,比咱少一半較加。Ah若菲律賓的、尼泊爾的卻(khiok)有較加淡薄,總是,嘛無超過兩百箍美金……越南的著有影tih-beh kiau咱平濟啊,一月日普遍有法通摕著三百箍美金,有經驗的老船員soah有通領kah 三百五著。」
陳二兵問一句,「汝soah問kah hiah清楚……看勢,會捌寡英語,kiau儂交接的確是有較利便啦。是講,ahin有kā汝問無?」
「有啊,in嘛有問我。」
「Ah汝有講無?」
「有啊,彼日,彼个印尼的路D問我,我kā伊講我一月日是350箍美金。」
陳二兵聽了soah鬼幹著,臨當時起呸面(khí-phùi-bīn),「汝即箍khám囝哩啊!幹恁娘,汝kiau hiah-ê死番仔講咱薪水偌濟卜含膦hèⁿ?汝講inkiau咱平平做kāng一號空課,結果咱領比in較濟,in敢勿會目孔刺(ba̍k- kháng-chhiah)?敢勿會kā咱怨妒,kā咱gīn膦?」
「這我有影無疑悟(bô-gî-gō·)。」
「汝有影書呆(chu-tāi)to̍h著!」陳二兵se̍h-se̍h唸,「…毋過,hiah-ê番仔講起來嘛不止可憐,尤其是hiah-ê印尼、菲律賓的,咱即逝(choā)若是按阿根廷駛倒去台灣擱港(koa-káng),咱大陸船工著會當the咧歇睏、看電視啊,ahin著無通hiah快活,in照原著佫去卸貨,做這做彼,加做足濟的。」
向增壽插喙應講,「也無通teh偌快活啦,蹛彼个死儂所在,連眠床、被席也無,攏著家己紥。號名講有電視,幾若十个chiah看一台,kan-na 相爭,著活hut死啊。佫再講,彼全全也無自由,行到佗落,都也(to-ā)hông監視著,暝日佫有倩保安仔來咧顧場,講一句較歹聽的,彼(he)號做軟禁啦。」
「哪會按呢啦?」韋東石問。
「拍算因為兩爿猶佫teh對立。台灣政府彼爿,不時佫teh煩惱有共匪仔siáⁿ-mi̍h-ê……」林達解說(kái-soeh)予伊聽。
……
船駛離開路易港了後,又佫過幾若日,有一日林達拄好teh睏中晝,黃家文kā伊叫精神,「有聽見的無?韋東石講伊紙字hong剪去。」
「啊?哪會按呢啦?」
「昨暗的代誌啊,東石敢無kā汝講?」
「無啊。Ah是hông賺食(choán-chia̍h)偌濟去啦?」
「千四外,人民幣。」
……
林達、黃家文、韋東石,三儂做伴坐佇船尾。

「東石,汝錢下(hē)佇佗位?哪會hiah無細膩啦?」林達問伊。
「Soeh佇枕頭下(ē)niā,敢(káⁿ)會知卜無去?」
黃家文講,「汝著是傷荏爛(lám-noā),物件攏勿會跟扎(kin-chat),較加嘛會無去。」
林達問伊,「ah汝有kiau船頂管事的講無?」
「有kā船長講過啊,伊講明仔日卜予我一个講法。我真正足棘心(kek-sim)的,準若(chún-nā)是我家己的錢,無去著煞啊,ah毋過 hiah-ê錢是我卜出門的時陣阮阿母予我的,是卜予我緊急的時陣通用的。阮阿母伊是艱苦儂,伊無頭路,卜儉chiah-ê錢伊著愛拖幾年汝敢知!彼攏血汗仔錢汝敢知!」
……
又佫過三日,下晡時空課無閒煞,二火kā逐个儂叫叫做夥。

二火一支面仔烏暗暗,伊講,「昨暝!無毋著,昨暝,印尼儂卡林的手機仔予儂挲(so)去。」講煞,伊的雙目,著親像ná電火仔,對著在場所有的儂曜(chhiō)迵迵(thàng)。「我幹恁娘!聽候(thèng-hāu)儂著班的時陣,kā儂的皮箱撬(kiāu)開!真正無天良!」

卡林因為傷過頭傷心,soah佇邊仔用手衤宛(chhiú-ńg)ná咧拭目屎。即个印尼的少年家,看伊生做按呢矮頓頓(é-tǹg-tǹg),四壯(sì-chàng)四壯,武腯(bú-tún)武腯,哭著soah kán-ná諸姥嬰仔咧。

眾儂chhi̍h-chhi̍h-chhu̍h-chhu̍h。二火soà落去佫講,「taⁿ即个毋成賊若是家己主動徛出來,從輕發落,ah 若無,毋通怪我雄心毒手!時到,m̄-tān-nā恁父勿會放伊煞,船頂逐个儂都(to)會使隨時kā掠起來電!幹恁娘,像即號死賊仔,拍死公道的!若予恁父chang著,免講是工錢啦,半針錢、半角銀都(to)勿會予伊!」

卡林徛佇邊仔,目屎poé勿會離。

「恁娘咧!恁父嘛看勿會做得,」二火tiuⁿ kah kán-ná真勿會克得(bē-khat- -tit)的款勢,「儂按呢歹命叮噹(pháiⁿ-miā-tin-tang)、拚死拚活、儉腸neh肚,真無簡單chiah開兩百五佇台灣買一支手機仔……儂月月工錢嘛chiah百五箍美金soah……幹恁娘老膣屄(chi-bai),彼个偷摕物件的術仔,汝是豬抑是狗?!婊仔生的,giàn物件 soah勿會曉家己去買,的確著賺食(choán-chia̍h)別儂的hio·h?!我咧幹恁娘,愈講愈thàng火,愈講愈tu̍h膦!」

眾儂tiām-sut-sut,看伊愈講soah愈歃勢(sahⁿ-sè),逐个攏毋敢做聲。

自頭到尾,攏二火一儂佇咧haiⁿ佮sai,siak-sau 而五tńg,眾儂攏tiām-tiām聽伊咧ka̍uh-kua̍h唸,當做敢(káⁿ)和尚咧唸經抑是司公咧唸誑(liām-kōng)。伊幹kah強卜無力,chiah kā儂解散去。
……
林達kiau黃家文hām韋東石,三个儂又佫相招來佇船尾,講心內話。

韋東石問講,「二火講若掠著彼个賊,著毋發薪水予伊,彼敢有影?」
「呸!」黃家文soah呸臭瀾,「彼箍死磅燈(pōng-teng),不過是二火niā,伊soah有資格扣儂的工錢?伊無彼个權啦,伊都(to)毋是船頭家抑是船長koh!」
「恁講,二火佇hia講hiah濟,講hiah久,hiah-ê外國船員敢聽有?」林達講,「頭拄chiah,吉莉講伊聽無,叫我翻譯予伊聽。」
「幹!」黃家文佫chhoh一句,「kan-na咱六个大陸儂聽有niâ,賰的hiah-ê外國儂,鬼會知影伊是咧吠啥siâu。我看伊是teh「koāⁿ籃仔假燒金,放屁安狗心」,假好衰。」
林達問韋東石,「東石啊,船長彼日毋是講卜予汝一个講法,路尾咧?」
韋東石應講,「soah無下落(hē-lo̍h)。」
林達講,「我真正想無neh,是按怎船長kiau二火in毋數个仔(siàu-ê-á)搜(chhiau)?通(thong)儂物件搜一遍看māi,按呢毋著(to̍h)直啊?!」
韋東石應講,「無較choa̍h啦,船hiah大隻,四界空仔縫hiah-ni̍h濟通搢(chìⁿ)通挹(iap),chhìn-chhái chhàng一位仔,予汝揣kah蹺去嘛無tè揣。賊仔都(to)無咧戇(gōng),伊soah勿會曉聽候(thèng-hāu)風火頭(hong- hoé-thâu)過chiah kā物件khioh轉去收?!」
「就使(chiū-sú)是按呢,搜一下嘛毋是講全全無效啦。」林達講,「恁kā想看māi咧,有儂查佮無儂查,彼是完全無kāng款,上無嘛會當警戒彼个死賊仔,予伊毋敢hiah chhàng鬚!東石,汝彼日錢hông iam去,二火若會曉通去搜一下,我看昨昏卡林的手機仔kiám-chhái嘛勿會pháng見!」
韋東石氣kah咬喙齒根,「ah船頂毋是講有安監控?哪會soah掠勿會著賊仔啦?」
「無效啦,」林達應講,「我聽向增壽講,船頂的監控,彼是咧監督咱做工,毋是當(tng)賊仔啦。Taⁿ都(to)猶未到作業區著,監控卜thài-thó有開啦?」
「唉,」黃家文哼(haiⁿ)一聲,「凡在(hoân-chāi)佮in也無底代,也毋是in的手機仔、in的錢hông賺食去!」
……
第二日食早頓的時陣,林達看著二火按灶骹hia行過,著kā伊喝(hoah),「二火!我有一个建議。」
「啥貨啦?」
「我建議咱會使kā所有船員的行李、皮箱,通通hiau出來搜,hoān-sè會當kā彼个賊仔jîm出來。」
「佮汝當無底代啦,汝免咧家婆,勿會仙假仙,牛膦假鹿鞭。」二火勿會giàn插siâu伊。
「我拄上船第二日,一雙新的運動鞋著隨無去啊,taⁿ拍算hông賺食去啊較濟,ANTA的neh,值百外箍著!」
「啊…知啦知啦知啦……」二火做伊斡咧,著卜走。
林達sī-soā佫講,「咱若來kā透搜一下,上無,彼个賊仔嘛毋敢hiah-ni̍h hiau-pai,偷摕kah hiah有痕逝(hûn-choā)!」
「無汝是teh教恁父按怎做二火是毋?我teh幹恁娘毋成囝,hiah厚話卜貪膦(kâm-lān)hio·h…」二火見笑轉受氣,頓(tǹg)椅頓桌,使性la̍k地,一路行,一路chhoh。
趙恆通佇邊頭看著,苦勸林達講,「林達,汝今仔無應該講chiah-ê話,昨暗我著班的彼陣,拄好聽著船長叫二火去咧haiⁿ、sai,毋好講(m̄-hó-kóng)無趕緊kā著賊偷即層代誌處理好勢。」
……
頂晡洗笨面(pūn-bīn),林達舞kah喙焦喉渴(chhùi-ta âu-khoah),想講卜去啉寡水止喙焦。伊勿會慣勢kiau別儂公家用一塊(te)碗啉水,著斡倒去房間ni̍h啉。拄摕齒kóng仔想卜舀水 niā,「phia̍k!」頭殼後甌(āu-au)臨當時(liâm-tong-sî)soah予儂出力pa一下。

林達掣(chhoah)一下,sī-soā越頭,是二火。「幹恁娘!做空課毋做空課,偷赸(soan)來宿舍ni̍h創啥siâu啦?汝是孝呆抑是半腦,做工的時陣勿會使入房間汝毋捌是無?……按怎?看啥膦鳥啦!佫看,恁父著佫kā汝sai落去……緊kā恁父死出去啦!幹恁娘,乞食胚,空課毋做,tèⁿ屎tèⁿ尿……」
……
下晡卜做的空課,著是愛kā水槽下的空縫,用網仔綻(tān)起來,按呢,鰇魚仔chiah勿會ùi下底的空縫nǹg入去,徛算講卜清網的時陣,通較省時間,嘛較免hiah厚工啦。

是講,林達伊都(to)毋捌teh補網仔,佇厝ni̍h連針線嘛毋捌摸著,taⁿ一時soah做無路來,kan-na是看著邊頭盧文倩teh綻,ná看ná學綻。

「林達!」二火土公仔性(thó·-kong-á-sèng)佫giâ起來啊。
林達一轉身(tńg-sin),無疑悟(bô-gî-gō·)一拳隨摳過來,拄好chhāi佇正爿鬢邊ni̍h。
「我咧幹恁娘!儂咧做空課,ah汝soah咧看爽!恁né膣屄(chi-bai),汝想講(siūⁿ-kóng)汝siáng啦,監工hio·h?」
林達嘛規腹火,指(kí)著二火的鼻仔,大聲應伊講,「喂,汝較差不多的喔!拄好著好,毋通傷過neh!好膽汝佫kā我磕(kha̍p)一下,我斷(toàn)無佮汝客氣!我kā汝講,阮來做工的,毋是來做肉砧的!」
「好啊,汝有才調,算汝雄!!幹恁娘,總有一工恁父會佮汝做一下算!」
林達漢草好、朋友弟兄濟,從(chêng)早佇社會盤noá,雖然勿會使講是一等一的腳數(kioh-siàu),毋過,自來攏是伊偏儂(phiⁿ- -lâng)較濟,罕得予儂偏,像按呢hông拍佫無還(hâiⁿ),徛算自十三歲來是頭一擺。敢真正應驗著彼句話「chhio-tiô無落魄的久」?
……
佇陳二兵、向增壽的房間ni̍h,林達講起今仔日的代誌。
「駛恁娘!下擺伊若佫敢起骹動手,我必定拍kah予伊做狗爬!」林達一腹火猶未消。
趙恆通綴喙(toè-chhùi)講,「二火算一箍膦,免懾(liap)伊!」
陳二兵嘛無通好看面,伊kán-ná真為林達,伊講「我較早走船,嘛捌拄著siâng恁福建的,嘛是無啥會曉做代誌,台灣的二火嘛看伊真無,磕勿會著(kha̍p-bē-tio̍h)嘛是haiⁿ、sai、拍、罵。有一擺,彼个福建儂忍真正勿會牢(lún-bē-tiâu)啊…彼當陣拄佇北海道 teh掠sam-bah魚,魚真厚,規圞个(kui-nn̂g-ê)笨面chiâu-chiâu魚,堆kah ná山咧。二火先出手拍儂,恁彼个福建同鄉嘛無通著伊,兩个儂自按呢佇魚堆仔(hi-tu-á)teh對削(tùi-siah),出手攏無留情,攏有夠殘的!到尾仔,相拍雞無雞髻(ke-koè),平平傷kah一身chàng-chàng。彼个福建嘛毋是荏腳數(lám-kioh-siàu),一支手kā 二火兩粒鹵卵tēⁿ牢牢(tiâu-tiâu),拍死都(to)毋願放。哈~哈~哈!」
黃家文問講,「尾仔彼个儂有食罰無?連二火也敢拍。」
「食罰是無啦,尾仔兩个攏著傷,平平the兩三日著佫peh起來做空課囉。」陳二兵應話。
林達手tēⁿ拳頭拇,tēⁿ kah指頭仔目「ta̍uh-ta̍uh叫」。
趙恆通嘛佇邊仔hiahⁿ柴添火著,「驚啥siâu,另日咱卜落船,無電一个予伊金爍爍(kim-sih-sih)看卜按怎!」
「汝mài聽inteh烏白吐。」向增壽反轉(hoán-tńg)破嘴讒(phoà-chhùi-châm),「我聽講有足濟船長為著防海賊抑是下骹手儂造反,攏有稸(hak)銃啦、電棍啦啥死儂……有的佫有飼狗來teh嚇驚(heh-kiaⁿ)下骹手儂。」
陳二兵隨kā向增壽gîn,一支面歹衝衝(pháiⁿ-chhèng-chhèng)。
向增壽soà落去佫講,「前,我嘛有聽儂講過,講有一个大陆船工,kán-ná河南抑是佗落的,定定hông罵hông打揲(táⁿ-tia̍p),尾仔掠狂(lia̍h-kông)起造反。」
黃家文問,「ah路尾咧?」
「路尾刣死二火,佫kā船長拍kah著重傷,家己畏罪跳海,去揣東海龍王招做附馬爺。」
「是按怎卜跳海啦?」黃家文佫問。
「我嘛毋知。」
林達無張弛插(chhah)一句,「恆通,彼本《包法利夫人》汝看了未?無我先摕倒來看,我看猶未了咧。」
「彼本喔,向增壽早著摕倒轉去啊,真正是鱷仔頭(kho̍k-á-thâu),有夠凍霜的,儂我拄chiah開始看niā。」
向增壽kek默默(hm̍h-hm̍h)。
……
林達轉去到家己的宿舍,一時規頭殼挐氅氅(jû-chhiáng-chhiáng),房間的壁牆soah勿會輸ná監牢(kaⁿ-lô)咧,鬱 kah強卜勿會喘氣。林達知影向增壽講的無毋著,佇岸頂惹禍猶佫會使覕坫海ni̍h,ah若海ni̍h佫惹禍看卜覕去佗落?況兼(hóng-kiam)此後猶佫誠濟代誌未做著!在林達拍算,吞忍(thun-lún)khiám-chhái比使性(sái-sèng),比報冤,佫較著勇氣!「長恨此身非我有,何時忘卻營營」,彼着ná親像歌詞teh寫講「人生像海水,好歹目一nih;凡事著愛想較開,bái-bái- -á嘛是思相枝」,儂的身軀,儂的心kah-nā毋是家己的啊,計較是卜創啥物?
林達真正感慨,頭殼內浮出一首詩:

籠中鳥

四邊箍鐵枝
怨慼心頭生
風吹花芳味
心清恨自除
……
目nih,liâm-mi soah 1月25號囉。Ê暗時仔,向增壽來揣林達kiau黃家文坐,「今仔日我著班,一台移動EVD soah hông撬去。」
「啊?有影即號代誌?鬼拍著!落昨日(lò-cho̍h- -ji̍t)我一床新枕頭、新床墊嘛hông偷換了了……一粒喙鬚摳仔嘛毋知底時無去,我上船到taⁿ chiah拄用過一擺niā……衫褲nê佇巷路ni̍h嘛直直無無去。」林達嘛haiⁿ kah pûn狗螺。
「恁母較好,有影是賊仔船!」黃家文嘛gīn膦kah。
向增壽一支面憂攝攝(iu-liap-liap)、苦teh-teh,「我卜上船彼陣chiah佇成都買的,開600外箍著,嘛用無幾過。下晡彼个煮食的阿海仔chiah咧講百五箍卜kā我褪(thǹg),我佫kā講聽候(thèng-hāu)過幾日仔,船若駛到tè chiah褪伊。想勿會到soah現無去……
林達問伊,「汝有kā船長in講無?」
「講了啊,唉……」
……
「幹恁娘!」林達又佫聽著船長咧幹kiāu詈(lé),「前是手機、現金,taⁿ是錄像機。恁父走船走四十外年,從來(chêng-lâi)毋捌拄著即號賊仔船!」
講ná講,路尾照原嘛是無儂poé-hoē,真正是「過手,無liú-liú」。
……
1月27號食暗頓的時陣,二火氣掣掣(khì-chhoah-chhoah)衝入來餐廳ni̍h,對著眾船工大聲嚷喉,「幹恁娘!頂擺恁父好心好意,專工chhoân彼號「刺激的」予恁chiah-ê毋成儂過目睭giàn,幹恁娘!乞食神!也卜食、也卜掠!攏kā恁父聽予清楚,hiah-ê影碟片是siáng kā恁父暗槓(àm-kàng)去?幹恁娘!Siáng摕去緊kā恁父摕出來,ah若無,小等一下恁父一个一个搜,予恁父chang著,伊著衰siâu,恁父若無kā伊tàn落去海底飼鯊魚,今仔日字姓予汝倒頭寫!毋相信chiah試看māi咧!」

足濟船工攏驚kah sih-sih-chhoah、heh-heh-tiō,食一頓飯也勿會安然。二火taⁿ-á卜搜的時陣,越南儂盧文倩kā影碟片摕出來,講是二車摕去看,看了勿會記咧講。

第八章 到討掠目的地

1月29日頂晡,眾漁工攏佇三笨(saⁿ-pūn)ni̍h咧做空課,船teh卜到討掠目的地啊,taⁿ徛算最後一擺做準備空課。二火咧喝(hoah),「彼个…號做…陳二兵啊,來來來…汝來汝來…彼爿hia卜排鰇魚籠仔,汝會捌漢字,汝摕寡漆,一格一格去kā畫畫分分咧,siūⁿ-soà 佫kā記號做予好勢。我kā汝講,大、細尾著愛照規格分開,ùi頭到(thâu-kàu)一直到kah尾後,汝照順序寫:無夠180克的,平箱;180-200克,54尾;200-300克,48尾;300-400克,36尾;較重400克的,平箱。按呢聽有無……」

免liâm-mi-á工,陳二兵著畫好、寫好啊,伊hia-pai kah卜死,攲頭斜目(khi-thâu chhiâ-ba̍k)看著在場hiah-ê外籍的老船員,大曳溜溜( tāi-ia̍t-liu-liu),勿會輸伊kán-ná偌gâu偌出腳(chhut-kioh)的款,「汝看,我會曉漢字,ah恁敢會?」

了後著是分班分組,規定啥物儂做日時(ji̍t- -sî),啥物儂操暝工;啥物儂蹛正爿船做,啥物儂蹛倒爿船做。佫規定講,漁工kiau漁工勿會使家己主意相替換工位。陳二兵kiau趙恆通兩兄弟仔分著日時;向增壽、林達、黃家文、韋東石攏分著暝工。
……
29號下晡,二火來分手束、防凍衣、鞋仔、帽仔chiah-ê物件。手束有幾若種,khioh魚仔卜掛的薄塑膠手束一儂三副;入大倉卜掛的羊毛手束一儂兩副、厚塑膠手束一儂一副;冷凍室卜掛的棉仔手束一儂一副。防凍衣是厚棉裘(mî-hiû)做的,一儂兩軀(su),除去一半个仔管事,賰的儂差不多攏分着舊的較濟,毋是破kah一空一隙(khià),著是規領補kah花巴哩貓。帽仔,一儂分一頂皮仔帽,一頂氈帽(chiⁿ-bō),佮一頂歹料的吐舌仔帽(thó·-chi̍h-á-bō)。鞋仔,一儂一雙長桶的塑膠雨鞋,一雙防凍鞋。防凍鞋,徛算入大倉佮冷凍室卜穿的,嘛是就長桶的塑膠鞋,內底加窒(that)一寡棉仔、布仔soah,真重。

「喲,林達,汝即防凍衣bē bái neh!」陳二兵對面行過來,「我即領kiau汝換,看卜毋?」
「二兵兄啊,ah汝嘛無kài硬直neh。汝彼領都(to)有影較輸我即領。」
「唉啊,這防凍衣攏sio-siâng啦,ah汝毋是兩領著?其實ho·ⁿ3,一領著有夠啊啦。Ah逐个都也(to-ā)攏同鄉著毋著,好啦好啦,換一下啦,ho·ⁿ?」
「哦…好啦好啦,卜換著換啦。」林達手摕彼領拄換來的防凍衣,「嚶(èⁿ),ah哪會無脫鍊(thoah-liān)啦?」
「無脫鍊哪有要緊啦,逐个攏嘛無。汝看邊仔hiah-ê番仔,幾个有脫鍊的?Ah汝都也(to-ā)有兩領著,無較choa̍h啦。」
「啊…chhìn-chhái chhìn-chhái啊,管siau伊啊!」
……
2月1號,船chiah到目的地,也著是位佇阿根廷附近的海區,此後攏卜蹛佇chia討掠。四箍liàn轉,早著足濟鰇魚船佇咧,林達小可kā點咧,敢(káⁿ)有一兩百隻著!鰇魚船,計有安彼號兩三千光(千光:KW)的探照燈,ùi船頭到船尾,間(kàiⁿ)無偌遠,著有安一葩。即號燈,暝時(mê- -sî)重倍光,勿會輸ná日時咧!

掠鰇魚,毋免魚餌(hî-jī)。船頂計是用機釣鉤。即號鉤仔,看著親像ná細尾鰇魚仔,尾溜hia有規排一齒一齒的小鉤,著kán-ná鰇魚的鬚。中央即段各種色緻的攏chiâu有,徛算是軟塑kiau硬塑去做的。鉤仔,在佇海ni̍h看著光豔豔,真gâu餳(siâⁿ)鰇魚。釣鉤是用玻璃絲一个一个串(chhǹg)起來,了後chiah佫銜(khâⁿ)佇咧釣機的鋼絲索ni̍h。一隻釣機兩爿各安一副釣鉤,按呢攏總敢(káⁿ)有釣鉤40副,抑是80副- -著。魚線,上短的嘛有成百公尺,長的有三百尺公尺長。不而過,實際上鰇魚較濟是予彼(he)燈光餳來到水面ni̍h,到kah透早天卜光chiah沉底落去。

鰇魚機計計是(kè-kè-sī)日本進口的。在佇鰇魚機船頭兩爿攏有安彼號網台,網台是用鋼絲去繃(piⁿ)的,網台頂懸(téng-koân)有安吊猴。魚線有纏蹛吊猴ni̍h,尾溜彼頭chiah放落去海ni̍h。魚線頂頭有鬥(tàu)一粒kán-ná稱錘的物件,毋是真重,彼是「鉛墜」,船頂攏kā號做「阿膜呢」。鰇魚若釣上來了後,較濟計是落(lak)佇網台頂,有小部分會直透跋落水槽抑者是笨面(pūn-bīn)ni̍h。漁工著用鉤仔kā鰇魚鉤入水槽ni̍h,水槽內會使放水,按呢鰇魚著予水直直衝去到下笨面hia指定的所在。

因為魚線hām鉤子有兩三百公尺hiah-ni̍h長,若犯風(hoān-hong)抑是無細膩,會真愛相纏着、相phoa̍h着,會拍結虯(phah-kat-kiû)。若拄著即號情況,漁工著愛徛蹛網台頂,去tháu鐐筘。即號空課,對漁工來講,硬硬是食技術的,骹手著伶俐(léng-lī),愛著猛掠(mé-lia̍h)佫熟手,chiah賺食伊會倒。新鳥仔攏做無路,定定會予魚鉤仔鉤破手。因為三不五時著上網台,所以船員攏總著穿雨鞋。

「林達,ah汝哪會毋戴帽仔?」講話的儂是大車,「即號燈幾若千光的,足釘毒(tèng-to̍k)的,毋拄好,面chiàⁿ都(to)會hiauh殼!」
「喲,有影喺(hèⁿ)?多謝啦。」林達趕緊摕吐舌仔帽戴(tì)起去,心內咧想,看看咧,猶是大車較好。
向增壽嘛kā伊講,「這帽仔若戴咧,有好無bái啦。無,過兩日仔,汝著知影講即號燈有偌毒!」
「增壽兄,若做空課我kui-khì綴汝骹脊(kha-chiah)後,按呢嘛通加學一寡。」
「好啊。」
不而過chiah無liâm-mi-á久,三火阮文雄著過來咧喝,「林達,二火叫汝去船頭第三位的hia做。」
……
2月2號kiau發春101號會船。101號的船頭,會6號的船尾,中央牽一條索仔,一tè跳枋(thiàu-pang)用漁網仔包著,khoà佇兩隻船中間,予儂來去teh搬物件。船長嘛走來船尾佮101號的船長開講。

6號的分一寡油予101號的,101號的chhoân一寡魚仔來予6號的船長普度漲白虎(phó·-tō· tiàng-pe̍h-hó·)。6號的有兩个越南船員卜轉(choán)過去101號的做空課,先kāin的行李搬過去,路尾儂chiah過去。

林達問向增壽,「即兩个船員過去101號的,in行李敢會檢查?咱船ni̍h毋是phàng見足濟物件的?」
「無啦。二火hiah無閒,哪有閒工通插chiah-ê……ah汝是phàng見運動鞋,我是EVD,橫直也毋是伊咧phàng見物件,伊thài會卜插siâu汝!」
林達雄雄soah聽著101號hia有諸姥teh講話,著問向增壽,「增壽兄,ah船頂soah有諸姥哦?我聽咱船長叫伊阿金neh!」
「汝目睭擘予金啦!彼个ta-po·的啦,聲較尖niā,毋是諸姥的啦。無汝是有近視喺(hèⁿ)?」
「嗯,小可(sió-khoá)。」
無liâm-mi仔,向增壽嘛看見101號的hia有一个四川的同鄉,伊歡喜kah,大聲用四川話kiau對方相借問。船長聽kah勿會克得(bē-khat- -tit),出喙kā向增壽喝(hoah),「向增壽啊,ah汝是咧講啥死儂四川仔土話啦?歹聽kah卜死!Siáng聽有汝咧講啥啦?卜講,聽候(thèng-hāu)空課做煞chiah 沓沓仔(ta̍uh-ta̍uh-á)去講。」船長嚷煞,繼續用閩南話kiau對方的船長練牙。

兩个越南船員卜過去101號囉,船長臨當時(liâm-tong-sî)暢(thiòng)kah,「哈哈,阮文雄,予in兩个過水一下。」過水,意思是kā儂lok落去海ni̍h chiah佫hô·起來。三火佇船頂giú索,船長講啥,伊攏照做kah到。可憐代,兩个越南船員著kán-ná淋雉雞(lâm-thī-ke)咧,liâm-mi規身浸kah tâm糊糊。船長看in彼號形的,soah笑kah目屎強卜滴落來。也莫怪(bo̍h-koài)伊會按呢啦,船頂正實(chiaⁿ-si̍t)無啥物通好娛樂,真無簡單chiah予伊向(ǹg)著即號好機會。

無偌久,會船會煞啊,110號的嘛kiau六號的相告辭,向增壽終規(chiong-kui)勿會當kiau同鄉加講幾句仔話。
……
2月3號。上工(chiūⁿ-kang)鐘仔tân啊,林達來到機艙卜hiahⁿ防凍衣,一時soah揣無褲!Phàng見的是彼條較新的褲,彼條較無補過,嘛有加較厚淡薄。姑不而將,看破佫穿彼條較破較漚(àu)的去出工,看著soah勿會輸ná乞食咧。林達去揣二火講,「二火,我一軀(su)防凍衣,soah無去一條褲,穩當予死賊仔偷hiahⁿ去!」
二火連影(iáⁿ)嘛毋愛影伊,「我無咧管即號代誌,緊去做空課!!」
……
林達徛佇船頭第三位ni̍h,骹底略略仔蹐(chhip)咧,感覺加真礙瘧(gāi-gio̍h),伊kā邊頭黃家文講,「喔,足艱苦的!雨鞋傷細,soah無法度穿襪仔。」
「鞋傷細,去揣儂換- -kong…」
「有問足濟儂的,攏無愛佮我換,攏推(the)講天氣冷,著穿厚襪,講啥物鞋仔較大雙咧,較好穿襪。唉……」
「無汝去揣二火- -kong…」
「我無kiau伊講,無較choa̍h啦!今仔日一條防凍的褲hông偷摕去,去kiau伊講,伊講伊無咧插。」
……
鰇魚nā掠了有夠彼个額數(gia̍h-sò·),二火著安排眾儂來「排魚」。排魚,著是卜kā鰇魚排蹛咧鐵皮箱內底。鐵皮箱仔是開口的,長大概一尺,寬七寸,懸兩寸。排,著按照一定的額數佮順序排予好勢。較有經驗的老船工著負責「khioh魚」,khioh魚,著是按照規格分開khioh,一號 khioh一位,較濟是照經驗按重聲(tāng-siaⁿ)來khioh來khêng,重聲量其約仔(liōng-kî-iok-á)平重的chiah 排蹛咧siâng一奇(kha)鐵皮箱內底。

林達佮菲律賓儂吉莉hông安排去咧「疊(thia̍p)魚」。疊魚,著是講,儂排魚排好了後,一棧(chàn)一棧kā魚箱仔疊懸。一棧排十奇箱仔,下底棧疊好,面頂先koè兩tè柴枋,頂頭棧chiah佫疊起去。較濟是疊十棧,風湧若較大疊七棧。疊,著齊整(chê-cháⁿ),若無kiám- chhái倒倒落來,按呢代誌穩大條。疊魚,毋是好差事(chhe-sū),林達聽向增壽講船頂無儂愛做即號空課。林達kiau吉莉有分工,吉莉疊180 克以下的,ah若200~300克、180~200克即兩號攏林達的額。2月的時陣,鰇魚猶較細尾,大尾的較少,此去,著會ná大尾,到kah路尾,換大尾的較濟,細尾的較少。

魚箱若疊了有夠濟,抑是疊了後時間有較久啊,著愛sak入去冷凍,較勿會魚仔臭去、變質去。凍魚,著是卜kā下笨面的魚箱搬起去板車頂,chiah 佫推(tu)入去冷凍室ni̍h冷凍。下笨面的漁工負責kā魚箱giâ來冷凍室門喙口,機艙部的漁工負責kā魚箱搬入去凍結室內底,siūⁿ-soà排好勢。凍結室內的溫度真下(kē),teh-beh到零度啊,無穿防凍衣、防凍鞋,決斷(koat-toàn)擋勿會牢(tòng-bē-tiâu)。無像 teh排魚的時陣,溫度較無hiah下,為著保證工作速度,無允准穿防凍衣。)

佇冷凍室ni̍h凍咧一工的魚,暗時著會使「出魚」囉。出魚,著是卜kā魚箱搬倒轉去下笨面hia,chiah佫按下笨面轉(choán)落去佫較下底的「大倉」。大倉是船頂第一大的冷藏室,溫度略仔並(phēng)冷凍室較懸。若卜講,冷凍室可比是咱佇厝ni̍h咧用的彼號冰櫥的速凍櫃,ah大倉著通講是冷藏櫃。
……
林達hām吉莉兩个搬無歇,舞kah汗水chhap-chhap滴。魚箱仔自塗骹ni̍h卜搬去疊,著愛佫giâ一節(chat)仔遠,一奇魚箱二三十斤重,疊魚有影真食力,莫怪向增壽講老船工攏無儂愛做即號空課。彼(he)全全無像teh排魚,排魚佫較按怎艱苦,上加是跍著(khû- -tio̍h)較艱苦niā,事實無啥使(sái)動著力。排魚講究排齊整佫緊。

下笨面,一庀仔懸niā,狹覕覕(e̍h-bih-bih),敢(káⁿ)soah無夠一公尺八著!林達183公分,做空課身軀著愛鬱(ut)咧,真勿會慣勢。上艱苦,頭giâ勿會直,規ê-hng kho̍k kah烏頭面腫、mi-mi-mauh-mauh。看勢,生做傷軂(lò)嘛無全贏的。

林達teh搬魚的時陣,看著二火對骹脊後kā印尼儂路D一骹chàm去匍(phih)咧魚堆(tu)仔,「幹恁娘!Kā汝千交代萬交代,叫汝毋通坐蹛魚箱仔頂,汝是臭耳聾(chhàu-hī-lâng)毋?勿會hiáng跍毋?汝豬hio·h!看汝佫敢坐毋敢!」
翻頭佫捎(sa)一奇鐵皮箱對著另外一个印尼儂卡林phiaⁿ去,拄好著頭額(thâu-hia̍h),「幹恁娘!排魚排hiah慢,汝是豬毋!幹恁娘,號名講予汝走過半年船,了然!相卸hō·-niā!」
「逐个骹手較緊咧!有聽著無!!」嚷煞,又佫捎著兩尾鰇魚,一手一尾ko̍k蹛咧彼爿khioh魚的越南儂黎德山佮楊文效的面ni̍h。楊文效taⁿ-á十八、九歲soah,猶佫囡仔身囡仔身,小可予儂使性(sái-sèng),目屎隨lìn落來。二火chhoh-kàn-la̍k- kiāu,鬼拍無著,「khioh魚嘛愛較緊咧!毋通tèⁿ痟,目睭咧無漿ám!恁父目睭足利的,恁若烏白khioh,恁父現看著知!」
楊文效嘛是機艙的儂,攏總三百外箱魚仔排煞,伊想講卜去換防凍鞋,soah去予二火閘tiâu,háⁿ講,「幹恁娘!汝是卜去佗位?毋免換啊,較緊咧啦。婊囝,pîn-toāⁿ儂,teh厚屎尿!」
林達嘛綴(toè)入去冷凍室ni̍h,有影不止冷,現入去niā,耳仔隨擋勿會牢(tòng-bē-tiâu)啊。捙盤300外箱魚,凍teh- beh成點鐘久,勿會輸hông關佇冰櫥的速凍櫃ni̍h凍規點鐘,林達凍kah鼻水chhā-chhā流。冷凍室的塗骹堅一重(têng)薄霜,滑 lut-sut,林達為著穿雨鞋,跋倒兩mái。

凍魚的空課終規是舞煞啊,soà落來佫著愛趕緊上去笨面ni̍h顧鐐筘。收工猶佫早咧,愛等kah透早日頭出來七點仔骹chiah通歇工。ah毋過,上工soah夭壽早,下晡時三點著出工,中間相連soà操16點鐘無歇停。顧鐐筘是硬硬著徛牢(khiā- -tiâu),除非存死存絕(chhûn-sí chûn-che̍h),存辦卜hông拍,做汝kā伊坐咧無要緊……ah若無想卜討皮疼,汝著毋通想卜坐。林達全全毋知影著愛連soà操咧16點鐘,彼(he)進前拍死伊都也(to-ā)想勿會著!往過猶未來做船工,聽儂講佇工場做超過12點鐘的,伊著感覺講譀(hàm)kah無臭無siâu啊。進前牽線的彼个胡明麗嘛無講kah真明,伊kan-na講有時仔會相soà做三暝三日,林達斷無(toàn-bô)想著講,連(liâm)正常上工soà著操 16點鐘攏無歇!哭父啊,這kán-ná毋是佇21世紀neh,反轉(hoán-tńg)soah勿會輸19世紀馬克思猶佫在生(chāi-seⁿ)彼个時代歐洲的血汗工場。

天teh-beh光啊,相連soà徛十外外點鐘,林達oân-á徛kah強卜蝹落去,猶毋捌徛chiah-ni̍h久著!趁kah即號食,真正不止艱苦!臨當時(liâm-tong-sî)soah來想著厝ni̍h所愛的儂,心頭隨浮出一條歌詩。

《苦海思意中人》

海連天,看無邊
月娘thán攲(khi),曜(chhiō)船墘
天青青,相思病
涼風搧面,思想(su-siúⁿ)伊
水起湧,跳孤魚
船頭船尾,勿會了離(liáu-lī)
苦相思,病相思
天邊海角,兩相離(lióng-siong-lî)
千百年,萬萬年
拜託海水,寄情意

〖未完〗

Tagged:

發表迴響

你的電子郵件位址並不會被公開。 必要欄位標記為 *

*