第四章 上去發春六號

12月29號，天拍phú光的時陣，林達kiau五个大陸船員、四个越南船員、兩个印尼的、佫三个菲律賓的，佇海口hia坐菲律賓儂駛的小船仔，來到「發春六號」頂頭。坐小船的時陣，黃家文眩船眩kah足食力的，彼暗食的差不多攏吐吐予海龍王。

林達初初看著發春六號即隻漁船，感覺船嘛無kài大，無親像進前亻因講有一千噸（tan）的款，ah船嘛chiâu舊啊。林達問彼兩个同齊來的老船員，「這船敢正實（chiaⁿ-si̍t）有一千噸？」
「拍算無，上加（siāng-ke）斂仔（lím-á）八百噸額（gia̍h）…」陳二兵應話。
二火，是一个禿額（thuh-hia̍h）佫sán-pi-pa的儂，講一句較歹聽的，生做是有夠歹腳數（pháiⁿ-kioh-siàu），頭尖耳薄、sán骨落箬（sán-kut lo̍h-hio̍h），蹺痀兼酥腰（khiau-ku kiam so·-io），看著ná像錢鼠，也ná像水猴。伊過來teh kā新船員做登記，「來來來，報恁的名姓、國籍、捌走過船毋捌……一个一个來。恁娘咧，予恁父三日，著有法度kā恁的名攏叫出來。」
陳二兵、向增壽攏報講是老船員，二火隨對亻因兩个略仔有較好看待。真正儂講「揀（kéng）佛燒香，揀菜撒（soah）油」。

了後，分（pun）枕頭、棉襀（mî-chioh）、被單、床墊、椅褥（í-jio̍k）……嘛有分配房間。林達kiau黃家文hām兩个越南仔 kheh一間；陳二兵、趙恆通、向增壽hām一个印尼番kheh一間；kan-ta韋東石孤鳥插儂群，去kiau兩个越南仔蹛kāng間。按呢歷（le̍k）規日，林達感覺誠siān啊，雖然房間仔內chhî潤潤，照原是倒落去隨睏去。林達好睏，毋過，黃家文soah佇眠床頂反（péng）來捙去，睏勿會ka-choē。伊從（chêng）佇海口上船著teh眩啊，到taⁿ猶佫teh艱苦，kiám-chhái船愰愰搖（khōng- khōng-iô），伊teh勿會慣勢。佫講，房間有影是真狹（e̍h），像黃家文佮林達即號新鳥仔kan-ta是睏下底床的額niā。下底床，大概 kan-ta有百二公分懸niā，扣去厚phiang-phiang的床枋（pang）床墊，賰賰看有一公尺懸無。黃家文誠苦惱（khó·-náu），像按呢本然著熻（hip） kah強卜勿會喘氣，淺眠（khín-bîn）的thài-thó會落眠？想著進前蹛厝ni̍h，大厝大海海，kan-ta天羅板（thian-lô- pán）soah有四公尺懸，taⁿ來蹛即號所在，真正怨嘆無儂知。佫有一个第一毋是膦的，前毋知佗一个捌睏即鋪的老豬哥，好死毋死，講佇床堵 ni̍h一四界，糊（kô·）彼號媠諸姥的裸體（khó-thé）圖，糊kah 花巴厘貓，看著是有夠gê，有夠鑿目（chha̍k-bak7）。

黃家文規身艱苦kah，嘛是硬忍牢（lún- -tiâu），佇眠床頂the幾若點鐘，一直到kah天光。

「喨（liang）…喨…喨」雄雄一陣鈴仔聲teh tân，林達sī-soā按床眠頂ngiauh起來，出房間拄著趙恆通。「恆通啊，這鐘仔是乜代（mih-tāi）咧giang啦？」
「阮表兄講是giang卜食早頓。」
「哦。」林達行來到食飯廳ni̍h，但有（nā-ū）兩塊（tè）桌，一塊chiâu細仔niā，但（nā）有法通坐六个儂；佫一塊略仔較奒（hai）一屑（sut）仔，通坐咧十二个。
二火過來分配座位，「中國的六个坐細塊的；印尼、菲律賓、尼泊爾的過來坐大塊的；機艙的去彼爿機艙hia坐；越南的去電視房hia。」
眾船員sio-soà起來囉，早頓攏食ám糜，配寡塗豆、豆乳（tāu-jú）、醬菜、豬肉罐即號小菜。黃家文嘛有坐倚來，毋過，soah無愛動箸。
「家文，ah汝是按怎毋食啦？」林達看伊毋食，著問伊。
「真艱苦，毋愛食。」
「愈gâu眩船，愈著加食寡，按呢身體chiah會健（kiāⁿ）、chiah會較iu-ia̍h。」陳二兵嘛好心kā伊苦勸。
「我往過拄上船，足足眩半月日較加無較少，食會落去著敢敢kā伊食，食落去著較勿會hiah艱苦啊。」向增壽嘛teh鬥苦勸。
「眩hiah久哦？恁攏會眩船毋？我soah勿會neh？」林達問亻因。
「汝taⁿ-á上船，會眩勿會眩，猶佫未盡知咧。若卜會，過幾日仔汝著知死啊。」向增壽kā林達瞭（lió）一目。
陳二兵嘛趁喙講，「連我即號老鳥，有時仔拄著風湧較狂的嘛會眩，莫（bo̍h）佫是汝？！」
「我嘛是。」趙恆通嘛插一句。
「是講，像恁按呢gâu眩船，敢毋足艱苦的？恁哪會卜來走船啦？」林達問亻因。
「為著三頓，為著趁錢kong……像阮即號也無勿會曉半症，毋來走船，卜予枵死哦？」陳二兵應伊一句。
林達佫講，「ah毋過，即份頭路，薪水也無通濟啊。」
趙恆通應伊講，「泛泛濟啊啦。我卜來彼陣，阮社的hiah-ê少年家聽著講一年有法通賰兩萬外，攏吵卜綴（toè）我來。」
林達聽了無佫做聲。
趙恆通又佫講，「我家己先試一年仔看māi，若會使得，明年倒去加牽一寡兄弟群來做，我聽阮彼个牽猴的講，若介紹儂去伊hia，加減仔會使抽寡。」
「牽恁來的中儂是siáng？二兵兄、增壽兄，恁兩个kiau恆通敢毋是kāng中儂介紹的？」林達問亻因。
「是啊，阮三个攏kāng公司的。公司佇福建泉州市泉港區，頭家是劉青棠。」趙恆通講予伊聽。
韋東石著問，「Ah恁薪金偌濟咧？」
趙恆通應講，「我一月日360箍美金。」
韋東石聽了目睭soah金起來，「哇，比我佮林達hām家文，佫較濟10箍銀美金neh。ah汝往過捌走過船毋捌？」
「嗯，」趙恆通應伊講，「向增壽400箍美金，阮表兄猶佫較懸淡薄。亻因是老鳥啊，有經驗，船頂的空課攏會曉做，薪水定著較懸。」
林達佫問，「恆通，ah恁公司有kā恁買保險無？」
「毋知影neh，ah恁有無？」
「阮公司頭家講有，毋過我有去保險公司的網站查，soah查無鼻縫（bô-phīⁿ-phāng）。Ah恁公司卜辦船員證，有kā恁khioh錢無？阮公司是一儂khioh千五箍，講卜按薪水ni̍h扣。」
趙恆通應講，「無啊，阮辦船員證kán-ná無收錢，中間儂，一位一位無kāng款，收費標準啦、薪金啦，嘛無kāng款。」
林達想著彼本船員證頂頭所記的內容，「彼內底關係著「專業訓練」記載的項目，有講著啥物海上求生、救生船駕駛、船隻消防、海上急救chiah-ê，ah恁公司有組織培訓無？阮是無啦。」
陳二兵佇邊仔聽kah起性，「彼攏是咧騙鬼，咱chiah-ê中間公司做代誌從來（chêng-lâi）計嘛行偏門的。講hia-ê無路用啦，我kan-na知影講，逐choā船走煞，卜倒去，薪水攏無影照時陣清kah直。」
林達昂愕（gông-ngia̍h）一下，順喙問伊講，「啊？！佫會kâng欠薪水哦？」
向增壽佫補一句講，「公司刁工（thiau-kang）薪水毋清kah直，是按算卜kā老船員縛牢（pa̍k- -tiâu），下過仔chiah-ê儂想卜佫去走船，自然會佫來揣即間公司交接。這著是儂趁錢的撇步，卜講是漚步（àu-pō·）嘛會使得啦。像我的薪水著毋捌講一擺清kah離的。恁娘較好，咱佇船頂按呢拚死拚活，拚kah卜消筋（siau-kin）、卜斷氣（tn̄g-khùi）去，到尾仔佫著hông 欠薪水，真正足毋值的。」
陳二兵嘛綴喙講，「頂過我做煞，按船頂落來，嘛專工拚一choā去恁福建泉港，去揣彼箍劉青棠，佇亻因公司hia揣著伊，硬死kā伊鉗牢（khîⁿ- -tiâu），死綿爛kô，尾仔chiah有清kah離。當中，路費啦、所費啦，加開去幾若百。去到亻因公司一下看，哭父，頂面掛的招牌嘛毋是船務代理，相（siòng）真看，是掛一个賣電腦的牌仔。問伊chiah講本是咧賣電腦，做船務代理反轉（hoán-tńg）soah親像是副業。在我拍算，伊彼間電腦店khiám-chhái是掩儂的耳目（iám lâng ê ní-bo̍k）niā，khiám-chhái船務代理chiah正港是趁大空（toā-khang）的。Ah毋過事實是毋是按呢，鬼會知？」
「有即號代誌？」林達聽kah戇戇（gāng-gāng），「我去廈門公司的時陣，嘛感覺龜怪，公司soah soeh佇儂徛家的商品樓ni̍h，門面嘛真小局（siáu-kio̍k），連牌仔有影嘛無掛。」
「唉…」，陳二兵哼（haiⁿ）一聲，吐（thó·）一口氣，「慣勢著好啊，咱taⁿ講chia-ê嘛無較choa̍h啦。咱平平出外口儂，在佇即片公海ni̍h，kāng中國大陸來的著是同鄉（tâng-hiuⁿ），愛互相照顧chiah有影。喂，黃家文，汝真正著加食寡，身體chiah接（chih）會牢（tiâu）。」
……
早頓食過後，二火代先是kā新船員分配工位。大車（著是輪機長）嘛來啊，thāiⁿ一个腹肚桶仔，大概五十外歲儂。向增壽、黃家文、林達分配去機艙，陳二兵、趙恆通、韋東石去笨面（pūn-bīn）ni̍h。

二火是船長上要緊的助手，笨面的空課攏chiâu伊teh發落佮掌管。在佇發春六號即隻船ni̍h，平常時仔組織做空課、安排大細項代誌、各項事務管理，也計計是二火teh發落。大車掌管機艙部，負責維修佮保養船頂的機器。

船長、二火、大車攏台灣儂，三火、二車、廚子師（tô·-chí-sai）攏越南儂。

尾仔，佫有分物件，一个船員通領三軀（su）舊的工作衫、一箱泡麵、一箱牛奶茶佮一箱可樂。無疑悟（bô-gî-gō·）佫有物件通分，前，林達連想嘛毋敢想。
……
頭擺著班（tio̍h-pan）入機艙，林達誠勿會慣勢。當時（tng-sî）徛算船猶佫佇馬六甲海溝，熱帶的所在，溫度本然盡懸，機艙內佫較 hâⁿ！機器佫lòng-lòng-háu，林達感覺規个心肝足糟（cho）的，鬱船鬱kah卜無命去。有一項空課，著是愛摕破布仔kā機器滲（siàm）出來的油cheh起來。林達較早佇厝ni̍h連碗箸嘛毋捌洗過，taⁿ卜來做即號油ta̍p-ta̍p的空課，的確真勿會慣勢。

落班斡倒來宿舍，一雙上船紥來的運動鞋soah無看見，毋過彼時也無啥疑悟，越頭看黃家文卜死nā哼（beh-sí-nā-haiⁿ），倒佇眠床邊轂轂攆（kauh-kauh-lìn），目箍紅紅，kán-ná哭拄煞的形。林達本然想卜kā伊安慰一下，雄雄soah毋知卜講啥較好。看黃家文即號 pān的，kiám-chhái佫咧想厝ni̍h啊。無liâm-mi仔久，外口soah kán-ná變天，臨當時（liâm-tong-sî）雷公爍爁（sihⁿ-nà）pīn-piāng叫。黃家文無張弛（tiuⁿ-tî）卜哭卜哭，講一句「我taⁿ真正後悔啊。」

林達看黃家文悽慘罪過（chhi-chhám chē-koà）的形，想著幾若年前捌佇厝ni̍h看儂掠鯪鯉（lâ-lí）關蹛籠仔內，拄好kiau伊相親像。Ah即間狹佫熻（e̍h koh hip）的船工房，的確有sêng關鯪鯉的鐵籠仔。林達臨當時想卜做詩：

KOAIⁿ HÀN
關漢

Koaiⁿ-hàn sit-ióng chiâⁿ khó-liân
關漢失勇誠可憐
Lûi-kong chhih-chhah phi-liân-siân
雷公叱吒披龍涎
Ba̍k-sái kiông-lún ka-kī liàn
目屎強忍家己攆
Khih-goe̍h su hiong sim chhi-liâng
缺月思鄉心淒涼
……
自家己房間出來後，林達著趖去趙恆通亻因彼間練仙（liān-sian）。
「林達，感覺按怎樣？」陳二兵問伊。
「泛泛代啦。Ah船頂的水kán-ná真無衛生，逐个卜啉水攏啉kāng一桶，桶底kán-ná足濟塗垢（thô·-káu）坐底（chhē-té）的款。是講，彼chiáⁿ水敢有燃（hiâⁿ）滾？敢直透用自來水予咱啉？」
陳二兵倒問伊，「無汝佇厝ni̍h毋是啉自來水？」
「厝ni̍h攏嘛啉礦泉水，規桶的、貯（té）便的。」
「恁兜條件較好啦。」陳二兵gīn膦應伊一句。
「無啦，逐个攏嘛啉彼。我拄仔佫看著有儂佇笨面頂頭放尿，龜怪。佫有儂châng浴châng煞，連衫仔褲也無long，自按呢hoàiⁿ出來……」
向增壽臨當時bok一句，「佇船頂，無穿內短褲，真正常。」
「林達，汝taⁿ會慣勢勿會？我即mái略仔有teh想苦慼（siūⁿ khó·-chheh）啊。」趙恆通問林達。
「勿會啦，泛泛啦，汝哪會按呢講咧？」
「其實，我小可會眩船，精差無像黃家文hiah食力。船頂連卜洗一个喙，也無chiáⁿ水，足艱苦的。進前未來的時陣，我佇厝ni̍h有hām阮家後開一間kám仔店，罕得做粗重的，聽阮表兄講啊，此後討掠的空課猶佫較悿頭咧，我驚我時到食勿會消。」
「我是無差啦。」林達應話。
「我看ho·hⁿ，汝佮黃家文kui-khì冗早（liōng-chá）轉轉去啦。」陳二兵的話聽著酸帶澀，「看恁兩个按呢尖骹幼手，汝hiah-ni̍h大箍，ah黃家文勿會輸ná諸姥囡仔咧，恁無sêng做粗工的儂啦。」
「啊？Kán-ná苦勿會得阮較早走咧，聽著加足傷心的。」林達聽伊講按呢，無gē，soah用笑改（ké）。

第五章 菲律賓儂吉莉

2010年1月1號，算做講林達上船後的第四日。因為林達較會曉得kiau儂交接，佫會hiáng講英語，伊真緊著知影船頂所有儂的名姓。
Chiah-ê儂，攏總有越南儂15个，印尼的7个，菲律賓的3个，尼泊爾的3个，台灣儂3个，中國儂6个。
越南儂是陳文揚（二車）、阮文雄（三火）、阿海（廚子師）、排骨仙（正名鄭庭園）、阿東（正名杜勝東）、阮懷南、阮玉山、楊文效、盧文倩、黎德山、劉菲全、劉停強、老龜精（也叫阿海，30捅歲仔，真臭老，chiah予儂keng-thé按呢），猶佫兩个liâm-mi卜轉去「發春101號」的，林達著無愛去記亻因的名。
印尼儂：撒合莉、阿信、加明、阿吉、卡林、路D、阿D。
菲律賓儂：吉莉、卓利瑪、馬可。
尼泊爾儂：塔卡莉、阿莉濤、遲洛斯（予儂keng-thé寶力達）。
大車較早捌佇「發春二八八號」做大車，向增壽嘛捌佇彼隻船hông倩過，in兩个算老相熟（siong-se̍k），向增壽kā林達講大車姓陳。陳二兵上船無偌久，著佮二火真有話通講，二火kā伊講船長名號做阿寶，儂攏尊伊一聲寶哥（Pó- -ko），儂tih-beh六十啊，即擺拍算是船長的上尾擺行洋。二火是台灣外省儂，祖家佇江西，in老父講是老榮民（國軍退伍的老兵），林達看伊淺拖頂頭有刺「天宇」兩字，拍算彼khiám-chhái是伊本名。

船頂講的話攏是一寡較簡單的普通話、較無正規的英語，hâm佮一寡閩南語的粗喙話。猶佫一寡誠龜怪的話語，比論「sandamaliya」，林達嘛毋知彼是按佗落一號語言來的，意思講是受傷，嘛會使講機器受損。佫比論「qikiqiki」講是相幹（sio-kán）、相駛（saⁿ-sái）。佫有「saigo」、「saide」。「saigo」講是品質讚、儂媠、儂好、gâu做空課，橫直若是好的攏會使得按呢講。「saide」講是品質bái、儂 khiap勢、歹心、無路幹chiah-ê歹的意思。拍算chiah-ê話語是自底按日語的「最高さいこう」、「最低さいてい」來的，傳去到台灣了後，又佫傳來到船頂。
……
所有chiah-ê船員攏予船長押去咧中笨（pūn）hia學縛（pa̍k）魚鉤，學扯（chhé）文武扯，老船員嘛勿會免得，講是卜練予較熟手咧。按呢嘛算做講是咧工作。（兩棧抑是三棧的甲板船，下底的甲板，號做「中笨」，上面頂的號做「頭笨」，中央的夾層有「二笨」。若是大隻船，有真濟棧，佫有「三笨」……）

中笨無啥會tháu空氣，熻佫偓促（ak-chak）。日頭光按笨面（pūn-bīn）的喙口hia曜（chhiō）入來，全全塗粉坱埃（eng-ia），林達佇內底略略仔感覺悶悶、kāu-oe̍h kāu-oe̍h。

有一个菲律賓的少年家，名號做馬可，儂咧做空課，伊soah閃佇邊仔。伊覆（phak）佇隆溝邊仔，敢（káⁿ）想講蹛hia若吐會較利便。伊 kiau黃家文kāng款，眩船眩kah足食力的。二火臨噹時（liâm-tong-sî）行倚去，對著伊的頭殼後甌，款落去下命（hē- miā）bòng，下命掘（ku̍t），「幹恁娘，恁父倩汝來享受的毋？！」「我咧駛恁娘的臭膣屄（chi-bai）……」拳頭拇佮頭殼的相磕（kha̍p）soah勿會輸ná咧挵鼓按呢嘭嘭吼（phōng-phōng-háu），「幹恁娘，我叫汝咧貧懶閃西方（pîn-toāⁿ siám-sai-hong）！」

韋東石看kah舌仔吐吐，邊仔另外一个菲律賓儂吉莉用英語講：「這毋是頭一擺啊，昨昏我佮馬可想講盡熱，著走去châng浴，結果佇浴間仔險險予二火掙（cheng）死。阮進前的確毋知影講日時仔規日攏算上班時間，勿會使châng浴。」

林達用英語對伊講：「彼个二火，著凖伊想卜講，嘛講勿會明啦，伊會hiáng講的英語，拍算勿會超過三十个單詞啦。」

黃家文佇邊仔看馬可咧hông砧（tiam），毋知按怎，伊目箍soah反紅，kán-ná目屎強卜lìn落來的形。林達問伊講：「家文啊，ah汝是按怎啦？」

「我透早嘛去予伊bok。嗚嗚…」黃家文自手ńg擦目屎，「早起我眩船眩kah擋勿會牢（tòng-bē-tiâu），拄想講卜加the- -liâm-mi，二火著chhi̍h過來掙摃拍（cheng-kòng-phah），起手動蹄，拍一个半小死。佫講kah真歹聽，kā我sau-phî 講，勿愛叫是tìⁿ破病著會當免做空課。

吉莉中國話聽無，著問林達：「伊咧講啥？」林達著翻譯予伊聽。吉莉聽了吐大氣，講：「二火是鬼毋是儂，我…真正想卜轉去啊。」即个時陣，拄拄 chiah予儂砧（tiam）過身的馬可嘛倚過來學縛魚鉤，原在猶佫戇神戇神，一句話直透se̍h-se̍h念：「我想卜來轉啊……我想卜來轉啊。」

即个時陣，吉莉輕輕仔哼（hiⁿ）起來，伊的聲真讚，唱歌真好聽。
「吉莉，汝唱了真好聽。」
「林的，多謝汝，這我家己寫的詞佮曲啦。」
「有影無？」林達soah有淡薄仔激動，「荏荏馬，嘛有一步踢。」無疑悟蹛即號船頂soah有即款人才佇咧。「吉莉，做汝唱出來，唱一寡汝家己寫的。」
「好，我唱：
This Time
Oh I’m sorry girl for causing you mucus pain.
Didn’t mean I make you cry make your efforts all in vain.
Now I apologize to all the things I’ve done you were.
Loving me so much but all I did was let you down.
Oh I really don’t know just what to say all I know is that I want you to stay.
This time I’m not goⁿa let you slip away.
……」

林達蹛邊仔聽kah神神痴痴（chû-chû），伊kā吉莉講：「汝無應該來即號所在做工。遮kiau汝無合（ha̍h）。」
吉莉說：「嗯，自上船我著咧怨嘆啊，即mái想卜轉去嘛無法度啊。進前我佫有問彼箍牽猴的…中介啦，有無……問in「發春六號」好抑bái，in講勿會bái，佫o-ló kah會徛起來。Taⁿ我知影予儂術去啊。我taⁿ足數念厝內儂，想阮父母，想諸姥朋友，想阮諸姥囝。」
「汝soah有諸姥囝啊？」林達昂愕（gông-ngia̍h）一下，吉莉看起來猶佫誠chíⁿ着，「吉莉，汝今年幾歲啊？恁諸姥囝偌大漢啊？」
「我？我19歲，阮諸姥囝tih-beh兩足歲啊，馬可佮我平歲，in諸姥囝嘛佮阮差不多大。毋過，伊佮我無kāng款，伊結婚了啊，我猶未咧。」
「按怎講？」
「Ah 都（to）阮諸姥囝是我進前彼个無緣的…生的啦，彼个歹諸姥，定定kā我七騙八騙，騙東騙西。Taⁿ現此時即个諸姥朋友猶佫毋知影我有一个諸姥囝。」
林達soah毋知卜按怎應話。
拄好食飯時間到啊，各儂手頭的空課暫且放咧。吉莉liâm-mi soah歡喜kah，隨peh起來跳一段Michael Jackson的moonwalk。林達笑kah。伊真正跳勿會bái，趣味佫詼諧（khoe-hâi）。即个少年儂會曉唱、會曉跳，的確不止有才情！
……
船頂正頓kan-ta食兩頓。
攏總出三下（ē）菜，一盤青菜，一盤海魚，佫一盤鱢的（chho- -ê）。講是講海魚，較濟是sám-bah魚（秋刀魚），彼攏進前蹛北海道掠的；ah若彼盤鱢的，攏是一寡雞鴨肉、豬肉、牛肉即款的。徛算猶佫泛泛（hàm-hàm）啦，ah毋過，計嘛是冰凍冰足久的啊。林達煩惱講彼食了無營養，尤其是草菜，全全也無鮮（chhiⁿ）。

印尼儂大半毋食豬肉，有時仔，in會用豬肉佮中國船員換魚仔去配。總是，有的穆斯林嘛是照食不誤，即个儂著是阿信，雖然食無kài濟。有時仔菜 hām肉濫摻做一下炒，差不多所有的穆斯林攏有揀hiah-ê菜枝菜箬去咧食。在林達拍算，彼嘛是無法度啦。船長、二火、廚子師（tô·-chí- sai）in chiah-ê儂chiah無咧管siâu汝宗教禁忌毋禁忌。雖然合同白紙寫烏字——「雇主佮船長尊重漁工的人格、宗教信仰佮生活氣習」，總是，佇船頂無法度顧彼濟啊，著ná親像合同嘛有寫講「雇主、船頭家、管事勿會使侮辱、勿會拍漁工」。看勢，合同品照品，事實做照做，有照起工無照起工，彼攏毋是真要緊。照講，船務代理公司chiah是林達in即陣儂真真正正的雇主，ah毋過，銃子拍來到冷冷啊。Taⁿ佇船頂，管事的著是頭，in卜按怎，著卜按怎。
……
暝暗時仔，林達佮黃家文hām韋東石，the蹛咧笨面ni̍h看天頂的星。蹛咧海ni̍h，soah感覺天星重倍光，重倍明！Kiám-chhái chia無像城市彼號污染？空氣嘛十倍清爽，海風teh吹，儂加誠爽神。即款所在全全無像岸頂彼號滾絞（kún-ká）、吵鬧（chháu-nāu）。林達liâm-tong-sî感慨：「哇，誠爽！若幾月日前，我斷斷想勿會到會佇即个所在，像按呢自由自在看天星，吹海風。勿會輸來咧渡假，佫免錢的。」
「勿會bái是勿會bái，風有較透。」韋東石綴喙講。
黃家文問講：「東石啊，ah汝進前佇厝咧做啥物穡路（sit-lō·）？」
「拄頭仔佇南寧一間五金廠，一日若hām加班攏總著愛做十外外點鐘。月月薪水也chiah五六百箍。」
「Hiah少？」林達無啥卜信，「阮hia連彼號走車賣票的諸姥囡仔月月上無嘛有千五六。一月日趁千五六，佇閩南hia算講趁真無啊。」
「嗯，彼兩年前啊啦，廣西hia薪水較下（kē）啦。路尾佇五金廠做較無兩年著無佫做啊，換去桑拿店予儂倩師仔（sai-á），薪水有較懸淡薄，嘛加真軟氣（nńg-khùi）。是講，我tō愛熬暝（ngâu-mê）上網，愛食啉thit，所趁的攏無夠開。家文，ah汝較早做啥貨？」
「我？我較早佇福州一間工廠駛車做機司。」
韋東石講：「駛車毋是bē bái？駛車上無嘛佫比taⁿ佇chia做漁工較好，是毋？」
「公司效益bái，倒去啊。較早一月日有通趁咧兩千捅箍，三不五時卜載七仔去phāⁿ，去chhit-thô嘛加足利便的。我是去予in設來，彼个姓胡的諸姥講船頂偌好拄偌好，鬼會知全全毋是按呢。我是的確真想卜轉去啊，毋過，咱知影船長斷無（toàn-bô）去為著某物儂專工kā船駛轉去的啦。恁 né膣屄（chi-bai），佇岸頂，做了bē爽，隨時喝卜走，著走；taⁿ佇即號水鬼仔所在，想卜走嘛無法度。達仔，汝有想卜轉去無？」
「我taⁿ猶無拍算，佫罔度看māi，落船即幾日仔，我感覺真刺激。其實，我自細漢，著直直咧眏望會當去行洋（kiâⁿ-iûⁿ）討海。Taⁿ猶佫感覺勿會輸teh眠夢咧，kán-ná毋是真的。」
彼个時陣，林達看著闊漭漭（khoah-bóng-bóng）的天，看著滿天艷艷爍（iām-iām-sihⁿ）的星，心肝頭雄雄soah下定決心，暗暗立志卜做一个「毋驚歹命，毋畏艱苦，卜衝風破湧、堅心討海」的行船儂。日時仔，日頭赤焰焰（chhiah-iāⁿ-iāⁿ），海水青lin- lin，林達看著遠遠仔的所在，海豬不時佇咧探頭、趒跳、滾sńg；猶佫有濟濟毋知名的海鳥自由自在、無煩無惱teh環（khoân）來踅（se̍h）去。在林達拍算，chiah-ê伊攏愛，攏有合意（kah-ì）。

第六章 路易港

船行水路去阿根廷的中間，空課無講kài濟，毋是真無閒。（船自台灣、新加坡行去阿根廷海域討掠，中間即逝（choā），in講「行水路」，行一逝（choā）水路，來、去，差不多攏著四、五十日。）

1月7號下晡，眾船員先佇笨面練縛魚鉤仔，了後，著soà落去拚掃。二火臨當時（liâm-tong-sî）kán-ná鬼拍著，無代無誌講攑（gia̍h）一支水銃（chúi-chhèng）對著眾船員直直濺（choāⁿ）。看逐个攏濺tâm漉漉，伊soah暢（thiòng）kah，笑 kah勿會輸ná奸臣，「哈哈，來，我來kā恁châng浴！」眾儂雖然氣kah規腹火，總是無儂敢嗤噌（chhi̍h-chhn̍gh）。

廚子師（tô·-chí-sai）阿海仔敢（káⁿ）是卜去冷凍室眏（ńg）菜，注死毋死，拄好行到hia，嘛soah去予二火的水銃濺kah一身tâm糊糊。阿海仔氣kah當場幹三代（kàn-sam-tāi），「幹恁娘，毋成囝！」

Kiám-chhái過較無一字久，阿海仔soah攑一支菜刀衝出來，哄癀（háⁿ-hông）講卜刜（phut）二火，尾仔卻（khiok）毋敢刜，總是phih-chhoh-lān-kàn-kiāu，放刁而五tńg。

暗頓食飽飯，船頂十五个越南籍的船員圍圍佇餐廳ni̍h，取頭（chhoā-thâu）的是二車陳文揚hām三火阮文雄（Ńg Bûn-hiông）。嘛毋知陳、阮兩儂kāin講啥貨，眾儂一時soah氣挽挽（khì-bán-bán），一陣儂圍烏烏，衝入去駕駛室ni̍h揣船長理論，不而過，陳的kiau阮的in兩个無綴（toè）去。

尾仔，林達chiah知影彼十三个越南儂去kā船長放刁講inbē-giàn做啊，卜轉去啊。船長看了毋是空（m̄-sī-khang），局不局（kio̍k-put-kio̍k）未曾（boē-chêng）chhiâu先落軟，kāin七怙情（ko·-chiâⁿ）、八安搭（an-tah），好喙（hó-chhùi）兼褒囉唆（po-lô-so）。路尾，終規kā代誌挲平（so pêⁿ），順soà有kā二火叫來haiⁿ佮sai，幹三代。
……
1月8號，船錠（chûn-tiàⁿ）打揲（táⁿ-tia̍p）煞，陳二兵叫趙恆通且慢（chhiáⁿ-bān）走咧，講卜教伊學縛船繚（chûn-liāu），「佇chia船頂，縛船繚是上普通、上基本的空課，有幾若个鋩角（mê-kak），taⁿ我寬寬仔（khoaⁿ- khoaⁿ-á）kā汝教，汝斟酌學，另日家己ta̍uh-ta̍uh-á練，練予熟手chiah會使得。」
陳二兵一遍一遍教趙恆通學結船繚，林達看著歃心（sahⁿ-sim），開喙拜託陳二兵，「二兵兄，順soà kā我教一下，好毋？」
陳二兵kán-ná tèⁿ無聽見，「恆通差不多會曉得啊，家文啊，換汝啊，來我教汝縛。」
……
食日晝飽，林達看破（khoàⁿ-phoà）著去揣向增壽，kā伊請教。向增壽反轉（hoán-tńg）khah好禮，「好，我先教汝拍馬蹄結……」

林達釐仔（lî-á）學卜會的時陣，阿東來喝（hoah）伊去交接班，講換伊著班啊。（著班，著是去機艙抑者駕駛室ni̍h值班，一儂著班兩點鐘，相lîn替）

林達入去機艙了後，hām伊平平著班的印尼儂撒合莉，用目睭kā伊giân佫反（páiⁿ），kán-ná怨伊怨kah入骨。林達心肝頭嘛真氣惱（khì-ló·），siáng叫伊第一日來，着得失着撒合莉。卜講，撒合莉是「師父」，進前林達也勿會曉半項，頂頭安排撒合莉卜來牽教伊，ah毋過撒合莉勿會曉講中國話，伊講啥林達也聽無。尾仔大車來，林達chiah請教大車，伊kā大車講伊聽無撒合莉咧講啥。大車真耐心，骹步手路，一步一步教林達著按怎添油、按怎保養機台hām一寡愛張弛、愛注意的鋩角。

撒合莉坫（tiàm）邊仔氣kah la̍k-la̍k-chhoah，伊佫聽無林達kiau大車咧講啥chiah會死，想講儂敢（káⁿ）咧講伊的歹話抑毋是。伊從（chêng）彼日起，見著林達著tèⁿ一隻漚臭面，有時林達若佗落做了小可（sió-khoá）無好勢，伊磕勿會著kàn-chhoh-kiāu，haiⁿ佮sai，使（sái）性la̍k地，鬼拍無著。林達無想卜kiau伊poé-hoē，伊自底對撒合莉也無好印象。林達本然著怨恨印尼儂，伊知影1997年印尼排華的代誌。在林達拍算，印尼儂kài無衛生，伊捌兩擺親目看著印尼儂放屎毋用紙拭尻川（kha-chhng），是用手去oeh的……伊佫聽儂講印尼的儂teh 食飯oân-á用手pe…見若（kiàn-nā）想著這，林達著感覺足gê的，害伊彼兩日仔糜飯soah食無啥會落去。

論真講，佇機艙ni̍h，精差較hâⁿ，較熻，聲說較大、較噪儂耳（chhò-lâng-hī）niā，無佫是不止清閒著，歇睏佫會使坐，ah若駕駛室hia著有影無通坐。林達kiau撒合莉一儂坐一頭，soah有聽著彼爿大車kā二車陳文揚罵kah卜臭頭去。彼毋是頭一擺聽著啊，陳文揚做空課大車總是勿會滿意，規日鬼幹馬吼，嫌kah無一塊（tè）著。

林達值班煞，倒來到房間ni̍h，三火阮文雄捧（phóng）一本冊來揣伊，「林達，汝教我講中國普通話好毋？」
「好啊。Ah這啥物冊啦？」
「這是中國語學習課程。」
林達摕過來一下bāi，喔，是台灣出版的卜予台灣儂通學越南話的冊，毋過，反倒轉嘛是會用得。林達一句一句耐心教伊念。其實，論真講，阮文雄、陳文揚佮廚子師阿海仔in三个講普通話雖然毋是真老（láu），總是猶佫算hàm-hàm。不而過，阮文雄猶原誠認真咧練，聽講伊佫定定看台灣、香港的電視劇來咧學，kan-ta即點，林達對伊著加真欽敬。
「林達，汝是好儂，教我講普通話。Ah毋過恁中國真歹，定定偏（phiⁿ）阮越南。」
「定定偏恁？汝敢是記毋著去，真正毋是定定咧kā恁鬥骹手？19世紀八零年代，中國出兵kā恁鬥支援（chi-oān），鬥拍法國番，為著卜保衛恁越南，死偌濟汝知無？猶佫有啦，20世紀六零年代，越戰，有無，中國出米糧出銃出炮，佫出兵替恁去拍美國，ah汝soah勿會記咧……」
「喺（hēⁿ）啦，有影啦，彼陣阮攏食中國來的米較濟。」
林達soah無話通講，毋知是越南儂記性（kì-sèⁿ）bái，抑是講in自底愛忘恩背義，真正激無。
……
儂講「看儂放屎，尻川蟯（ngiau）」，另外一个越南儂劉菲全看阮文雄teh 綴（toè）林達學普通話，伊也過來teh鬥鬧熱。即段行水路中間，阮文雄、劉菲全in兩个學kah熱phut-phut，林達嘛教kah興chhih- chhih，不管時嘛學一寡較簡單的越南話，比論講一寡數詞啦，禮貌用語啦chiah-ê。「菲全，汝今仔日學著誠緊喔，來，即包牛奶茶獎賞汝。」拄好向增壽入來卜相揣坐，林達sī-soā hìⁿ一矸可樂予伊，「增壽兄，承牢（sîn- -tiâu）！」
「喲…達仔，哪著chaih厚禮啦…」向增壽soah歹勢。
「增壽兄，汝mài細膩啦。一矸可樂soah，汝也咧kiau我客氣？船頂hiah濟空課，若毋是汝kā我牽，我佫勿會hiáng做- -著。我哦…感謝汝啦！」
「達仔，汝按呢…我soah歹勢……嗯，著啦，我hia加（ke）一床海綿墊，也無咧用啊，iah嘛無tè囥，活卜鎮tè……ah我看汝chia猶佫不止khoàⁿ-khǹg著，無kui-khì拖來hē蹛汝chia，汝chhìn-chhái kā chū蹛床墊下……噢，這海ni̍h有影足gâu吊濕……taⁿ無我隨來去hiahⁿ hò·ⁿ。」
Kiau林達睏siâng間彼个黃家文插一句講，「向增壽，汝免kiau伊客氣啦，伊m̄-tān-nā請大陸同鄉niā，連番仔來伊嘛請，見儂著請，有儂有份，有影真有量啦……唬，勿輸kán-ná大頭家、好額儂咧。我看伊taⁿ未曾未（boē-chêng-boē）啉kah徹徹（theh-theh）啊，時到去討掠看伊卜按怎，卜哭著無目屎哦…哈哈」
向增壽聽了嘛愛笑，問林達講，「達仔，ah汝chia有冊通看無？」
「我chia有三本，厝ni̍h紥來的，一本《論語》、一本《宋詞三百首》、佮一本《金剛經》hām《壇經》的合訂本。出在汝看卜挃（ti̍h）佗一本，做汝摕去看。」
「喲，汝thài會看即號冊啦？這冊真深neh！ah無…我chhìn-chhái摕即本《論語》來去看。著啦，我hia嘛有一本《包法利夫人》，汝若卜看，我小停摕過來予汝……嘛是厝ni̍h hia買的，我家己無啥愛看，看無啥會捌，無啥趣味。」
「嗯，彼是法國福樓拜的成名作。」
「啊？這汝也知？」
林達笑笑仔講，「我啥物碗糕冊，加少攏愛看淡薄。」
「唉…足無gē-niū」黃家文佇邊仔吐大氣，「向增壽，汝hia有報紙無？真正了然，佇chia船頂kán-ná天地外，幾若月日前，幾若年前的舊報紙、舊雜誌咱soah看kah gī-sa-sa！」
「報紙哦…無neh。」向增壽應講伊無。
黃家文又佫哼（haiⁿ）一聲，「ah無咱來去電視廳，看有啥片通看無？」
「好啊。」林達應講好。
來到電視房，看見陳二兵、趙恆通，佮彼个普通話講kah siak-siak-háu的越南儂「排骨仙」三个儂當咧（tng-leh）看一齣大陸的電視劇《雍正王朝》，林達佮黃家文choâⁿ坐落來同齊（tâng-chê）看。
拄看liâm-mi-á久，二火chông入去，「恁娘咧，恁看即號戲hiah-ê死番仔也勿會曉通看，電視攏恁大陸儂咧包場毋？恁父今仔日專門kā恁chhoân一寡好料的……」ná講ná笑kah gī-sa-sa。
片sak入去chiah知影tang-sî-á是「鱢的（chho- -ê），重鹹的」，林達kiau彼幾个大陸儂拍算無啥通好看，做in斡斡出來，反轉（hoán-tńg）hiah-ê外籍船工soah胡蠅母貪甜，一个一个sōng入來，排骨仙嘛原在（goân-chāi）坐無振動（tín-tāng）。無liâm-mi-á，規間kheh kah實捅捅（cha̍t-thóng-thóng），逐个看kah目睭攏無轉仁（tńg jîn），喙瀾chha̍p-chha̍p滴，真正茫舒舒（bâng-su-su）！
林達實在想無彼哪有啥通好看，嘆一聲「怪死……」
陳二兵應伊講，「彼嘛莫（bo̍h）怪in啦，汝講hiah-ê番仔，中國話也勿會曉聽，漢字的字幕佫看無，咱愛看的in定著較無hiah合意。」
「近來我定定看大車當著眾儂面kā彼个二車keng-thé kah無一塊（tè）著，二兵兄，ah伊敢毋是oân-á管事？」林達問陳二兵。
「Chiah-ê二車、三火是卜算啥貨啦？講一句較歹聽咧，in不過是老船員soah，也無學過專業智識，也無證件，講in是幹部彼是咧講好聽的 niā。不而過，若是彼號大隻船ni̍h，二車、三火著真正愛有真本事chiah會使得，若無本事的，漚梨仔想卜假蘋果，彼是假勿會sêng啦。Taⁿ坫咱即款漁船仔，逐个趁食趁食，也毋免啥技術啦，像咱即號「二車」、「三火」無非是比普通的船員略仔較熟手soah。Ah陳文揚徛算頂任大車牽起來的，taⁿ賺食（choán-chia̍h）儂勿會倒，予儂sau-phî，彼嘛是正常啦。」
「喔，是按呢喔！想勿會到小小的一隻船，牽磕（khan-kha̍p）的代誌佫不止濟著。」
陳二兵臨當時（liâm-tong-sî）佫咧假老大（ké lāu-toā），伊講「林達啊，汝kiau黃家文，講恁chíⁿ著是chíⁿ，恁無像我啦、阮表小弟、向增壽、韋東石chiah-ê按莊骹出來的艱苦囡仔。走船即號空課恁無合（ha̍h）啦，恁厝ni̍h條件好，佇岸頂chhìn-chhái揣- -一項仔，嘛較贏走船。」
又佫是即款口氣，林達嘛勿會記咧陳二兵第幾擺用即號口氣kiau伊講話啊，真正聽kah會siān，即个陳二兵嘛有夠無寂（bô-sio̍h）to̍h著。
……
林達想卜去揣吉莉hoah-sian，拄行入門，soah看著彼个hām吉莉徛siâng間的菲律賓儂卓利瑪，無穿衫也無穿褲，褪褲膦，掠塗蟶，當咧chhit-thô彼號「五个拍一个」。林達驚一趒（tiô），sī-soā勼倒出來，斡轉去家己的房間。是講，彼个卓利瑪，敢（káⁿ）是蹛電視房坐傷久，片看傷濟，「食了傷鹹、傷鱢（chho）」，倒來到tè，soah「喙焦喉渴（chhui-ta âu-khoah）」擋勿會牢（tiâu），趕緊卜來「止喙焦」的款。

轉來房間了後無liâm-mi仔，吉莉soah反轉（hoán-tńg）來揣林達開講，「林的，汝chia猶有可樂無，我的攏啉了啊。」
「有啊，猶佫幾若矸著，汝卜啉是毋？卜，汝攑一矸去。」
兩个儂著自按呢款落去講天掠皇帝……「吉莉啊，恁菲律賓嘛算講是民主國家，ah恁hia做官的按怎樣？像按呢做船工，領即號薪水，佇菲律賓有算懸無？」
「幹！菲律賓做官無一个好物的，逐項都（to）卜歪哥！儂講「做官若清廉，食飯通攪鹽」，所講（sé kóng）有影無濫糝（lām-sám）。像咱做船工領即號薪水，佇菲律賓也無算懸啦，我早著想卜轉去啊。林的，汝看我面烏青烏一tah，幹！佫去予彼箍術仔拍的。」
「二火毋，伊佫kā汝拍？阮同鄉黃家文予伊拍三過，韋東石拍兩過，趙恆通拍一過，我taⁿ猶毋捌予伊拍著。」
「幹！即箍雜種！伊勿會好死！」
從當初時拄拄捌吉莉到taⁿ，林達感覺吉莉soah愈來愈愛chhoh-kàn-kiāu。莫怪hiah-ê老船員有時仔會講，佇船頂ná久，儂儂性地都（to）會ná躁性（sò-séng），ná粗喙野斗。Kiám-chhái有影按呢to̍h著。
「林達，拄仔趙恆通來kā汝彼本《包法利夫人》摕去看。」黃家文佇邊仔插一句。
「我看猶未了咧……ah嘛無要緊啦，橫直我猶有別本通看。」
……
黃家文看林達睏kah kō·ⁿ-kō·ⁿ叫，想著家己逐暝按呢反（péng）來反去睏攏勿會去，有影真怨嘆，嘛對林達有法通現倒落去現睏去，真正欣羨。

無疑悟（bô-gî-gō·）睏林達頂舖彼个越南儂楊文效彼爿hia soah teh si̍hⁿ-si̍hⁿ-soa̍ihⁿ-soa̍ihⁿ，黃家文氣kah，我父啊，到底是卜hông睏抑毋hông睏啦！

有時仔，另外一个越南儂阮懷南會來kiau楊文效做夥睏。阮懷南生做較白綿，較幼秀；楊文效歲子（hoè-chí）較細，講拄十八歲niā，看著有影胖皮（phòng-phoê）胖皮、古錐古錐。雖然無開燈，黃家文照原有看著阮懷南kiau楊文效攬攬做一下。

本然著teh勿會ka-choē啊，好死毋死，soah佫來聽著對面床傳來的怪聲，黃家文感覺勿會輸比teh予儂凌遲、予儂苦毒較慘！伊頭殼疼了了，失眠的確比死都（to）較食力，伊真正欣羨林達，毋管風湧（hong-éng）偌大，船hián kah偌厲害，林達照原若菜豬咧，睏kah大水流去嘛毋知儂！
……
1月10號透早，船行到毛里求斯的路易港，林達目睭擘金，面前一片青山綠水（chheng-san lio̍k-súi），的確好景緻！頭殼內隨浮出一首詩：

Thàu-chá siúⁿ Lō·-e̍k-káng
透早賞路易港
Phek-hûn chheng-thian soaⁿ liáng-sóng
碧雲青天山涼爽
Po̍h-se hui-bông chháu-ba̍k ōng
薄紗飛濛草木旺
Gîn-o· khin ùn chúi-iaⁿ tiong
銀鷗輕揾水泱中
Chhiah-hî lî chúi thâu seng thóng
赤魚離水頭先捅
Hún-tāi ka-jîn le̍h iám hông
粉黛佳人笠掩紅
Liâng-hong chhoe lâi mn̂g-sui tōng
涼風吹來毛蓑動
Bûn kun in-hô lâi thám-hóng
問君因何來探訪
Bâng-bâng put-ti chāi chhú tiong
茫茫不知在此中

彼个時陣，有看著一个少年諸姥，頭戴一頂有罩（tà）紗巾的遮面笠（jia-bīn-le̍h），徛佇路頭仔邊，「彼是siáng啊？」林達問邊頭的工友。
「敢（káⁿ）代理商較濟，船佇毛里求斯m̄-tān-nā添油niā，船頂的管事kiám-chhái卜落去買寡物件，hiah-ê著是kiauin有交接的代理商。」陳二兵應話。
「代理商計計（kè-kè）啥物儂啦？」
「敢（káⁿ）計是大陸儂抑是台灣儂，橫直，計是唐儂（Tn̂g-lâng）to̍h著啊。」
「二兵兄，小等一下，毋知會使泅水勿會？我有紥游泳褲kiau目鏡。」
邊頭彼个二火聽著，開喙著kiāu，「幹！汝毋驚毛里求斯的警察kā汝掠去吊猴喺（hèⁿ）！」
陳二兵嘛綴喙（toè-chhùi）講，「林達，咱卜來做空課的，毋是來se̍h chhit-thô看光景的！」
……
無偌久了後，彼个諸姥著有chhoân果子、麥仔酒hām佮一寡別物倒來囉，hiah-ê攏是船頂計劃（kè-e̍k）卜採買的物件。二火kiau 大車去咧結數（kiat-siàu）。物件貴死死，一箱細細箱的葡萄soah著200箍美金。二車陳文揚嘛kheh ùi頭前去，物件伊無買半項，話屎soah較濟狗毛，「小姐，汝佗落一位的儂啦？」
「浙江。」
陳文揚佫問，「是大陸的毋？」
「汝毋咧愛講，浙江毋是大陸的無是佗落？」諸姥抵（tú）一句。
陳文揚細細聲仔kā問，「咱來借問一下，佇毛里求斯chia佗落有通開諸姥？無汝kā阮牽線一下…」
無疑悟（bô-gî-gō·）彼个諸姥面仔隨loah落來，越頭過，毋願佫插（chhap）陳文揚。
「小姐，小等一下，阮船長講卜揣汝有代誌。」……
「哦。」彼个諸姥choâⁿ行ùi駕駛室hia去，林達有近倚kā看，量其約仔敢（káⁿ）有三十歲，皮肉是不止白，枝骨仔嘛勿會bái，算講泛泛媠著。

看著彼个入去駕駛室，二火soah佇邊仔kek詼諧（khoe-hâi），笑kah一支面強卜散形去，勿會輸ná豬哥神下凡。的確有影「儂teh食米粉，伊teh喝（hoah）燒」！

約略半點鐘後，彼个諸姥chiah落來，一个面soah紅記記。

〖未完〗

Tagged: 講古