中國式的平衡

《中國式的平衡》

——(中國四川省2013年高考 評零分的作文 閩南語翻譯版)

我看著即个主題雄雄煞真愛笑,喺(hēⁿ)啦,無毋著,我真愛笑。我勿會輸按即張考卷做鏡去看著改卷先生漚臭掛生驚的面腔(bīn-chhiuⁿ)。
照媒體佇咧報,近十年來厝價起卜20倍有較加,所有遐个有長志(chiáng-chì)想卜拍拚的少年儂予厝價硩到勿會喘氣的時陣,是佗位咧平衡?普通百姓一月日所趁略略仔通買半平方闊的磚仔角,汝看儂「錶仔兄」一桗(tè)錶仔出手著是幾若萬,「錶仔兄」講伊即款錶仔猶佫十幾桗著。「錶仔兄」佫講伊北京遐猶幾若套厝佇咧。聽到我舌仔吐吐。
好佳哉,紲落來佫出一个「厝婆」押尾。厝婆用伊的所行所做共錶仔兄講「唓!少年的,汝彼尾掌指仔爾啦!」照媒體咧報,厝婆佇北京上無有十外仔外套厝,有四本戶口簿。戶口攏真的,連身份證嘛有四本。即聲,我毋但舌仔吐吐爾,連喙仔嘛紲裂去,拍算愛袒(thīⁿ)去八九針則會峇(bā)。聽咧講,有關部門攏無儂做聲,無儂擔當責成,無儂坐(chhē)尾份。臨當時,我平衡啊。
佇咧富二代駛跑車、手抱花坫學堂內拋七仔的時,佇咧跑車貫貫叫(kǹg-kǹg-kiò)的聲佮臭蘞的烏煙濺按我面chiáⁿ的時,我咧想,是按怎阮阿爸毋是李剛?即號慍忳(ùn-thùn)的觀念直直坫我頭殼內滾絞、生湠,舞到我強卜蔫(lian)去。注死毋死,是郭美美同學的代誌來共我點醒。親父靠毋住的時,其實猶有一號儂叫做契父。可惜即號流擺,契父較無咧認契後生。
佇咧救死助貧的中國紅十字會數目對勿會和的時,佇咧郭美美展伊規身匡金銜銀(khōng-kim khâⁿ-gûn)的時,佇咧有儂喝卜審查郭美美的時,美美共亻因唱(chhiàng),「姊仔我手頭有17.4G奒(hai)的視頻佇咧。」一時,紅會頭家緊猛(kín-mé)出來洗清:無儂講卜查伊啊。郭美美同學用所講所做保衛家己的利益,顯明新一代少年儂高貴品行(phín-hēng)。伊用彼白拋拋、幼咪咪的骹腿,一擺紲一擺徛起咧紅會上懸的領賞檯頂。
平衡?我嘛定定想卜平衡過日。遐儂儂平等,遐法制齊備,遐城管勿會拍儂,遐校長勿會開臊,遐醫生致意治病。啊毋過,我生佇即號社會,逐日咧嗍污穢(ù-è)、垃圾(lah-sap)的空氣,食彼號隨時通討命的物。聽見薰草公司的局長講公積金有成百萬,我想卜借問一下,恁敢有平衡?恁敢卜信中國夢會成(chiâⁿ)?管潲恁卜信毋信,橫直我卜信。
佇咧黃浦江遐萬外隻豬胚相招跳江的時,我知影我若佫毋平衡,我的結局決定摻亻因差無偌。我直直眏望通平靜度生活,遐官員清廉實在,遐生理儂良心討趁,遐厝價小可懸但定無講真譀,遐人民安和樂利。
佫差較無幾分鐘著卜交考卷啊,我知影我的作文鑿(chha̍k)著改卷先生彼粒小小的心肝穎(sim-koaⁿ-íⁿ)啊。零分啦乎,我共恁建議一下。凡在,我是無差,嘛無驚。三枝筅仔(三聚氰胺)都共我筅無死啊,一个零分又佫會當按怎樣?毋好佫頓蹬啊啦,分數趕緊凊彩畫畫聿聿(u̍t)咧,嘛通趁早轉去跋麻雀……

ps.中國四川省2013年高考命題作文,頭序有限定題材範圍(看下底),愛儂照伊限定的去寫。即个省有一个考生,寫一篇作文,訕削譏刺當今社會現實,文句樸實,因為按呢,聽咧講路尾得零分。

「有人說:過一種平衡的生活——學些東西,想些問題,做些事情,打打球,針對這種說法,同學們展開了熱烈的討論。請根據以上材料,結合自己的體驗與感悟,寫一篇不少於800字的文章。  
1、文體自選;
2、不得抄襲,不得套裝;
3、用規范漢書書寫」

Tagged:

發表迴響

你的電子郵件位址並不會被公開。 必要欄位標記為 *

*