牽豬羔

『牽豬羔』,佇往過農業社會通講是一種較下路(kē-lō͘)的空課,總是三百六十五途,逐途都有儂做。空課毋驚下路,認真做,骨力做,著會出頭天。往過,潮州所在,真濟儂佇鄉里無tè討趁,過番去到『暹羅(Siām-lô)』的第一濟。去遐牽豬羔的,嘛真濟。潮州所在,當今有流傳一寡古早話:求生無計過暹羅,來去暹羅牽豬羔,趁有趁無加少好,寄轉唐山飼公婆。
牽豬羔
講著『豬羔』,台日大辭典記載不止濟條,現實當中咱嘛定定有聽著足濟趣味心適的俗語話,糊出來分咱逐个公家看,做伙來唸。

1、牽豬羔——趁暢。(看別儂做代誌、得著好空的,佮伊無瓜葛,伊佇邊仔咧空歡喜。)
2、豬羔姆仔伴五娘賞花。(無身份無地位的儂,卜趁儂的樣,學儂的款,毋知見笑。)
3、豬羔鼻、雷公喙。(講儂生做真bái,真怯勢。)
4、猴敢死,豬羔kah咧毋敢無命。(汝咧毋驚死卜拚,我則無咧戇像汝按呢。)
5、猪羔使喙噈(chhùi-chhok)。(出一枝喙咧講,毋出力,無實際行動。)
6、飼豬成豬羔,飼鳥成伯勞。(做代誌會成,見做見會成,做即項,即項成;做彼項,彼項成。)
7、猴死,豬羔也無命。(=狗死,狗蝨也著無命。定著的,未走閃得。)
8、老猴豬羔精。(講老伙仔老不修,五枝鬚,豬羔神帶真重。)
9、豬囝飼大毋認豬羔做父。(契兄囝飼大漢毋認老父。)
10、豬羔牽對牛槽去。(豬母牽對牛墟去。)
11、斯文豬羔。(外口看是真斯文,事實暗靜有夠豬羔。)
12、豬羔假聖賢。(罵假斯文、真豬羔的諸夫儂。)
13、牽豬羔 拍毋見錢——無彩潲。(無彩工、加了戇工。)
14、看是卜死豬哥,抑是卜死豬母。(無論如何,決定卜輸贏一下。)
15、閒儂毋做,卜牽豬羔踅chhit-thô。(無事討事、討攑枷,家己揣麻煩)

Tagged:

發表迴響

你的電子郵件位址並不會被公開。 必要欄位標記為 *

*