《閩南方言大詞典》07年1月尾出版

有上新的消息咧報講,大部頭《閩南方言大詞典》將卜佇咧2007年1月尾出版。即抱詞典,從規劃到出版,攏總做幾落年,kan-ta編寫的過程著用去三年較加的時間。詞典主編人是廈門大學中文系的教授周長楫先生。聽咧講,即抱詞典攏總1500幾頁,厚kah ná親像hit-lō磚仔頭,外界評論講這是歷來頭一抱將廈漳泉三地閩南語言合(kap)做一下,詞條上蓋齊全(chiâu-chn̂g)的辭典。 

  
    
對著即本咧卜出版的詞典,設使朋友若是猶佫有印象,應該會記得本網站捌佇舊年做過相關的報導。根據瞭解,詞典是由著廈門市娶頭,招來廈、漳、泉三地專家做 伙編寫。按算當做“十一五”中間(2006年—2010年)国家重点图书出版规劃的一條專案,嘛會當講是送予社會群眾的一項大禮,由福建人民出版社出版。

在咱瞭解,即本辭典,收錄在地廈門、漳州、泉州三所在的語詞攏總一萬六千外條;另外一部分佮普通話相對應的,量其約仔嘛有兩萬條的跤兜。原味的在地語詞,攏有標記廈、 漳、泉無siâng款的腔口,佫有解說語詞的涵義,有的soah佫hām古漢語來咧做聯繫佮排比,稽考本源。詞典猶佫採收bōe少閩南俗語話佮一寡hām 在地文化有關的詞條。聽咧講,詞典裡底所比的例句嘛有夠濟,毋kan-ta是閩南三地niā,佫有講著臺灣腔,真正攏是 揀kah仁仁 chiah有chhoân出來,品質免講嘛一粒一。安呢牽過來,giú過去,有議論,佫有通比對,真正不止有意義佇咧。

毋nā安呢niā,詞典佇咧附錄即部分,嘛有安排精彩的內容,有影足澎湃,佫有夠chheⁿ-chhau!佇附錄部分,有介紹廈、漳、泉三種音系無 siâng的個性;嘛有介紹百家姓的唸法、天干地支、中國歷代紀元(朝代)、中國各民族、各省市的名稱,世界五大洲的國家名。Chiah-ê攏有做一个拼 音表提供予儂查詢。對著一寡較oh理解、較深的閩南話語,嘛有做拼音對照表。

安呢看來,即本詞典確實是按各方面對閩南語言詞彙做介紹佮說明,內容的確不止澎湃,會當滿足讀者濟方面的需要。會使講,不但實用,佫有學術味;徛在辭彙學佮漢語史研究,佮對臺關係研究的角度來講,即本詞典真正不止有價值佇咧。
    
為著卜予讀者使用的時陣,會當佫較利便寡,聽講買《詞典》另外佫有合(kah)送一tè光碟片,裡底有灌差不多4萬外條的詞條,攏全錄一寡廈漳泉三所在無siâng的講法,提供濟種檢索(kiám-sek)的功能。

(by limkianhui  / 2007.1.18)

Tagged:

1 comment

發表迴響

你的電子郵件位址並不會被公開。 必要欄位標記為 *

*