煙雨閣(一)

劇本類型:古風 苦 濟儂 短篇
語言:閩南語
版本:譯本
原篇:灰帝
譯者:有閒來坐
戲腳:狂狼(男) 甜心(女) 無極(男) 素珍(女)
背景音樂:無限定

唸白:佇某朝某代某年某月,佇京城有一落漚古又佫陋渣的樓閣,無儂知影這樓閣是底當時起的,著敢若親像雄雄按天頂尾落落來的共款,一暝無看見爾 著煞現暴(bok)出來,真正有夠神奇啦。來來去去的過路儂總是感覺,便若遘到暗暝時內底著敢若有仙女咧唱歌跳舞,真正是奇妙。有足濟官宦貴人想卜入去內面行行看看咧,不而過毋知怎樣,較按怎都無法度入去,巧怪啊。因為按呢,煞愈予儂感覺神奇。逐个乾焦會當按樓閣的牌匾看出伊號做「煙雨閣」。

煙雨閣門口,儂過來過去,誠鬧熱。

甜心:哼…公子爺舍!這本小姐的代,愛汝管!

狂狼:哈哈……當今京城,猶無彼號本公子勿會使插的代誌。小姐,本公子看合意汝是汝的福氣,汝毋通船帽毋戴,卜予儂拍破。

狂狼手一下拽,連鞭五六个家奴竄出來,共甜心插咧,強強卜拖咧走。

甜心:(凄慘)啊…救儂啊!

無極:(大聲喝)擋咧!好大膽啊恁!當頭白日搶諸姥,敢有王法?!

狂狼:哈哈……王法?我著是王法!阮老父是當今皇帝的親小弟“八親王”。這京城內中看啥儂有才調共我按怎?臭小囝,我勸汝毋通家婆,家己顧予好較好。

無極:王爺是按怎?皇帝犯法嘛著判罪,佫較莫講是一个王爺!

狂狼:哼!既然汝目潲無摳,按呢著毋通怪我無客氣囉。來啊,共拍予死!

話講煞,彼五六个家奴隨衝倚去卜拍儂。

(嘭嘭,呯呯……拳頭聲)一目[目聶],五六个家奴全伏(phih)佇塗骹兜……無極寬寬仔走倚狂狼遐去。

狂狼:(大聲嚷)幹!一岫無路用的骹數,六个拍一个拍勿會贏,食了米!
【狂狼看無極直直倚來】汝…汝卜創啥?汝毋通倚來喔,我是八親王的囝,好膽汝共我磕一下仔看māi。

無極:王爺囝是按怎?王爺囝著會使為非糝做,會使搶諸姥毋?哼!我今仔日著是卜替天行道,好好共汝教示一下。

狂狼:(驚)毋…毋通啦,毋通共我拍啦,汝卜挃啥我攏予汝。汝卜錢抑是卜諸姥,我攏會使予汝。

無極:哼!到即號坎站啊,猶佫死勿會改變(koé-pìⁿ)。

【嘭啪!狂狼予無極揌兩下,暈暈死死去】

無極:姑娘,汝有按怎無?

甜心:(畏小禮)我無要緊啦,多謝公子出手相救,民女真感謝。

無極:姑娘毋免厚禮,路見不平拔刀相助,應該的啦。

甜心:若按呢民女佇遮佫共英雄說一句多謝。

無極:嗯!請問姑娘厝徛佗落?在下送汝倒去。

甜心:(吼)公子……我在本是江南儂,因為厝裡拄著劫難,一家大細數百个一暝中間予一个遮面儂刣死了了。乾焦我出外口逃過即劫。毋過,阮阿姑看我無目地,共我趕出來……我無依無倚,獨身四界流、四界攆(lìn),攆來到遮。

無極:喔。按呢…小姐若無棄嫌則來去我遐小蹛一暫。

甜心:這哪會做得啦,我按呢一个諸姥,去蹛佇汝遐驚得無啥利便。

無極:無要緊無要緊。我蹛佇頭前煙雨閣,內底足濟兄弟姊妹徛鬥陣。亻因攏是英雄俊傑嘹。

甜心:(昂愕一下)啊?煙雨閣?敢是彼間神奇的煙雨閣?

無極:嗯。阮閣主神通廣大,儂良善好禮,行,綴我來去,亻因決定真歡迎汝來。

甜心:若按呢,勞煩公子汝囉。

【甜心自按呢綴無極來到煙雨閣】

素珍:(撓話)無極兄,汝則出去一目[目聶],現煞綴一个嫷姑娘仔轉來,桃花運咧行啊喔!

無極:素珍妹仔,即位姑娘是我佇半路拄著的,因為厝內有難,又佫拄著歹儂創治,無依無倚,我著共伊[毛灬]倒轉來。

素珍:無極兄汝真[敖]講爽笑,看儂生做一蕊敢若花,佮汝有影不止四配,敢講,汝是看合意伊?

無極:(歹勢)妹仔毋好烏白講,我是看伊無依無倚,可憐伊,則共伊[毛灬]轉來,斷無濫糝想。

素珍:哈哈…無極兄,汝講白賊喔?無?無汝面哪會紅?哈哈

無極:哈!汝真正欠推!毋…毋佮汝講囉……即位姑娘著交汝去照顧喔

素珍:是,遵命~【講煞,著去牽甜心的手】姑娘,汝號做啥名?

甜心:阿姊,我號做甜心。

素珍:甜心,好名。此去汝著坫遮蹛,我教汝學唱曲。

甜心:好啊,多謝阿姊。

【甜心自按呢徛蹛煙雨閣。此後又佫會發生啥物代誌,請看下期分解】

——The End!——

煙雨閣(三)

Tagged: ,

發表迴響

你的電子郵件位址並不會被公開。 必要欄位標記為 *

*