山豬牌紥布

山豬牌紥布,薄佫輕,芳芳涼涼,清爽佫次序,便宜佫利便,予汝放心仔紥,安心仔睏,勿會漏勿會滲(siàm),規暝睏爽爽,照顧汝一暝到天光。

有的好朋友敲電話來咧問,山豬牌紥布到底有啥路用?我共恁講,好朋友,這山豬牌紥布真正世界第一等,三界頭一號,卜講有偌神著有偌神,有偌聖著有偌聖。好朋友,無講汝毋知影,頂一暫仔,有一个烏肉桑來相揣,講伊即世儂燒香拜佛攏跋無桮,問我看有啥物秘訣無,我看伊挐頭鬖髻,鼻樑倒垂,雙目失神,額頭反烏,敢是災厄臨頭,指示伊規氣買一包仔山豬牌紥布轉去改運兼致蔭。無疑隔轉工伊煞斡倒轉,我看伊走到噼啪喘,問伊敢是厝內著賊偷抑按怎樣,伊煞笑咪咪,講伊煏啊,發啊。我問伊當是高壓鍋煏啊抑是香爐發啊,伊煞講是專工卜來答謝我,講伊拆兩桗山豬牌紥布去咧做尚桮摕去廟裡跋,無疑真正出尚桮,害我笑到卜歪腰。

好朋友,汝毋通想講是我咧烏白講、濫糝嚼(cha̍uh)吶。山豬牌紥布,毋但會當做尚桮,佫會當做鞋墊,寒的時陣摕兩桗仔埾咧懸搭鞋底,勿會過風佫會燥骹液,順紲通好醫治汝的香港骹,真正是一兼二顧,摸蜊仔兼洗褲。好朋友,山豬牌紥布,功能路用是真濟,會使做手巾仔,嘛會使做餐巾紙,汝若是環衛工抑是醫生儂,會使買轉去做口罩;好朋友咧洗身軀若一時捎無內衫褲,這山豬牌紥布摕去綻綻咧聽好做buh-lah-chiah;啊若著傷流血會當做空喙貼,無柴燃火會當做甘蔗箬,痔瘡流膿的時陣嘛會使摕來包、摕來紥,厝內無鞋會當順紲摕來做淺拖……好朋友,山豬牌紥布路用實在有夠濟,卜講是規草籠,規布袋,若有欠用,趕緊著倚來買。提醒好朋友,愛認明,山豬牌紥布,嘜頭(ba̍k-thâu)有畫一隻痟豬羔喔,愛看予清,看予明,毋通去買毋著,啊若無,是真囉唆。

山豬牌紥布,福建總經銷:
地址佇:西山縣城建發南路58452-58452號(我卜死予伊,我卜死予伊);
電話:50806449(我恁父啉尿嗍嗍叫),外埠頭 頭前加敲0596;
聯繫儂:@西山-豬羙兄
廈漳泉各大藥店攏有咧賣。

好消息好消息,年兜大削價,拚俗貨,一項一項來共拚,寬寬仔拚,趕緊拚。山豬牌紥布,加買加送,無買無送。散賣,一包十箍半,買十包送一包;十二包一打,算批發價,批發一打,百二箍有通找。卜買,骹手愛緊喔,緊來啊!

Tagged: , ,

發表迴響

你的電子郵件位址並不會被公開。 必要欄位標記為 *

*