「阿叔阿叔，買一包仔啦！來買一包仔衛生巾啦！」諸夫囡仔三骹趒兩骹跳，透風透雪佇咧街仔路賣衛生巾，無儂知伊按佗bok出來的，規條街仔路蹔到卜塌（lap）去，無儂卜插伊。彼號流擺，儂心真正比天較凝，比雪較凍。諸夫囡仔勿會曉通去想遐濟，伊乾焦知影沿路行，沿路問，看有儂卜買無。即个囡仔生做黃酸酸，sán卑巴，穿一軀破衫破褲，寒到蟯蟯呻（ngia̍uh-ngia̍uh-chun），看伊規掩肚仔（iám-tó͘-á）櫼（chiⁿ）滇滇，一包一包全衛生巾。伊知影今仔若賣無了，暝昏決定著枵憖寒。伊驚枵毋驚死，老父拍了佫較雄嘛猶較輸彼號枵寒的凄慘。

「阿叔！」諸夫囡仔臨當時看著一个穿到褻體（siat-thái）襒紮（pih-chah）的中年儂按對面行過，趕緊癲過去問，「阿叔，買一包仔啦！來買一包仔衛生巾啦！」

「走走走！啊閃啦！汝是捌看過諸夫儂貼衛生巾喔？！毋成囡仔…」中年儂敢若足歹聲嗽。

「啊…無汝嘛會使共恁太太買一包……」諸夫囡仔講話小可仔驚驚。

「買恁娘啦買！去hông箍啦！走啦！」中年儂臨當時起性，出力按諸夫囡仔倒爿喙phoé瓜仔括落去。諸夫囡仔按塗骹peh起來，勿會死心佫再緝去，結果腹肚邊佫加趁一對皮鞋印。

「哪會按呢，是按怎無儂卜買我的衛生巾……」諸夫囡仔蝹蹛咧破牆角，iam一包衛生巾出來貼佇hia̍h-chiáⁿ頂閘風。伊翻過身，敢若看著玻璃彼爿有一个諸娘仔（chu-niû-á），拍算敢是來月經，一手捏（ji̍h）下腹仔，一手捏（lia̍p）衛生巾，按廁所間衝去。

「哇，即个阿姊真正福氣啦，會當蹛咧遐呢仔次序（sù-sī）的廁所裡紥衛生巾……」諸夫囡仔想到遮，又佫看家己穿到破糊糊，頭頕頕（tàm-tàm），目屎強強卜滴落來。伊想無是按怎平平是儂會差遐濟，哪會有的有才調用長長長、薄薄薄的衛生巾，啊有的煞連飲糜都無通孝孤。

雪愈落愈大，諸夫囡仔趕緊佫拆一包衛生巾，貼佇骹頭趺破空的所在，想講通閘風，毋過，這細細片衛生巾雖然暫時掩崁著衫褲的破空，煞勿會當補绽（pó͘-thīⁿ）伊心肝頭的空喙。諸夫囡仔咧想，若有法通勿愛賣衛生巾，來賣空喙貼（khong-chhùi-tah：創可貼）毋知卜偌好咧！雪那來那大，路頂的過路儂那來那少，諸夫囡仔撏（siâm）著規掩肚仔衛生巾，卜哭無目屎，痀蹛咧牆仔角，勼到一隻若鵁鷦，凄慘歹命。

諸夫囡仔佫拆一包衛生巾，伊看著…看著全城的諸姥囡仔攏總來月經，攏總來搶卜買衛生巾，伊趁足濟足濟紙字。

諸夫囡仔又佫拆一包衛生巾，伊看著…看著諸姥囡仔月經按一月日一擺變成一日一擺，逐个相爭搶，伊的衛生巾賣到無貨通補，交易（ka-ia̍h）佫利市。諸夫囡仔順勢辦一間衛生巾生產工廠，伊嘛結婚啊，娶一个嫷姥，逐工予亻因姥紥彼號通世界品質上蓋讚的衛生巾。

諸夫囡仔共遐个（hiah-ê）衛生巾一包一包直直拆，伊看著遐个諸姥囡仔來月經的時陣歹勢佫閉思（pì-sù）的面容，看著遐个買無衛生巾佇咧煩惱到趒骹頓蹄、焦心憋腹的父母，看著家己毋知底時嘛變做諸姥的，嘛趁儂咧紥衛生巾……

諸夫囡仔臨當時soah勿會感覺寒啊，佫感覺敢若直直想卜飛。龜怪，儂明明都無生翼，哪會想卜飛咧？諸夫囡仔趕緊伸手去摸尻脊（ka-chiah），夭壽！毋知底時soah真正發一對翼股仔出來！啊，毋著，是一對葉仔，嗯，葉仔！諸夫囡仔飛啊飛，飛啊飛，飛去到女兒國，伊知影佇遐勿會去枵著，勿會去寒著，勿會艱苦，嘛勿會歹命……但（nā）有是隔一暫（chām）仔著愛等28工，雖然28工小可久久，毋過，真活樂（hoa̍t-lo̍k），真快活，真幸福。

ps.後記：

衛生巾，是現代科技進步新發明的物件。古早時陣，無衛生巾，攏用一種名號做『紥布』的物件。

Tagged: 講古, 講天講地, 講笑詼