昨昏頂晡，廈門衛視慶祝開播兩週年，siâng時佮台灣萬星傳播股份有限公司交換合作契約，雙方約定佇咧無偌久以後將卜聯合製作一齣閩南語生活片。這嘛是中國頭一齣閩南語情景劇，片名暫時號做《一定beh幸福》，聽咧講戲翕了後，卜siâng時安排佇廈門衛視佮台灣東森綜合臺播出。

根據瞭解，即齣戲大多數會安排蹛廈門翕錄，地點會揀佇咧鼓浪嶼、中山路，抑是講環島路chiah-ê所在。

戲齣總製片是台灣儂，名號做蔡見賢。主要的演員有三个，嘛攏全台灣藝人，聽講是張靜儀、王中平佮玉尚。Chhun-ê一寡較無要緊的演員，按算蹛廈門在地公開來招。

劇情主要描述兩个家庭中间的生活交插、情愛瓜葛，親像大家（ta-ke）新婦 即款的人情細事、亲情義理。兩家伙仔儂，一家佇廈門，另一家佇台灣。

戲齣暫時猶無法通按算攏總卜翕偌濟集，劇本嘛猶佫佇咧寫。編劇是一个佇廈門蹛十外外年的台灣儂，聽講伊兩爿的情況攏真熟似。翕戲的手路，攏全採用台灣現時kài時行的做法，那翕那播送，不而過聽講卜比台灣戲做了佫較幼路。聽講，代先會先翕一个单元，翕煞了後開始播送，了後看觀眾的氣口啥款chiah佫來調整下一个单元的剧情、佈景hām演員的安排等等。幕後製作團隊嘛台灣儂為主，經驗不止豐富，做代誌是ná桌頂拈柑，輕鬆kah有chhun。

根據瞭解，進前台灣閩南語電視劇《青龍好漢》佇廈門衛視台播放，收視那chhèng那koân，相連sòa 13禮拜摕著廈門地區黃金檔的第一名。廈門衛視有關人士表示講，閩南語劇市場效益真讚，“真正會趁咧”，未來的確卜佫加大即方面的投資。

Tagged: 藝界