廈門囡仔,毋講閩南話

2007年1月9號,《廈門晚報》發表一篇佮調查訪談有關聯的報道,本站摘錄中間的一小部分,翻做閩南語,儂客來看māi……

廈門松柏中學(Ē-mn̂g Siông-pek Tiong-o̍h)高二年級的諸姥(cha-bó·)學生黃瑜(N̂g Jû)用去4月日的時間,對廈門市中學生使用閩南語的狀況做一个調查。無偌久進前,黃瑜將伊調查的結果發表出來,引起社會各界紛會,十喙九尻川(kha-chhng),意見是一儂一樣,無儂親像。

學生囡仔黃瑜是佇咧兩位學堂(o̍h-tn̂g)先生林亨生(Lîm heng-seng)佮戴永萍(Tè éng-phiô)的指導下,對一部分佇學堂讀冊的閩南籍同學做問卷調查。伊攏總發出268張問卷,收轉來235張。調查發現講:真濟學生囡仔對著閩南語自底有的語詞愈來愈生份,有的攏全聽無。比論講,大多數接受訪問的學生囡仔,毋知影“浪費”即个词闽南话愛講做“phah-sńg”,kan-ta會曉照普通話的講法硬翻落來。一寡閩南在地的俗語話、成語,佫較是bōe曉了了;大部分儂攏全毋知影hiah-ê俗語話到底啥物意思。

黃瑜伊感覺講,即款狀況實在真害,應該著愛趕緊來轉變,伊講即陣真正是“火燒鼎臍”的坎站囉。

調查顯示講,接受採訪的閩南籍學生,較加80%的儂會曉聽、會曉講閩南話。不而過,猶原有10%的儂kan-ta會曉一寡真普通真普通的日常用語;ah佫有4.4%的學生攏bōe曉講,嘛bōe曉聽。這掠外,有將近卜10%的在校生從來(chêng-lâi)毋捌講閩南話;同學拄同學,定定講閩南話的儂kan-ta佔15.8%;七成較加的受訪者三不五時講一半句仔閩南話。

接受調查的學生,虽然猶佫有卜倚六成的儂佇厝兮講閩南話,不而過大部分kan-ta會曉一寡真普通的日常用語。另外38.6%的學生kan-ta講普通話niā。大部分家長主張講,定定講閩南話,別日囡仔講普通話會講bōe準(bōe標準),會有在地腔,所以家長無願意予囡仔講閩南話,連蹛咧厝兮嘛毋准in講閩南話。著是安呢,chiah致到(tì-kàu)愈來愈濟的在地囡仔bōe曉聽俗語話、古早話。

ps.有牽聯的:

百年後,閩南語亡去

Comments: 3

  1. 阿全 2008-12-10 at 16:00:54 Reply

    我希台灣人,台灣也有相同的問題,我很多來自台北桃園的朋友也都不會講閩南話,然後也很開心的說我聽不懂閩南話真是悲哀~~甚至於去她們家做客的時候。如果跟她們的父母講閩南話還會被他唸真是悲哀~

  2. limkianhui 2008-12-10 at 16:29:42 Reply

    @阿全:嗯,汝講的有影,我看電視嘛定定發現有真濟台灣囡仔bē曉講in的父母話。

  3. 阿濤 2008-12-13 at 20:31:13 Reply

    我歲不會說閩南話,但我很想學,也會說一點.而今看到廈門學生自己竟不會說自己的母語!誠實歹看1

發佈留言

發佈留言必須填寫的電子郵件地址不會公開。 必填欄位標示為 *

*