即號流擺，真正是痟的、戇的、歁的、悾的、孝呆的、半腦的規四界。關佇家己的門口兜，咧燒、咧毀家己用血汗錢買來的物件，幹！按呢號做咧抗議，號做咧愛國？愛恁老母的國啦。開錢共儂買物件，錢予儂趁去啊，即陣soah咧燒、咧毀、咧損蕩家己買的物件，哭枵。有才調衝去佮亻因拚，毋通圍坫家己門口埕咧喝爽。

釣魚臺是啥儂的？亻因老兄較好，規日佇新聞、報紙、電視、電臺、網路……一四界看著關係釣魚臺的報導，真正有夠煩，有夠齪（chak）。今仔日卜來講一个相關的笑詼古（chhiò-khe-kó·）。代誌講是按呢啦……

某國政府事實真無路幹，大箍菜頭——磅心，掠日本無伊法，規日乾焦會曉搬喙舌，練痟話，正經代誌無一症，予國民笑講『一暝全步數，天光無半路』，有夠兩光。進前，日本政府共『尖閣諸島』賣予個人仔，某國政府正經是喙窒膦，無話通講，事後則咧假死假tak，關門喝爽，喝講主權在本國，日本無權賣島。哈哈，汝共看，真正有夠阿Q啦。卸敗！因為按呢，著有某國的國民，出來建議某國政府『卜保釣魚島主權，有一招蓋好用，會當確保主權永久在本國，免佫驚日本仔搶去』，即招到底是啥，著是建議某國中央氣象臺咧報天氣預報的時陣，順绁含（hām）釣魚島嘛報鬥添落去，按呢儂看著，著會講『汝看，釣魚島猶佫佇某國的手頭，連天氣預報嘛咧報！』哈哈，即招真正好用，通講是『青盲仔娶姥——暗暢』。

佇咧新浪微博頂頭看著按呢的消息——

一个按日本出差倒轉來的朋友佇咧講，講佇日本街仔路頭的大屏幕嘛有咧轉播中國內地儂燒車、毀店面、損傢俬的電視鏡頭：痟到真悿的某國諸夫儂，peh起咧一把日本車頂頭大聲咧喝抵制日貨，車底覕一个驚到破膽的本國諸姥，路尾鏡頭放大，著即个諸夫儂身穿日本品牌的logo，鏡頭佫轉到邊頭翕像看鬧熱的本國在地儂，手裡嘛共款攑著一臺canon的像機！日本儂根本著是咧看一齣笑古。幹。有即號國民，有即號教育，有即號體制，有即號政黨，某國卜按怎樣仔會強？卜按怎樣仔會予儂看有目地？悲哀、卸敗。

莫怪有儂佇咧講，兩國猶未戰，日本著贏去了啊！日本無動著一兵一卒，悾戇的某國儂，著先將家已的傢俬墓壙、畻園厝地攏全摃捒、燒捒、毀捒囉。哭枵。日本不戰自勝。猶佫有啦，今仔日悾戇的某國内地儂，當咧配合阿共仔，咧共某一个蹛佇自由民主小島的同胞搬一齣現實版的國民洗腦教育成果展示課。

Tagged: 天災人禍