倒削《以早,我捌是一个下路ê中国侬》

(原文——華文:《反击“我曾是一名丑陋的中国人”》 作者:中国深圳 伍 2005-06-23)
前几日, 伫早报(注:联合早报)顶面看著一篇号做”《我捌做过下路(kē-lō·)的中国侬》”(華文:《我曾是一名丑陋的中国人》)的文章,看了感觉真bōe 爽。本然想讲hoān勢无侬会同意即款糞扫(pùn-sò)文章,無疑悟路尾soah收著幾若张共款的转发邮件,看勢是有必来回手一下,較bōe予侬白白 布染到乌。为著方便起见,下底用《下》文来代表迄篇代替迄篇文章。  《下》文作者写kah躼躼长,讲kah喙角全波,结无非著是:中国 侬四界呸痰、毋排队、乱矴糞扫、毋捌字兼無卫生、素質真害…所以是下路的中国侬;当中又佫掩khàm著另外一个结论:即个侬(作者本身)以早共款是一个下 路的中国侬,毋佫即陣bōe下路喽。(毋知即擺伊是毋是将家己当作是一个飘撇、高尚、有素质的中国侬?若chiâⁿ實安呢想,伊的脸皮著有影較厚屎礐 梆!)

讲到中国侬乌白呸痰、毋排队、无卫生即款不良习惯,咱食认,有影,啥物侬也bōe當诤讲無。若看bōe著事實,自欺欺人,有影 kài 可耻,不而过伫《下》文作者眼内,中国侬soah因此行到十足下路的地步,按即个侬吐出來的话屎当中,予侬产生即款的印象:全世界,整个的地球,四界 (sì-kòe)告示满满是,而且拢全写中文,写中国侬的见笑代!即个侬有影是hàm kah bōe穿蠓罩!若像全世界拢咧用中文,中文已经普及到地球上的任何一个角落,连臭水沟嘛拢有tah中文告示!先mài讲中文敢有影已经全世界通侬咧用,中 国侬敢有影一四界拢有tè拄——若chiâⁿ實安呢来讲,中国毋著沖kah無tè比喽!干凋beh讲hiah个标语,即个侬的观点是全世界即款的标语,干 凋用中文来写,干凋beh写予中国侬看的!有影譀古兼离經!略仔有淡薄仔智識的侬拢嘛知影,中国以外的国家,共款嘛常在(chhiâng-chāi)用 in 本国的文字来写、来警告侬“毋通乱矴糞掃”、“保持安靜”等等。日文写的、英文写的敢讲著無毋?伫中国国内,hiah-ê用英文写的警告标语敢讲是beh 中国侬看的毋?即个侬若是食饱閒閒無代誌,嘛聽好(thèng-hó)用baidu去chhiau看māi 咧!
《下》文作者伫文中捷捷讲一寡侮辱人格的语词:丑陋(下路)、毋知廉耻(毋知见笑)、弱智(愠忳、無头壳)、低贱(爛 chōaⁿ)等等——白纸乌字,讀者聽好去看,犹佫真濟伫咧。伊共家己pûn kah偌仔文明、偌仔缘投、偌仔巧、偌仔高尚,其實咧,ùi chiah-ê语词拄拄予咱看出伊本底的性素:一个真正下流、无耻、假君子真小人的術仔,比hiah-ê予伊看做下路的中国侬佫較下路!(本底無想beh 用即款语词,为著回手,孤不而将!)

即个侬竟然替日本仔讲话,讲中国咧干涉日本。看到遮,我开始僥疑伊敢真正是中国侬。伊那咧訶咾韩 国侬如何注心国家建设,佫那咧呸相(phì-siùⁿ)中国侬放蕩樂畅,毋涨志(chiáng-chì),磕bōe著beh干涉日本侬。敢讲伊拢毋知影韩 国侬是上kài 怨恨、上kài 討厌、chheh日本chheh kah 入骨的毋?咱承认“共侬侵略”佮“去予侬侵略”是无论过去、现在、抑是未来拢有可能发生的代誌,敢讲因为咱以早比侬較软汫(nńg-chiáⁿ)、别侬比 咱較勇健(ióng-kiāⁿ),in 著应该来共咱侵犯、亦咱著应该予in 侵犯毋?敢讲因为東條英機是日本侬的英雄,咱就应该bōe記伊是咱的冤仇侬毋?敢讲連beh詈骂侵略者也bōe使得毋?——安呢咱参亡国奴有啥分别?敢讲 讉責日本了後咱soah毋知通建设国家,毋知通拍拚奮鬥毋?實在想無即个侬头壳是安怎咧想!即个侬佫讲到日本侬、美国侬是安怎拄安怎咧紀念in 的戰爭英雄,我颠倒想beh问伊,伊是了解幾个中国抗日英雄咧?

即个侬佫讲著中国的经济。认为讲外国侬不時咧麻醉中国侬,有時暗勘中 国的成績,有時佫假意訶咾。咱食认确實有即款的外国侬伫咧,国内确實也有一寡侬,略仔出淡薄仔成绩著畅kah 逐项bōe记了了!不过,看即个侬的意见,若像全世界伊上知势,bōe输除了伊,著無侬了解代誌的真相。是讲,伊的真相又佫是啥貨咧?是中国根本無任何进 步,無任何成功,干凋賰“落後”佮“下路”。真正有够厚面皮汝看!我想大多数的侬拢会客观看待中国的经济,有成绩愛肯定,做毋著的愛改正,做无够的愛提 悬。烏白樂畅無較choa̍h,磕bōe著悲观失志、看輕家己佫較是毋通!

即个侬佫讲到中山市有一个护士小姐去印度旅游的代誌。凭 he,伊就认定中国伫亚洲比bōe著日本侬、韩国侬,连泰国侬嘛較赢咱。若中国咧?“哼!散kah鬼beh掠去!!”……連印度侬也毋相信去旅游的黄种侬 竟然是中国侬。讲著這,干凋会当说明一个问题:即个侬oân仔佮hit个印度侬共款:古井水鷄,毋捌食过猪肉佫毋捌看过猪行路!

即个 侬又佫讲到世界顶的三个民族,伊认为he是上kài 优秀的三个民族:德国侬、犹太侬佮韩国侬——當然bōe包括中华民族——佳哉伊犹毋敢共日本侬算在内。咱無beh議论别的民族安怎拄安怎,不过咱知影,凡 物(mi̍h)拢bōe使脱离各自的环境,干凋用个别数字來做断定佮评判。也著是讲咱bōe使用即款步数來判定佗一个民族較优秀、佗一个民族較無路驶。可 比讲,即个侬摕(the̍h)德国GDP佮中国的GDP來相比了後,竟然得出“德国侬比中国侬較优秀”即款的譀古代!咱實在毋知伊讀册讀伫佗位。亦若 (iah-nā)讲到“诺贝爾奖”,咱beh请伊先去了解一下仔诺贝尔奖的背景佮世界政治局势的背景,了後chiah佫來讲。若讲著战争,输赢佫較是平常 代誌,是啦,中国有影予侬拍败过,是讲世间是佗一个国家毋捌予侬拍败过?亦是安怎毋讲汉唐盛世咧?巴勒斯坦侬受以色列犹太侬的压迫,到taⁿ犹咧为建国大 業拍拚奮鬥,無beh认输,亦若照即个侬的思路,巴勒斯坦侬毋soah比犹太侬較优秀?!伊佫放風讲韩国侬的国际地位較赢过中国侬,hoān勢有影啦,不 过he拢嘛靠實力咧做保证?亦佫会当算啥?敢讲這soah会使當做韩民族(朝鲜族)比中华民族較优秀的理由毋?亦若(iah-nā)日後换中国侬的地位比 韩国人較悬高,安呢毋著愛佫扳(péng)过來讲?朝鲜佮韩国敢毋是共民族的,這又佫怎样解说?干凋希特勒、日本仔会去鼓吹(kó·-chhui)啥物 “德意志民族是上优秀的民族、大和民族是上优秀的民族,别的民族拢總是糞掃!……”到尾咧?结果毋免我讲,逐家拢知!就使是安呢,無…上起码in 佫算讲是咧鼓吹家己的民族,亦若即个侬咧,伊soah咧鼓吹别侬的民族!真正卸世卸衆!

即个侬佫到著“AA制”。伊用“討厌”來比论 中国侬的作風,说明讲伊有影怨中国怨kah入骨!咱讲,中国侬佮美国侬,各侬的文化無共,“AA制”無一定 to̍h拢適合中国侬。美国侬beh安呢做原在有in 的因端。不而过,因为安呢soah予咱看出即个“土番仔”的虚伪,伊根本毋捌中国侬的人情关怀、毋捌中国侬的情感、伊看bōe著中国侬伫咧互相帮赠 (pang-chān)、互相悿痛(thiàⁿ-thàng);伊干凋看著伊本身佮伊的利益;伊干凋会曉有样学样!當然,话讲倒转來,咱毋是讲中国侬的做 法有偌好,不过起码咱嘛应该愛實事求是!Tio̍h著是tio̍h,毋tio̍h著是毋tio̍h!

讲到有一个中国的技工咧学習德文 的時,即个侬得出一个结论:漢语伫英语面頭前认路输的時,嘛共款愛向德語认输,讲13亿中国侬拢是一陣茬骹数(lám- kha-siàu),创造的财富比bōe著8000萬德国侬,所以汉语局不局(kio̍k-put-kio̍k)愛食認較输侬德语。這是啥款的理路?實在 譀kah無譜!若照安呢讲,he美国侬嘛咧学中文,安呢英语毋著愛自认較输汉语?!亦美国侬的素質毋soah佫較害?!總讲一句,即个侬不但看bōe起中 国侬、看bōe起中华民族,連中华民族的语言伊嘛看bōe起!咱真正想無中国犹有啥物物件伊bōe討厌的——我看,hoān勢干凋bōe討厌家己爾!

即个侬竟然佫讲到计划生育,佫較予侬生氣!英国番仔讲hit句“中国有上kài 讚的节育措施,因为中国諸母全世界上kài 下路兼愠忳!”這明显是經體佮侮辱侬。著是即句话,即个侬竟然认为he只不过是一句較特别的言语爾爾(niā-niā)!是安怎特别,伊無解释。颠倒 soah共(kā)国民的愤怒讲做是“神經过敏”!对即款的话,伊当然是無咧佮侬“敏感”,拍pho̍k仔著驚bōe赴咧,哪会敏感?!即个侬竟然用“下 路、爛chōaⁿ”來咧蹧蹋hiah-ê超生的母亲!毋知即个侬敢犹有做侬上kài 起码的道德佮尊重!伊無了解hiah-ê母親是安怎beh超生,無了解in 的生活佮想法!竟然佫用hiah-nī仔恶毒的話來經體in !就使讲(chiū-sú-kóng)hiah-ê母親生佫較濟,he嘛不过是in 一時想無到、受環境影响,或者讲暂時無了解飼囝艱难 chiah会安呢!in 的頭脑犹佫真傳统、真閉四(pì-sù),毋佫he绝對毋是“下路、爛chōaⁿ”,按無共的角度來看,in 嘛真伟大!即个侬用即款的言话來共侬抠洗,颠倒予侬感觉真正下路的侬是伊本身!

Ā好ah!我實在無想beh佫写落去喽。即个作者伊話屎較濟狗毛,佫写kah不答不七,無影無一迹,若beh一條仔一條宽宽仔(khoaⁿ-khoaⁿ-á)來共伊thuh,來共伊giah,實在是拍爽(phah-sńg)我的烏墨、了我的喙水。

即个侬ùi骨底看中国侬無目地,拍死毋做中国侬!因为中国侬犹未完全进化,垃圾(lap-sap)兼愠忳(ùn-thùn)!毋知即个侬敢有了解:伫中 国上kài 茬骹(lám-kha)的時陣,尊敬的吉鸿昌将军伫国外的时,胸前定定爱吊一tè有写“我是中国侬”的牌仔,he是为beh予天下间的侬拢知影讲伊是一个 堂堂的中国侬、有志氣的中国侬!伫国家遭受强摃(kiông-kòng)蹧蹋佮踳踏(thún-ta̍h)的時,有hiah濟英勇的华夏囝孫,为 beh做一个有志氣、有氣魄的中国侬,甘願性命放毋挃(m̄-ti̍h),也beh佮敌人拼生死!

即个侬写文章写kah长躼sò,按内底,咱聽好了解伊根底著是一个無民族自尊、無民族自爱、無民族自重的侬;一个食認衰bái、看bōe起家己、将外国侬当做in 祖宗咧奉侍的侬,伊的人格是hiah-nī歪choa̍i、失常!

即个侬将家己讲出kah bōe输若“真gâu,真排祉(pâi-chí),真了不起”,好親像全世界伊上文明的款。不而过,伊soah用“愠忳(ùn-thùn)、下路”即款卑 耻佫恶質的字眼来經體(keng-thé)中国侬;伊声声句句讲言论自由,毋佫soah共别侬的批评讲做是“有空咧chhōe無榫”!有喙讲别侬,無喙讲 家己。若像伊讲chiah著,别侬讲的拢总毋著!有影是号做“也beh做婊囝,也beh装婌女”,bōe見bōe笑!即个侬kán-ná佫因為家己 chông bōe著錢,咧bōe爽,竟然也佫讲出来,佫共責任在(chhāi)蹛别侬的身上,膦鳥歪牽拖尿桶漏,牛母bōe生牽拖厝邊,可見伊的面皮有偌厚,厚 kah三粒铳籽也拍bōe迵(thàng)。即个侬认为讲中国侬若拢讲究卫生、拢讲文明,安呢中国著随强起来、随勇起来,soah bōe曉通想讲,自开世地(khai-sì-tē)以来,hiah-ê出賣国家、出賣民族的漢奸、糞掃侬,拄好嘛是hiah-ê穿kah齊斩斩(chôe -cháⁿ-cháⁿ)、水噹噹的侬(親像讲“汪精卫”、“李登輝”即款侬)。咱讲安呢并無代表讲咱著会使毋免讲究卫生佮文明,這是两回事,魚還魚、蝦還 蝦。国民素質beh好,beh提悬,he需要国家的经济、文化等各方面同齊、共步來发展!国家beh强、beh勇,he需要咱愛有自尊、愛有志氣、愛共 心,愛有为国牺牲、奉献的意志佮勇氣!亦外国侬上惊著是即款的中华民族!

是啦,现taⁿ中国侬确實有真濟欠点伫咧,比論hit个作者 所讲著hiah-ê毛病。咱每一个中国侬嘛定著愛不断改进、不断提悬!做毋著的,咱愛改;做无够的,咱愛用心做。不而过,咱无需要自卑,无需要看輕家己, 咱愛有志气。这毋是大曳(tāi-ia̍t),咱需要用客观的态度来看待咱家己!

咱需要别侬的批评佮漏氣,嘛愛自我批评佮检討,不而 过咱无需要侮辱!亲像即种侬,用即款”东方不败式”的批评——“beh练拳頭,先割裤頭”,这咱需要!中国侬无hiah下路!无hiah爛 chōaⁿ!中华民族自三皇五帝开始,中华文化傳湠(thn̂g-thòaⁿ)五千年,毋是一半个仔恶質兼无才、狡怪(káu-koài)兼诙諧(khe -hâi)的讀册侬,凭三两篇仔糞掃文章著会当共车倒的!中华民族一屑仔也bōe输侬!中国历史上,分分合合,有汉唐的興旺,也有四散五路(sì- sòaⁿ-gō·-lō·)時的衰败,亦毋佫幾若千年过去喽,中国侬嘛犹原伫世界顶徛在在。虽然讲即一外百年來,咱一再去予侬侮辱佮凌迟,不过這拢算是小 插曲,早慢会过去。优秀的中华民族犹原会佫再徛起,向前行去!最後實现民族复興!

發佈留言

發佈留言必須填寫的電子郵件地址不會公開。 必填欄位標示為 *

*