中國解除對Blogsome的封鎖

今仔日中晝,雄雄發現《六月無善北》peh 會得去囉!敢講是中國解除對blogsome的封鎖啊毋?有即款代誌?佫試一遍看māi,精實有影neh!即擺,無信聖(sìn-siàⁿ)嘛著愛暫時 bóng信。是講,ah這是tī 時的代誌咧?頂一暫仔,我 會記得 oân-á 捌 超工 佫 kā 試咧,ah hit 陣 明明 著 猶佫 teh 封鎖,想bōe到 無偌久了後的今仔日,封鎖 soah 解除啊。國開始封鎖blogsome,是舊年(2005年)熱儂,到taⁿ 算算咧,已經強卜9月日久啊。舊年blogsome拄拄hông封鎖hit陣,國裡外著有bōe少儂徛出來講話,通過各種方式對GFW即種違背基本人權的漚步,表示譴責佮不滿。當時,tòa佇國外的“马乐伯乐谷”有寫一篇報導——《Don’t stand between me and my Blog!》,對GFW的行為進行 摳削 佮 phì相。我感覺即篇報導寫了真讚,當時著有kāi翻譯做閩南文,題目無變,共款號做《Don’t stand between me and my Blog!》。

當時,GFW會想卜閘blogsome,嘛毋知是為著啥物原因,kiám-chhái是因為即間外國的blog網站傷過頭 「自由」,有足濟中國儂佇hia拍拚佮行踏。儂講「儂濟,話著濟」,會 講東講西,該講的攏講啊,不該講的嘛攏講講出來,安呢一下來,濟少著會去礙著咱偉大祖國的政權,「破害」著安定團結的政治局勢。所以,當然是愛閘起來! Ah GFW拄仔好是in飼的一隻狗。儂講「恨攑刀兮,無恨刣儂兮」,無法度,GFW hoān-sè 也有伊家己的苦衷,不而過,為著飯碗,明 知影 顧儂怨,嘛只好歹儂做到底。

時間過去卜9月日囉,blogsome總算洗清冤枉,無罪釋放。9月日,實在無算短,講較歹聽的,he「連囝 嘛生出來啊」,對一个網路傳媒來講,時間著是錢銀,儂客著是財路,損失,是起碼的代誌。對中國的blogger來講,減一个blogsome,hoān- sè bōe有啥物實質性的損失,顛倒會當透過即款的事件重新佫來看清楚即个社會,跋一倒,加得著一份智慧。

儂講「樹身徛得正,毋驚樹尾 儂搖風」,烏雲,較厚嘛bē久長;日頭 總是愛出來。今仔日blogsome放出來啊,咱teh歡喜,teh紀念,毋佫,逐个毋通bē記得,猶佫真濟真濟 佮 blogsome共款運命,甚至佫較慘的,taⁿ 猶佫ut佇「籠仔裡」(lông-á-lāi)做著hit款佮in的身份無對同(tùi-tâng)的「監囚」(kaⁿ-siû)。到底 in 是 犯著 啥物 天條?敢攏無 天公地道 啊?咱祝願chiah-ê「監囚」會當早一日見著日頭光。

發佈留言

發佈留言必須填寫的電子郵件地址不會公開。 必填欄位標示為 *

*