三箍,內面請

泉州諸姥阿麗仔,厝徛鯉城,儂佇晉江青陽食頭路。有一過,公司派伊去同安出差。彼日,公事辦了,天猶未暗,阿麗仔想講,橫直猶佫早早,閒閒無創啥貨,罕得幾時來同安一逝,無規氣來去同安城雲雲、踅踅、看看咧,順紲買一半領衫褲抑是啥物貨。想到做到,無偌久了後,阿麗仔著來到同安環城北路邊頭彼條街仔路。即搭離梵天寺(Hâm-thian-sī)誠近,街仔路的店頭計賣一寡拜拜著用的金銀紙啦、香啦即號物件,嘛有咧賣鏈珠,樹膠仿的假玉仔。阿麗仔佇街仔路勻勻仔遨(khô),遨來到一擔咧賣雜細的擔仔邊。賣雜細的頭家,是一个在地的諸夫儂,一箍肥肥,頭殼thuh額thuh額,略略仔thāiⁿ一个腹肚桶仔,儂誠好禮、誠好笑神。賣物的頭家看阿麗仔相著一koāⁿ佛珠金金看,敢若不止合意的款,著趕緊倚過來poé話、褒囉唆。

“小姐,看汝按呢端莊流麗,舉止溫馴,人生決定富貴美滿,平安順序。”
“喔?敢按呢?”
“哪會無影!我騙汝無錢趁,我佇遮梵天寺開店開十外仔外年囉,無儂緣嘛有佛緣,儂講攑頭三尺有神明,佛祖在上,我哪敢烏白講,著無?”
“嗯?我哪會知?我也毋捌汝。毋過,聽汝講話,佫是誠甜。”
“無囉!毋是我喙甜,是汝有緣。”
“嗯,講按呢嘛是影,既然有緣,物件當然嘛著算較俗咧,敢毋是?”
“會啦會啦,我定定咧講,儂客來買物件是佮咱有緣,頂世儂有情,即世儂則會當來相交陪。物件我攏凊彩賣爾,算一个成本價著好,有趁無趁,歡喜著好。”
“哈哈,汝有影誠gâu講話,儂講生理喙,糊lùi-lùi,對對有影。”
“E̋ⁿ~話勿會用得按呢講!別儂按怎我毋知,若某儂,汝thèng好去探聽,我對待儂客著若親像家己的兄弟姊妹、朋友弟兄共款,從來攏是我食虧在先,毋捌予儂客蝕本著。”
“按呢喔。”
“Hēⁿ毋!啊著啦,按怎,汝看即koāⁿ鏈珠,滑溜佫褿勻,幼秀佫束結,摕來掛佇汝的手裡,通講是金包銀,玉khāⁿ soān,峇峇峇(bā),合合合(ha̍h)!佫拄嘛拄無即號鬮(khau)囉。”
“哈哈,好啦,傍汝的金言玉語,即條卜賣我偌錢?”
“按呢啦,講起來咱嘛是有緣,講話投機,我賣物是賣感情,若普通過路客即條上無我是賣二十,若汝…”
“我按怎?卜賣我偌濟?”
“若汝乎,二十免,十五免,對半說(seh),摕汝十箍著好。”
“ha̋ⁿ啊!十箍!?即條也著十箍?喲!儂阮泉州開元寺邊頭是排到規草籠,一條看有兩箍銀無!”
“啥貨啊?兩箍!喂,汝嘛講一个較行情咧。小姐啊,賣汝兩箍,我毋著阿婆仔炊粿——倒塌(tò-thap)!”
“加話莫(bo̍h)說啦,看卜毋?卜,來;毋,汰。橫直,我嘛無欠用。”
“哎喲,小姐儂仔,汝嘛毋通遐緊性,按呢喝來著來,喝走著卜走。來啦,遮坐啦,食一甌仔冰水,寬寬仔序,有財利。”
“哈哈,財利計嘛予汝諞諞(pián)去囉,哪有通輪(lîn)著阮…好啦,佫疊(tha̍h)汝一箍銀,卜賣毋,毋卜來去囉。”
“按呢是偌錢?”
“來啦,三箍,卜毋?毋真正卜來去囉。”
“啊?三箍?”
“Hēⁿ啊,三箍來koh!”
“啊好啊,汝卜愛saⁿ箍,著saⁿ箍啊,來,房間佇內面,請!”
“請汝的死儂頭啦!三箍銀啦!”
“啊?no sut!我父啊,了錢兼蝕本,ā有法度…”

Tagged: ,

Comments: 2

  1. 赫宇 2012-06-30 at 11:56:13 Reply

    拍算阿麗仔同安腔學了傷起,阿hiong5 hiong5未記得同安的特有用詞,哈。

    • admin 2012-06-30 at 12:37:42 Reply

      To 赫宇:著是講 毋!泉州妹仔會曉聽即句同安話的,真真無幾个。

發佈留言

發佈留言必須填寫的電子郵件地址不會公開。 必填欄位標示為 *

*