小姐,有卜相共無

有一个廈門諸姥,名號做阿蘭,生做誠媠,厝內誠有錢。亻因翁誠恿伊,專工買一頂passat咧予伊駛。阿蘭仔從有即頂passat了後,閒著開咧四界走、四界phāⁿ。有一擺,阿蘭仔駛車按廈門卜去汕頭。車駛到詔安地界,阿蘭仔感覺車身敢若略略仔敧一爿,驚驚毋敢佫行,著趕緊落車卜來看詳細。一下看,夭壽啊,底時仔倒手爿後壁輾毋知按怎soah消風去,看勢穩當是鑿著鐵釘仔抑是啥死骨頭,破胎去啊。阿蘭仔拄拄駛車無偌久爾,毋知頭天,拄著即號代誌,一時頭殼攏全昂(gông)去,煩惱到趒骹頓蹄!
“死啊死啊,哪會按呢啦?當(taⁿ)是卜按怎則好?”阿蘭仔想卜敲電話叫儂,好死毋死,手機仔soah無電!
“我苦啊,當是卜怎樣死?天公伯仔,汝嘛毋通按呢共我滾爽(sńg)笑…”阿蘭仔拄咧焦心憋腹,火燒鼎臍,雄雄看著對面車路有一頂掛漳州牌的警車沓沓仔駛過來。警車直直駛來到阿蘭仔即頂passat的邊仔停落來,車窗玻璃放落來了,阿蘭仔則看清楚坐佇駕駛座的是一个穿交警制服的中年諸夫。即个中年交警車門開開,落車對著阿蘭仔遮著行過來囉。
“小姐,汝車破胎啊”。
“汝是?”
“喔,我是佇即箍圍仔巡邏的交警啦,我姓張,詔安在地儂。”
“汝…汝哪會知我車歹去?”
“ah我頭拄仔按遮巡過,看著汝車身敧敧,ah佫看汝咧檢查車輾,我著知影汝車穩當破胎啊啦”
“按呢喔…”
“hēⁿ啊…啊著啦,來,汝小閃一下,我共汝看māi咧。”
“嗯,真正破胎呢,愛趕緊換輾仔哦。”
“喔,哪會按呢啦,我早起卜出門則檢查的爾,哪會無代無誌雄雄破胎?”
“無的確是汝路頂去轂著鐵釘抑是啥物貨……嗯,汝看,真正是一支四角釘!釘仔頭猶佫浮現現,汝看,佇遮啦。”
“夭壽,有影呢,哪會遐大支?”
“hēⁿ啊,誠大支。看勢,即支鑿了佫不止仔深,我看,這輾仔敢著剝落來則有法通修理。”
“哪按呢卜按怎咧?”
“著啊,小姐,我問汝一下,汝捌家己換過內胎毋捌?”
“啊?…汝講啥?內胎?家己換?”
“hēⁿ啊,內胎汝捌家己換毋捌?”
“哎喲,ah汝哪會按呢共儂問啦?儂阮會歹勢呢……”
“啊?歹勢?換內胎這真正常啊,是咧歹勢啥?ah汝到底捌家己換著毋捌?”
“嗯~汝即个儂哪會按呢啦,無代無誌kâng問按遐去?儂…儂阮計嘛阮翁共阮換的kong…”
“喔,攏恁翁咧共汝換喔。按呢…汝…”
“哎喲,汝毋通佫問啊啦,儂真正會歹勢啦”
“喔…無啦,我是想講卜問汝,當(taⁿ)有卜相共(sio͘-kān:詔安話)無?”
“啥?汝講啥?相…相…幹?!”
“hēⁿ啊,愛我共汝sio͘-kān毋免?共汝sio͘-kān好,我通來去無閒別項。”
“夭壽,不四鬼有影!大當白日,大路邊頭,講叫儂佮汝相幹…有影癩膏鬼。”
“啊,汝講啥?啥不四鬼,啥癩膏鬼?”
“汝即个儂哪會遐豬羔佫厚面皮!明明頭先講卜招儂佮汝相…相…哎呀…儂無愛啦…”
“無啊,我哪有講啥,我是想講看汝輾仔破胎,好意卜共汝鬥骹手爾,啥物咧我不四鬼、癩膏鬼?”
“啊?!汝講啥,汝…汝真正是咧講卜共我鬥骹手毋??阿娘仔喂,按呢毋著我聽毋著?是我誤會毋?我苦……”

Tagged: ,

發佈留言

發佈留言必須填寫的電子郵件地址不會公開。 必填欄位標示為 *

*