師傅啊,共阮暢一下

有一个漳浦妹仔,伊名號做阿玲仔。伊聽儂講廈門錢淹骹目,紙字真好趁,著央(iang)儂介紹來廈門做工。儂介紹伊去佇海滄東孚一間快餐店咧予儂倩做雜工。有一日透早,店裡(ni̍h)一个管採購的薪勞破病請假,店頭家著吩咐漳浦妹仔阿玲仔去買菜。買菜,計著去灌口大菜市仔遐買較褿全(chiâu-chn̂g)。阿玲仔毋捌去過,毋知路。想卜搭的士,卜嫌傷siong本;卜行路,mih傷遠。伊想來想去,決定卜搭公交車去。駛公交車的機司(ki-su)是一个少年家,聽伊的腔口敢若(kán-ná)是在地儂的款勢。阿玲仔坐上車了後,驚得坐過站,一路擔頭攑耳(taⁿ-thâu kia̍h-hī),前看後看,無一時仔定著。車一站一站直直駛過,到尾仔車頂kan-ta賰阿玲仔佮機司兩个儂。車照原咧走,阿玲仔是按呢緊張kah。又佫過去久久,車駛來到一位不止仔iap-thiap的所在,臨當時(liâm-tong-sî),阿玲仔看著路邊有一桗(tè)鐵牌仔,頂頭畫一个斡鉤仔,佫有帶箭號,尾溜寫「灌口」兩字。阿玲仔想講「灌口」穩當到啊,著趕緊大聲喝機司「師傅啊,thiòng一下!thiòng一下!」駛車的機司khiám-chhái無疑悟(bô-gî-gō͘)聽抑是按怎,無chùn無būn。阿玲仔看車無停,真正食急,著佫較大聲嚷「喂!師傅啊…師傅啊,thiòng一下!thiòng一下!毋通佫行啊,較猛(khah mé)共阮thiòng一下!」即聲,機司聽著囉,伊感覺龜怪,「即个諸姥(cha-bó͘)哪會叫我共伊『暢』一下?敢會聽毋著……」機司自按呢大聲應伊「汝講啥?叫我共汝按怎?我聽無……」阿玲仔著佫再喝一遍「thiòng一下!thiòng一下啦!共阮thiòng一下啦……」機司聽講卜叫伊共「暢」一下,歡喜kah,趕緊踏剎車,倚(oá)路邊拋車、熄火。
「嘿嘿,嫷諸姥嬰仔,汝頭拄仔講啥?敢是叫阿兄共汝暢一下?哈哈,當(taⁿ)阿兄來囉……哈哈」機司車拄拋好,看四箍攆轉計無儂,著起身,對著漳浦妹仔阿玲仔chhi̍h倚來囉。

「喂!汝卜創啥?救儂啊!救儂啊……」可憐即个漳浦妹仔,看著彼隻痟豬羔直直chhîⁿ倚來,驚到神魂四散去,直直閃、直直勼,ná退ná喝救儂。
「恁娘較好,汝嘛勿愛佫假啊,汝頭先毋是卜招恁父共汝暢一下?阿兄當(taⁿ)來囉,勿愛走……看汝卜走去佗?哈哈哈……」機司早著豬羔神攑起來……可憐的漳浦妹仔,自按呢予即个豬羔機司「暢落去囉」。
……
尾手,警察來到現場。經過調查審問,警察瞭解著,底時仔講即个漳浦妹仔是卜叫機司「停一下,停一下」,毋過,因為漳浦腔「停」唸做「thiông」,聽著佮廈門話「暢(thiòng)」卜倚卜倚,soah來引起著機司誤會,歸尾則會來舞即齣。
來講即个機司,好死毋去死。暢,是暢去了囉,毋過,關,嘛著照關。注伊卜衰,一審判五年加一年。真正是三好加一好——四好(死好)!

Tagged: ,

發佈留言

發佈留言必須填寫的電子郵件地址不會公開。 必填欄位標示為 *

*