是怎樣卜寫閩南文?

問題(1):閩南語寫文章,句法佮普通話文有啥物無共款的所在?
回答:用閩南語寫文章,著是愛用閩南話講話的模式去思考,去組織句法。各種語言,攏有伊家己的句法,閩南語的句法、文句,佮普通話,有差,有的sio-siâng,有的無sio-siâng。

問題(2):普通話文字,有部爿通認,閩南話文字組字有規律無?
回答:閩南白話文字,大多數敿普通話文字siâng款。無siâng款的彼部分,事實所佔比例無濟,差不多三四成額。普通話的字,著是官話白話文,摕出來寫,已經成百年囉。閩南字,著是閩南語的白話文字,即陣則起手佇咧實踐,無官方的標準通看樣,所以,攏是靠民間、網友佇咧試寫。有的字,猶未定型落來,猶未無成做規範,儂卜學,會較僫。閩南字,一部分是按古漢語來的,一部分是咱在地生出來的土話,敿古漢語,敿當今別所在的漢語攏無sio-siâng;另外,猶一部分是按古早閩越族的土話來的,嘛有一寡是近代外來語的借詞。即三四成佮普通話無共款的,硬硬著去學、去記。有的本然源頭毋是漢語的字,著揣無本字通寫,局不局著寫代替字。就使是按古漢語傳落來的,因為年號(ni-kō)傷久,有的字音傳到即陣,soah變了了,卜查考伊的本字,真正僫,嘛是用代替字來寫。

問題(3):咱的鄉親,假使卜來學遮个閩南字,敢有啥物撇步、啥物經驗通好參考?
回答:卜學閩南字,著愛加去看別儂寫的,加看一寡閩南語的字辭典。字辭典,網店、街仔路的實體店攏有咧賣;網頂嘛有在線的通查通看。佫來,網頂嘛有一寡用閩南語白話文寫的文章,比論講blog或者是網站,有福建的,嘛有台灣彼爿的。咱即陣有建兩个QQ陣(有緣來做伙:81229762、正字群:22637566),著是為著卜教鄉親來學寫母語文。咱佇咧QQ陣教儂學寫閩南文,兩三年來,誠濟儂已經學會曉寫閩南文。來學的,一个報一个,一个牽一个,愈湠愈濟。有的儂學了後,著起手來佇咧寫母語文的blog,有的去佇咧百度貼吧(閩南語吧),佇遐咧宣傳,教儂寫。

問題(4):閩南語即下啥物狀況?有儂講閩南語愈來愈無來儂佇咧講,敢按呢?
回答:真正是按呢!閩南語,總的來講,即陣是直直勼(kiu)去,一寡少年家愈來愈勿會曉講父母話,一寡在地語詞直直蔫去、無去。所以,我感覺現時主要任務,毋是推捒!是著愛挽救!

問題(5):卜挽救嘛是着有推捒,毋則有法度?亦毋過,汝的意思是,先來講,則來寫,是毋?
回答:毋是!按呢理解有誕誤。推捒,著是講卜共伊推廣出去,予佫較濟的外鄉儂來學來講。毋過,現此時,閩南語是家己儂都無致重,無啥有咧講;閩南囡仔誠濟攏無教,攏勿會曉講。所以,咱著愛先挽救!挽救,著是講,咱著愛千方百計,苦勸咱的鄉民,愛加講閩南話,叫咱的家長,著愛教囡仔講閩南話。若是會當「喙講,手綴寫」,按呢來搶救閩南語,效果穩當是重倍好。現白講,即陣咱著趕緊將失落的鄉民揣倒轉來;共遐个無咧講父母話,將父母話放捒的閩南儂,搝倒轉來。閩南儂則是閩南語的基本盤!無根的樹仔,勿會活。反倒轉,閩南語是閩南儂身軀頂的血!閩南語無去,「閩南儂」即个文化概念嘛會散去。

Tagged:

發表迴響

你的電子郵件位址並不會被公開。 必要欄位標記為 *

*