各位咱遮个好朋友、鄉親序大，阿伯阿姆，阿婆阿姊，小弟不才，今仔日來貴寶地，毋是卜推銷腰鼓、鼎筅；豬、刀、砧、螺、肉、稱；嘛毋是卜賣鳥鼠藥、蝨母藥、虼蠽藥、胡蠅藥、蝒蟲藥。今仔日正港卜來介紹一貼祖傳秘方，專治諸夫儂雞雄、勿會攝、倒陽兼墜腸。各位遮个男士朋友，即貼藥仔，好好儂來食，會當袪傷解鬱，敨中氣！長期食，會當共汝挺元固氣，照顧汝的下丸。予汝強，予汝勇，予汝暗時咧「拚暝工」，加真有氣力，加真有擋頭！即款藥仔，真正佮別儂無共款，日時暝日攏會使食，一日食三擺，一擺食一罐；二十罐一療程，食予迵，食予煞，徹底改善汝雞雄、勿會攝、倒陽兼墜腸的老癥頭，予汝有活力，予汝有耐力，予汝一尾親像若活龍咧。

儂客啊，儂講有燒香有保庇，有食藥有行氣。即味藥仔，真正佮汝上麻吉，無買，恁某保領佮汝現激氣。一罐俗俗，交易兼利市，外口賣二百四，即陣削價則卜賣汝二百二。各位，借問卜去佗揣即號好空的代誌？按怎？有儂卜交關無？各位毋通佫頓蹬，毋免考慮佮躊躇，趁著今仔日好時機，好日子，趕緊倚來摕兩罐轉去佔便宜。儂客啊，毋是我咧痟貪恁的『人民幣』，真正是我好心咧做好代誌，好藥則卜報汝逐个倚來試……

啥物？『送汝，汝都毋挃？』即款話，汝也講會出喙？各位敢是無合意？儂客啊，汝真正毋捌寶，目睭去糊著目屎膏。講著我即號藥，世間通儂無，獨獨我一號。我百年的老店，毋是我家己呵勿會臭臊，食著我的藥，真正是汝有福報。汝若來共我買，我保證汝明年會生諸夫，若無來買，拍算十年八年虼蠽木虱嘛生無。列位儂客倌，汝毋通放放吶，嫌我即號講是膦鳥藥。我共汝講，毋驚汝愛笑，我即味藥，食落去到tè，連老雞母都會起chhio，嘛有彼號老豬哥，本然一條軟sô-sô kán-ná弓蕉，食著我的藥，liâm-mi一支soah硬戧戧kán-ná鐵尺。儂客好朋友，有儂卜挃無？按怎？逐个suah惦惦徛咧看？各位毋免驚，我趁錢是摸心肝，賣藥是咧賣名聲。汝即下若共我買一件，另外卜佫送汝一件，半賣半相送，有通食有通掠，有局佫有額，真正予汝買到會歡喜，買到會滿意。死啊，講規晡，soah勿會記得介紹藥仔名。儂客啊，愛會記咧，咱即貼藥仔，號做『大力神丸』啦，逐个毋通niauh-niauh看，著來交關較有影，緊來喔！！

Tagged: 笑古, 講笑詼