母仔揣一个少年後叔

阿菊仔亻因老母今年四十五歲。從(chêng)父母離緣了,阿菊仔著判予亻因母仔銜(kâⁿ),父母雙方面大概嘛是想講,阿菊仔是諸母囡仔,綴老母食,會較利便。阿菊仔亻因老母是一个愛嫷,愛妝的婦人儂,平常時仔定定妝到一个kán-ná阿旦!其實,從父母離緣了,阿菊仔著希望老母會當揣一个諸夫儂來倚靠,ah毋過,老母定定應伊講,老囉,卜揣毋揣攏無差。阿菊仔知影老母按呢講,攏是為著伊即个諸母囝。老母驚講若佫揣一个後叔,時到對伊毋好,按呢顛倒會去害著囡仔。會記得三四年前,有一擺,阿菊仔捌央(iang)厝邊阿姨,卜介紹一个阿叔予亻因母仔相捌。彼个阿叔真軂,真清飄,儂佫有學問。阿菊仔想講亻因母仔穩當會看合意,想勿會到反轉(hoán-tńg) soah予伊罵到臭頭!母仔警告伊勿愛佫變(pìⁿ)變hiah-ê有的無的,叫伊著愛做意致仔讀冊,序大儂的代誌勿愛插插遐濟。

阿菊仔今年二十歲,轉成(tńg-chiâⁿ)囉!伊知影母仔生伊,佫共伊成養(chhiâⁿ-ióng)到遮大,真正足艱苦,足無簡單的。自細漢,伊的心願,著是眏望(ǹg-bāng)母仔會當平安幸福過一世儂。即幾年來,阿菊仔tok-tok想卜替母仔揣一个會當倚靠,真正愛伊的儂佮伊做伴,ah毋過,母仔任講都勿會通,講毋著是毋。伊毋,阿菊仔嘛硬硬無伊法。

今年得卜期尾考彼暫仔,阿菊仔激冊激到真迫促(pek-chhiok),攏罕得轉去厝裡(ni̍h),就使有轉去,嘛是定定現轉去,尻川位坐猶未燒,著現卜佫趕倒去學堂,根本無彼个閒工去插亻因母仔的代誌。到kah有一日,母仔生日,阿菊仔專工請假卜轉去敿母仔做伙慶祝。本然,母仔毋予伊倒來,路尾予伊直直醪(lô)佮遨(kô),無法度,看破則答應予伊倒來。阿菊仔倒來了,隨入門著驚一趒(tiô)!娘仔喂!母仔毋知底時身軀邊soah 綴一个少年家!彼个諸夫的(ta-po·- -ê),看起來猶佫chíⁿ-chíⁿ,上加二三十歲煞!哪會按呢?阿菊仔趕緊共母仔khiú去邊仔寬寬仔(khoaⁿ-khoaⁿ-á)審問。阿菊仔全全無疑誤(bô-gî-gō·)彼个是母仔亻因諸夫朋友!聽母仔講到有骹有手,阿菊仔臨當時(liâm-tong-sî)險戇去!母仔講彼个儂拄則三十歲爾(niâ)。算算咧,猶佫少母仔十五歲足足,真正足亂的!阿菊仔起先無贊成亻因兩儂做伙,ah毋過母仔不准伊插,叫伊家己讀冊顧予好較要緊。是講,拄著即號代誌,叫阿菊仔卜thài-thó有心情(sim-chiâⁿ)通讀冊?阿菊仔愈想愈毋妥當,暗靜(àm-chīⁿ)走去叫問彼个諸夫的,苦勸伊勿愛佫來揣母仔膏膏纏,無疑彼个諸夫的soah講伊是真心佇咧愛亻因母仔,講卜一世儂疼惜伊,予伊幸福。阿菊仔真正激無,對方到底是為著啥?雖然母仔生做有影勿會bái,卜講嫷嘛有影不止嫷,ah毋過佫較按怎嘛是四十五歲的老諸母囉!敢講貪著錢?彼嘛無啥可能!即幾年來,母仔為著卜供伊讀冊,較早所趁的、即幾年儉的,真正攏開到強卜焦去囉,厝內根本都賰無幾尖錢佇咧。阿菊仔想來想去,想無對方到底是憶著啥。

後來,阿菊仔則知,亻因兩个是佇舞會相捌的,兩个計是彼號『看著,著現去歃(sahⁿ)著』的彼種儂。彼个諸夫的,共阿菊仔講,伊是真心愛亻因mammy,絕對毋是一時興興佇咧變猴弄。伊講伊上合意像阿菊仔亻因mammy即號大伊成十歲的諸母儂。毋過,在阿菊仔拍算,對方敢(káⁿ)是軟母(nńg-bó)抑是諸母儂纏(cha-bó·)較濟!

阿菊仔共伊走去揣彼个儂的代誌,講予亻因母仔聽。母仔共伊罵到卜臭頭去,拜託伊此後勿愛佫插大儂的代誌。是啦,勿愛插著勿愛插。只卜母仔歡喜著好!母仔若歡喜,對阿菊仔即个做儂諸母囝的來講,著是福氣!講是講按呢啦,毋過,面頭前即个『後叔』則kan-ta大伊十歲,並(phēng)母仔少十五歲,臨當時卜叫阿菊仔接納伊真正有較僫。若毋- -mi,卜驚母仔傷心;卜- -mi,卜按怎共汝叫?卜叫伊『爸仔』抑是『阿兄』?阿菊仔感覺誠勿會慣勢,誠礙瘧(gāi-gio̍h)!路尾,應信(ìn-sìn) 勿會憖(giàn)共伊叫,無名無姓,直來直去較條直!

不而過,儂伊嘛照品照行,都(to)有影像當初講的按呢對亻因母仔囝真好。一家三个,友愛協和。總是,阿菊仔彼句『爸仔』較按怎都叫勿會出喙……按呢嘛好啦,只卜伊對母仔好,著好囉,敢有必要煩惱遐濟?佫講,是母仔咧卜綴伊一世儂,抑是伊阿菊仔本身儂啊,管管遐濟卜創啥貨。總講一句,彼是母仔伊家己愛的,好歹,伊穩當在早著考慮過囉。伊若感覺有幸福,著毋通放,彼是伊一世儂的關係。

即个諸夫儂,是母仔家己chhōa轉來的,雖然阿菊仔到當(taⁿ)猶毋知影亻因鬥陣有偌久囉,ah毋過,伊知影亻因是真心佇咧相愛。

Tagged:

發表迴響

你的電子郵件位址並不會被公開。 必要欄位標記為 *

*