嘭嘭嘭(4)

【接頂篇:嘭嘭嘭(3)、(2)、(1)】

「頭家,有一層代誌,我想卜共汝講。」
「啥物代誌?」
「頭家汝看,斜吊角彼幢(thōng)五棧樓,有一个儂徛佇咧四樓窗仔墘,有無?」
「Ah都有影!幹!」
「從(chêng)昨昏早起著來ah,我略仔臭疑臭疑……」
「Ah汝哪會無較早共我講?」
「頭起先,我嘛無確定,暗靜跟伊規晡,愈想愈毋妥當,毋則趕緊共汝報告。」
「著啦,ah大柱仔彼爿情況按怎?」
「放心,攏安搭好勢ah,彼个所在真秘密,決定安全。」
「細膩無蝕本啊!」
「我知。我有派儂暝日守佇遐,若有啥物風聲,亻因隨時會通知我。」
「鴨卵密密嘛有縫,我猶是勿會放心。」
「嗯……」
「我咧想啊,即層代誌,勿會用得佫拖落去。遐个牛頭馬面決定勿會按呢收煞,緊choa̍h緩(oān)予亻因搜(chhiau)著。」
「頭家汝意思是?卜chhōa亻因翁仔姐過去彼爿?」
「著!愈緊愈好。」
「嗯!若按呢我緊來安排。」
「嗯,汝做汝去發落。」
「好,我當(taⁿ)隨來去。」
「慢chiah!明仔透早有一班船。加叫幾个仔骹數(kha-siàu)護送。絕對勿會使失覺察!」
「是,我知。」
……
……
「頭家,ah汝佫咧操煩啥?來啦,這參仔茶拄現燃(hiâⁿ)的,燒的,細膩。」
「影影一月日到ah。昨暝大柱的敲電話來講,春枝仔即兩日著卜生ah……嘛毋知當(taⁿ)情況……」
「喨喨喨……喨喨喨……」
「頭家,電話。」
「叔仔係(hèⁿ),大柱的啦!生ah啦,春枝仔生ah啦!」
「大柱的喔!沓沓仔(ta̍uh-ta̍uh-á)講,沓沓仔講……Ah當(taⁿ)情況按怎?大儂囡仔攏平安無?」
「真好骹手!平安佫順序。」
「著啦,ah是cha-po·的抑cha-bó·的?」
「有摃槌仔柄的啦,哈哈……」
「恁娘咧,毋成猴,看汝歡喜到按呢……」
「叔仔,我……我真正歡喜啦!!」
「嗯…真好!看勢,即攤滿月酒,著好好仔辦一下則會用得!」
「叔仔,ah阮底時通倒去?」
「毋免緊狂,時到我會安排。Ah著啦,所費有夠開無?」
「有啦有啦,夠ah啦。Ah透早,著有儂來登記,講卜共嬰仔辦啥物啥物《出世紙》、《回港證》……我聽到霧sahⁿ-sahⁿ。」
「彼汝免管啦,儂問汝,汝照講照報,著是ah。」
「叔仔,ah汝即暫(chām)有較好勢無?身體愛顧,毋通傷操煩neh!」
「唉,恁叔仔我按呢日想暝想,長看短看,今仔日真正是予我ǹg著囉!即幾年拍拚走chông,會值得,會值得!」
「係啦!咱陳家有下thèⁿ囉!」

【煞】

Tagged:

發表迴響

你的電子郵件位址並不會被公開。 必要欄位標記為 *

*