儂驚儂 啊 鬼驚鬼; 鬼驚儂 啊 儂驚鬼..
講東講西,來講豬哥半暝放尿去拄著鬼.
豬哥:三烏四暗,一四界暗摸摸,目睭bái,看無電燈禁仔佇tah落…放一垺屎,行hiah遠,有夠食力的啦…ngh,啊!!!鬼啊!救儂啊!鬼啊!
鬼: 阮是烏白無常,阮等汝真久囉!
猪哥:烏白無常? 恁是來卜創啥貨?我都無叫恁來…
烏白無常:豬哥,阮問汝,汝犯啥物罪,汝知毋知?
豬哥: 我犯罪?我毋知…
烏白:汝毋知?汝家己有做無做,汝毋知?汝是咧騙鬼!
豬哥: 汝娘較好,ah恁都有影鬼…是講,我捌騙著儂,都猶毋捌騙著鬼.
烏白:勿愛囉唆啦! 綴阮來去閻王殿行一逝,汝著知ah !
豬哥: 閻王殿? 彼佗位仔?
烏白: 去,汝著知!
豬哥: ngh, 恁娘較好, ah彼都地獄毋?!
烏白: 無毋著!
豬哥: ah無啊…當是按怎ha̋ⁿ?ah…我是犯啥物罪?
烏白: 汝…汝…汝開諸母.
豬哥: 嘿…笑死儂kong! 恁娘較好,恁父猶毋捌聽儂講閻羅王oân-á有咧管儂開諸母.
烏白: 大膽! 汝敢恥笑閻君, 汝這是以下犯上,公然侮辱君王,罪加一等!
豬哥: 恁父聽汝咧放屁! 恁娘較好,恁父有開諸母無開諸母,猶未著到汝管! 我共汝講,轉去共恁頭家講, 叫伊小撙節一下,毋通卒仔食過河!
烏白: 汝…汝好大膽!
豬哥: 我按怎? 我共恁講, 恁父著是專門咧治恁即號牛鬼蛇神,無主神魂..今仔日拄著我,恁娘較好,注汝卜凄慘..
烏白: 有啥物漚步,做汝展出來!
豬哥: 啊好!恁小等一下,恁父入來去攑太子劍!小等咧予恁父捎出來,汝著知死..好膽勿愛走!
烏無常: 喂..當(taⁿ)是卜按怎? 伊講卜入去攑太子劍…
白無常: 彼是啥潲?
烏無常: 恁娘咧!汝真正毋捌字,佫毋捌咧看電視啦! 彼太子劍是三太子在生的時,防身的傢俬..彼若小可仔摔(sut)一下,按呢比一下,汝著無命囉…
白無常:按呢喔…毋過,咱嘛有武器,汝有孝杖(hà-thn̄g),我有鉤鐮槍, 咱也使(sái)驚伊?
烏無常: 恁娘較好,汝按算卜佮伊拚毋?汝毋驚死?
白無常: 驚死毋是大丈夫!
烏無常: 卜死免驚無鬼通做啦。卜拚乎,汝家己佮伊拚,家己留坫遮佮伊拚啦,,我先來走…
白無常: 汝…咱毋是講卜同齊進退?彼日汝佫對佛祖咒誓,講”汝著是我,我著是汝”?
烏無常: 恁娘較好咧啊, 汝緊卜去死, ah我佫想卜活lioh!
白無常: 按怎講?
烏無常: Nah! 汝自細無父無母, ah恁大姊佫予儂強姦;尾仔吊脰;恁小妹去做婊;尾仔予儂創死;恁小弟做賊,予儂掠去拍銃; 恁大兄刣儂放火,尾仔家己火燒死…佫有啦,恁..恁..恁啥物儂上山剉柴予虎豹仔拖去孝孤…恁兜規家伙仔都死到無半个….汝無某無猴,無儂管無儂插,汝死無要緊..ah我著佮汝無共款啦.
白無常: 佗位咧無共?
烏白常: 講汝悾,汝soah誠實咧倲戇!我厝內有某有囝卜顧,有序大卜有孝,規家伙攏咧聽候(thèng-hāu)我落班倒去食下昏..橫直,我猶佫有足濟代誌卜做,足濟空課咧等我卜去做…啊!勿會憖佮汝講ah啦, 恁父緊赸較有影,小停…伊若太子劍攑出來,恁父性命無去!
白無常: 汝…小等一下…小等我一下…我嘛卜來去。
….
豬哥: 來啊來啊,我來啊,恁娘較好,烏白無常汝敢若食恁父足夠的。ngh, ah儂咧?哪會攏走走無無去?恁娘較好,害恁父尿soah勿會記放!
Tagged: 笑古
Lí tsit phinn bē sū hit hō Ti-ko-liāng-á ê sam-pat-kio̍k ê kio̍k-pún leh!