rt {font:16px;color:#666}
昨暝佇YY頂頭，敿(kiau)阿德仔咧開講練仙，有講著講，當(taⁿ)佇台灣有辦足濟彼款號做「讀冊會」。一下問，則知影講，著是一寡儂聚會(chū-hōe)做伙，揣一个所在，揀(kéng)一个較定著的時間段，逐个做伙來學、來讀母語文。中間，會當討論、相(saⁿ)牽教。來讀冊會的學員，有的拄來攏毋捌母語文，勿會曉看，嘛勿會曉寫，亻因來讀冊會了後，學儂讀，綴儂唸，學一下久，著會當家己看，家己讀，家己寫母語文囉。有的自底敢採(kiám-chhái)半桶屎仔，來讀冊會敿儂交流討論，本事著會提懸。聽講佇台灣，讀冊會辦足濟，各所在攏有，來的儂較濟是業餘。遮个(chiah-ê)儂通講是母語文的先行者，因為亻因捌得母語文，亻因佇社會上，佇網路頂懸，來咧寫母語文，濟少會來引chhōa普通的社會民眾重視母語，認捌母語文，提懸母語覺悟。
我咧想，遮个台灣儂有即款的覺悟，有遐呢濟儂願意徛出來做遮个代誌，可見亻因母語覺悟誠懸，卜挽救母語，卜推捒(thui-sak)母語文的心情真正迫促(pek-chhek)！
福建的母語現況，事實敿台灣增差無偌濟。即陣福建大、中城市，成十歲以下的囡仔嬰，會曉講母語的，通講是愈來愈少。農村庄骹所在，卻(khiok)有較好一絲仔，總是(chóng- -sī)，下沿較輸頂沿，一代一代，直直無去。
面對即款的現狀，學堂無教，序大無傳，社會放外外，政府毋插(chhap)汝死抑活，咱的母語敢會自按呢死去？自按呢無去？事實講，是真無彩，真毋甘願。
咱毋是聖賢、先覺，咱不過是愛母語，比咱的鄉親較代先寫母語文，比儂較愛講母語的普通儂。咱的氣力(khùi-la̍t)的確有限，咱有法通做的代誌嘛有限。不而過，咱若毋徛出來，著無儂通做，咱母語即坵畻(chhân)，著會無收成，會拋荒(pha-hng)去，到尾仔變做荒草埔。
在本，佇2008年，我著創一个QQ陣，閒時著招軍買馬，佇頂頭用咱的母語文開講、化仙(hòa-sian)。到當(kàu taⁿ)，有一部分儂學會曉讀母語文，有的猶佫會曉寫。總是，QQ陣內底的儂，實在無夠濟；佫因為來的儂，較濟是咧練牙，十喙九尻川，實在無法通共咱的理念，咱的智慧傳播出去。
即暫(chām)仔，我一直透咧想，敢會當來辦一个親像台灣彼款的「讀冊會」，創一个所在，招一寡友志做伙來出力，來推捒咱的母語文？想幾若日，感覺敢(káⁿ)無法度。當佇QQ陣頂面走跳的儂，攏五湖四海的，誠分散(hun-soàⁿ)，卜共遮个儂招鬥陣，無可能，嘛無意義。
好得，即幾日痟YY，看著有儂佇YY頂懸咧教儂學語言，感覺這敢採通hō·咱做參考。現實當中，咱無法度招一大陣儂聚合做一下，不而過佇網路世界，咱敢採做會到。咱會當佇YY開一个頻道，咱有定著儂，有定著時陣點聲，有定著教材資源，只卜有儂願意出來教，有儂真心卜學，按呢咱即个「網路母語讀冊會」著辦會成。
Tagged: 母語運途
：歡迎加入《有緣來做夥》QQ陣（陣號：81229762）
^ ^
gún kám ē-sái tuè teh tsham-ka :p
Pektiong兄：會啦，到時若是真正辦會成，chiah請汝來！哈哈。
admin，感謝啦，開了一個所在（網站）給我學福建話，自己是福建人，不曉講福建話，真歹勢。。。。。。。
我的阿公是福建安溪人（我是馬來西亞人）， 勿知安溪人講的福建話是泉州音還是漳州音？ 請阿兄賜教。
chickybird07 : 莫（bo̍h）客氣。安溪縣，大部分所在是泉州音；小部分所在是漳泉濫（漳泉混和）。
唉，台灣嘛無有影講讀冊會四界是，我所知–ê，用指頭仔算，較毋免兩手…事實是：大多數ê台灣人並無要意母語死抑活… /___a
是講，若是恁佇網頂辦讀冊會，按呢汝想敢會有效果？
台灣嘛是有袂少迄款無浮上抬面 ê 母語讀冊會，只是地區性真強，外面儂毋知。毋閣，清一色攏是中年儂。
若汝講的這，我嘛有聽阿德仔講過，有影啦，事實著是按呢。著啦，儂阮即陣佇網路頂頭有咧教儂學「台羅」，等過一暫仔，學員若是學較倒咧，阮著卜來辦「網路母語文讀冊會」囉。