作者：徐楓（泉州鯉城區）

【轉載】《光明城－閩南語部落》

【正文】

頂日倒去厝內，拄著從永安倒來的大兄。佮阿兄兩儂坐咧食mai（泉州話，意思“飯”），ná食ná說話，看孫仔會曉說普通話勿會曉說閩南話，話拖話，soah說著我頂擺寫的《柚》，問阿兄看會曉勿會，阿兄說會，伊說：就是老姑厝內彼兩欉柚囉！阿兄說：汝即擺著寫咱厝內門口種的彼欉檬仔樹（檸檬桉樹）囉。是啊，說著彼欉佮我平歲的檬仔樹，嘛想著誠濟細漢時節厝內的情景。

破厝仔門骹口種一欉紅石榴，佫一欉檬仔樹。檬仔樹大到（kah）誠懸誠直，樹皮白白，誠光全（kng-chn̂g），手摸 滑liu-siû。有時仔厝內無囡仔伴，無儂佮我thit-thô的時節，我第一（合音te9，泉州話，意思“siōng-kài”）愛去抱樹，佮伊說話。摸著冰冰的樹皮，彼種感覺誠快活。逐年季節若到，樹皮就會變較烏，若是按尼就是伊卜褪皮囉。見若咧褪皮，我愛徛咧樹邊頭，共伊鬥拆皮，ná拆ná佮伊說話：汝choah（泉州話，意思“chiah”）大漢啊？汝佮我平歲，汝choah大漢，我choah細漢，勿會挃（ti̍h）咧！按尼無公平！汝著佮我平平大漢則著！我共汝拆皮，汝會疼勿會？ ……哈哈，即陣想起來誠愛笑，囡仔時節的想法真真誠奇怪。

檬仔樹的邊頭是一欉誠大欉、誠老的紅石榴，規樹計花，紅紅誠媠，佫是百葉（pek-ia̍p）的。細漢的時節勿會曉得，為啥物厝邊儂栽的彼欉紅石榴彼欉仔爾（意思：細細欉仔niā），佫會結石榴？ Ah阮厝內即欉choah大欉，反倒輦轉soah勿會生彼款紅紅的、好食的石榴啊？我想誠久，想勿會通，路尾，擋勿會牢，chian9去問阮阿兄。阿兄共我說：咱厝內即欉哦，但（nā）會開花耳（nī，泉州話，意思“niā/niâ”），勿會結子啦！佮厝邊栽的彼欉是無仝款的品種！聽ná聽，心裡勿會死心，猶佫直直咧眏望（ǹg-bāng）家已厝內即欉toh一日雄雄生誠濟石榴，通予我食伊暢！

彼時，厝內誠艱苦，但（nā）有阮老父一个儂作穡飼阮一傢伙的儂。嬤仔（má-á，泉州話，意思“阿嬤”）就佇厝後尾彼片厝埕種菜，說是厝埕，事實是破厝倒去了後，凊彩犁平的。第會記得的是芳菜佮芥菜。清明的時節，嬤仔會chhèng蘿蔔菜（lâ-pa̍k，泉州話，意思“紅菜頭”），蘿蔔chhoè-chhoè予伊幼，摻淡薄蔥仔幼落去chhèng，則叫阮阿姊摕一个筊栳（ka-ló）去後尾捻芳菜。芳菜洗清氣了，下咧筊栳（ka-ló）內泄水（sè-chúi)，卜食蘿蔔菜的時節，抾兩箬清氣的芳菜箬當潤餅皮包蘿蔔菜，咬落去生生（chhiⁿ)、脆脆、芳芳，誠好食哦！哇！我到即陣嘛猶會記得芳菜的彼个芳味！嘛猶佫硬死毋食彼款潤餅皮包的蘿蔔菜！

後尾sâng款嘛有栽石榴花。毋過一欉是紅的，一欉是白的。白的彼種會做藥得。厝邊若有儂咧做痢，會來共阮討去燃（hiâⁿ)水啉，誠緊就會好去。嬤仔佫佇後尾飼一大群烏絨雞佮番鴨。烏絨雞的毛白siak-siak，誠媠，佫誠gâu生卵。若看著雞走去石榴花骹phún塗，我會徛咧看，看［亻因］是毋是咧生卵，若是生卵，我會叫阿兄來（我毋敢去抾雞卵，驚予雞啄著。）。阮阿兄就會走去石榴花骹咧摸雞卵。阿兄摸著雞卵，就會ná走ná喝：嬤仔嬤仔，雞佫生卵囉！ ……

第愛第愛的就是嬤仔栽的彼欉指甲花，開花的時節誠芳，花細細蕊，白phú白phú。嬤仔有梳髻，伊會挽指甲花插咧頭頂。呵呵……我嘛會綴伊挽一簇仔插咧頭頂。大漢囉，我定定留長頭毛，就是為著卜梳頭通插芳花。若是看著白色的、有芳味的花計愛挃，共伊插咧頭頂、夾咧耳仔邊、抑是囥咧身軀頂的袋仔leh……

細漢的生活，即陣翻頭想起來嘛是猶會感覺著彼款幸福的味素！無煩無惱（hoân-hó，泉州腔），規日暢！

汝nih？汝細漢是障仔的（chiúⁿ-á：泉州話，意思“按怎樣”）？說來阮聽bāi咧，卜毋?

【音頻】（泉州鯉城腔）

Tagged: 講古